Hosea 7:2 - O Debleskro Drom 2021 (Sinte)

² Un kowa djal gar an lengro shero dren, te djinau me lengro tselo tchilatchepen. Lengro tchilatcho koowa hi trul lende trujel, un hi mange tardo glan mire jaka.

O Debleskro Lab 2024 (Sinte-Manouche)

² Oun kova djal gar an lengro shero dren, te djinau me lengro tselo čilačepen. Lengro čilačo koova hi troul lende trouyel, oun hi mange tardo glan mire yaka.

Hosea 7:2 Referans Kwoze

Louka 12:2

Well o diwes, kai well kowa diklo, hoi kanna khatedo hi. Well o diwes, kai djinell hakeno kowa, hoi kanna kek djinella.

Debleskri gili 90:8

Maro tchilatcho koowa hoi kram, tchiwal tu glan tute tardo. Mari khatedi doosh tchakreh tu pre.

Amos 8:7

O baro Dewel, koles i Israelitarja sharenn, job das pes sowel un penas: An kek tsiro bistrau kau tchilatcho koowa, hoi le kran.

Jeremia 14:10

Jaake penas o baro Dewel kal menshendar: Jon nashenn jek rigjatar ap i wawar, jaake har kamenn le. Doleske dikell o baro Dewel gar latches ap lende. Leske well an o shero, hawo tchilatcho koowa jon kran. Un lengri doshake dell job len i phagi.

Jeremia 2:19

Dran tiro tchilatchepen well kowa ap tute. Tu shunal gar. Doleske leh tu sawi phagi. Tu hunte djiness un haiwess, hawo pharo koowa un duka ap koleste wenna, kai djal peskro baro Deblestar krik, un kamell lestar buder tchi te djinell. Kowa penell o baro Dewel, ko rai pral o bolepen un i phub.

Hebrearja 4:13

O Dewel dikella lauter. Tchi an mende hi khatedo glan leskre jaka. Lauter hi pre tchakedo glan leste. Un leske hunte penas mer halauter, hoi kram.

1. Korintarja 4:5

Dran kowa penau, ma penenn jekestar: Kowa krell peskri budi gar mishto. Kanna hi gar o tchatcho tsiro, te rakrenn jaake. Ap ko diwes, kai well maro rai Jesus pale, sikrell lo halauteren, hoi kanna khatedo hi. Un lauter, hoi an o dji dren hi, well palle diklo. Un palle well hakeno sharedo o Deblestar pal koi budi, hoi job kras.

Hosea 9:9

Tumaro tchilatcho koowa, hoi krenn, hi jaake djungelo har kowa, hoi was kerdo an o foro Gibea glan i rah tsiro. Doleske bistrell o baro Dewel gar tumari doosh un dell tumen tumari phagi.

Jeremia 32:19

Tu leh tuke baro koowa glan, un hoi kreh, hi sorelo. Un tire jakentsa dikeh i tsele dromma i menshendar, te dess hakenes pal kowa, har job djiwas un hoi lo kras.

Jeremia 16:17

Mire jaka dikenn halauter, hoi jon krenna. Jon nai khatrenn pen gar glan mande. Lengri doosh hi glan mire jaka tardo.

Jeremia 4:18

Hoi tumer kran un har djiwan, anas tumenge kowa dren. Kowa well dran tumaro tchilatchepen, te djal tumenge jaake djungelo, un djal tumenge an tumaro dji.

Jesaja 5:12

Jon mukenn penge mishto te djal un krenn bashepen ap dorjengre bashepangre un phurdepangre un wawar bashepangre. Un mool hi ninna pashel. Ap kowa, hoi o baro Dewel krell, dikenn le gar. Kolestar kamenn le tchi te djinell.

Debleskri gili 25:7

Biste miri doosh, hoi ap mande lom, har terno homs, un miro tchilatcho koowa! Kre mange tiro dji pre, miro baro Dewel!

Debleskri gili 9:16

I menshe an wawar themma, peran an koi cheb, hoi jon i win hadan. An koi netsa, hoi jon win tchiwan, tapran le pen kokres.

Hosea 8:13

Jon anenn mange viechen, un chan pen tchalo ap ko mass. Me, o baro Dewel, dikau gar latches koi pre. Lengri doosh bistrau me gar, un lengro tchilatchepen well pral lende: Jon hunte djan pale an o them Egiptia pale.

Jesaja 1:3

Haki grumni prindjrell koles, koneske joi hi. Un haki burika djinell koi platsa, kai lakro rai dell lat te chal. O Israel prindjrell kowa gar. Mire menshe haiwenn kowa gar.

Debleskri gili 50:22

Tumer, kai kamenn tchi mandar te djinell, haiwenn, hoi penom, te wap gar un dap tumen, un kek hi koi, kai lell tumen win dran miro wast.

Hiob 34:21

O Dewel lell hako koowa an o jak, hoi i mensho krell, un dikell les, kai lo ninna djal.

5. Mose 32:29

Har kamaus, te wans le gosewo! Palle haiwans le, hoi ap lende wella.

4. Mose 32:23

Te kamenn tumer kowa gar te krell, palle lenn i doosh ap tumende glan o baro Debleste. Un kowa dikenn tumer, te well koi phagi ap tumende.

Jesaja 44:19

Sawo mensho haiwell gar, hoi lo krell. Tchi djal an leskro shero, un kek goswepen hi an leste, jaake te penals lo peske: “O paash kolestar chatchrom an i jag, un ap koi jag pekom maro un mass, un chom les. Un ko wawar paash kolestar, krap i dewel, glan koleste me man tele ap i phub witsrap? Glan i kotar kasht?”

Jesaja 26:16

Baro Dewel, an o pharo tsiro rodan tire menshe tut. Har dal len i phagi, dan le darenes ap tute gole.

Jeremia 17:1

Tumer menshe an o them Juda, tumaro tchilatchepen hi dren tchinlo an tumare djia, un ap kol shinga ap kol chatchepangre, kai tumer viechen chatchrenn. Ko tchilatchepen hi jaake dren tchinlo, te nai krenn kowa gar buder krik, har te was kowa an o bar dren dino i sasteha, hoi les i diamantikro shero hi.

Jeremia 44:21

Ma patsenn, kai djinas o baro Dewel gar, hoi kran an i forja o themestar Juda un an i dromma o forestar Jerusalem, tumer un tumare phure, tumare bare raja, pralstune un i tsele menshe an o them! Kowa djas o baro Debleske an o dji,

Hosea 4:9

Doleske djal i rashajenge jaake har kol wawar Israelenge: Me dau tumen lauteren i phagi, un dau tumen pale pal kowa, hoi tumer kran.

Hosea 9:15

O baro Dewel penell: Lengro tselo tchilatchepen krenn le kote pash o foro Gilgal; kote choirom man pral lende ko tselo tchilatchepaske, hoi jon kran. Doleske tradau me len dran miro kheer win. Me kamau len buder gar. Lengre tsele pralstune mukenn pen tchi mandar te penell.

Hosea 12:2

O Efrajim kamell o ducho dren te taprell, un nashell o tato ducho palla, kai well kotar, kai o kham pre djal. Un hako diwes krell lo budeder chochepen un randepen. Jon tchiwenn pen o themeha Assur khetne, un anenn djet an o them Egiptia.

Jona 1:2

“Dja sik an o baro foro, hoi kharell Ninive, un de lakri doosh win gole. Lakro tchilatchepen was glan mande.”

Debleskri gili 10:11

An peskro dji penell lo peske: “O Dewel djinell kowa gar. Job das gar jak pre un dikell tchi.”

Ezekiel 21:29

Doleske penell o baro Dewel, maro rai: Tumari doosh was diklo. Tumare tchilatche dromma wan pre-tchakedo. An halauter, hoi krenna, well tumaro tchilatchepen diklo. Tumer kran, te well tumari doosh gar bistedo. Doleske wenn tapedo i sorelo wasteha.

Hosea 6:2

Pal dui diwessa dell lo men newo djipen, un ap o triinto diwes mukell lo men pale ap i pire tardo te well, te nai djiwas glan leste.