Jeremia 12:2 - O Debleskro Drom 2021 (Sinte)

² Jon hi har ruka, kai tu tchiwal an i phub. Jon wan baro un sorelo, un hidjrenn bud rukengre. Lengro mui rakrell latchepen tutar, lengro dji hi dur tutar krik.

O Debleskro Lab 2024 (Sinte-Manouche)

² Yon hi har rouka, kay tou čival an i phoub. Yon van baro oun zorelo, oun hidjrenn boud roukengre. Lengro mouy rakrell lačepen toutar, lengro dji hi dour toutar krik.

Jeremia 12:2 Referans Kwoze

Jesaja 29:13

O baro Dewel, maro rai, penas: Kal menshe sharenn man labentsa. Lengre tchipja hadenn man. Lengre djia hi dur krik mandar. Te mangenn le man an, rakrenn le palla, hoi lenge glan penlo was.

Tito 1:16

Jon penenn, te prindjrenn le o Debles. An lauter, hoi jon krenna, sikrenn le, kai jon les gar prindjrenna. Jon hi infam an o Debleskre jaka, un kamenn gar ap leste te shunell. Jaake hi lauter, hoi jon krenna, tchi moldo.

Mateo 15:8

O Dewel penas: Kal menshe sharenn man pengre muja. Lengre djia hi dur mandar.

Jeremia 11:17

Me, o baro Dewel, ko rai pral o bolepen un i phub, krom dran o kheer Israel un dran o kheer Juda i natsjona. Un jon kran tchilatcho koowa un choiran man, har chatchran le viechen o debleske Baal. Doleske dau len trad, te well bari bibacht pral lende.

Ezekiel 33:31

Un jon wenn pash tute jaake, har menshe khetne wenn, un beshenn pen pash tute, un shunenn, hoi peneh. Kowa, hoi penal, krenn le gar. Pengre mujentsa penenn le, te kamenn le man. Lengro dji djal koleske palla, har le bud lowe nai krenn.

Jeremia 45:4

Pen leske: Kowa penell o baro Dewel: Dik, miro them, hoi me bares krom, kowa krau me paash. Mire menshe, kolendar i natsjona krom, tradau win dran o them.

Markus 7:6

Penas lo ap lende: “Tumer rakrenn dui tchipjentsa. O Debleskro rakepaskro, o Jesaja, penas o tchatchepen pral tumende, har job tchinas: Jaake penell o Dewel: Kal menshe sharenn man pengre muja. Lengre djia hi dur krik mandar.

Jeremia 3:10

Un an ko tselo koowa was i Juda, lakri pheen, gar pash mande o tselo djijestar, kokres o mujeha, penas o baro Dewel.

Hiob 5:3

Me dikom i dineles, kai har i baro ruk soreles tardo his. Sik rakrom bibacht win pral leskro kheer.

Debleskri gili 37:35

Me dikom i tchilatches, kai hadas pes pral i wawarende, un kras pes buchlo har i baro sorelo ruk.

Habakuk 1:13

Tire jaka hi jaake djudjo, te nai dikeh kek tchilatchepen. Tu nai dikeh gar har i menshe dukedo wenna. Hoske kreh tu tchi, te dikeh kol chochene phukepangren, un peneh kek lab, te chal o tchilatcho koles pre, kai hi latcheder un tchatcheder har job?

Hiob 24:12

An i forja denn kolla gole, kai hi dukedo un merenn. Un o Dewel dell kek jak ap ko narwelo koowa, hoi i tchilatche krenn.

Hosea 7:14

Te denn le gole ap mande, well kowa gar dran lengro dji. Tchiddo hi le ap pengro tchiben un rowenna soreles, un tchinenn pen ratles, te well len djob un mool. Ap mande shunenn le gar.