Hosea 2:1 - O Debleskro Drom 2021 (Sinte)

¹ Un i Israelitarja wenn jaake bud har i santa pash o baro pani hi. Kek nai penella, har bud kote tchiddo hi. His i tsiro, kai penas o Dewel ap lende: “Tumer han gar mire menshe.” Palle well i tsiro, kai ap lende penlo well: “Tumer tchawe o djido Deblestar!”

O Debleskro Lab 2024 (Sinte-Manouche)

¹ Oun i Israelitarya venn yaake boud har i santa pash o baro pani hi. Kek nay penella, har boud kote čiddo hi. His i tsiro, kay penas o Devel ap lende: “T'mer han gar mire menshe.” Palle vell i tsiro, kay ap lende penlo vell: “T'mer čave o djido Deblestar!”

Hosea 2:1 Referans Kwoze

1. Petro 2:10

Glan i rah tsiro hans tumer gar leskre menshe. Kanna han tumer o Debleskre menshe. Glan i rah tsiro djinan tumer gar, kai hi les i baro dji tumenge. Kanna kras lo peskro dji tumenge pre.

Hosea 2:23

An ko tsiro, penell o baro Dewel, kamau te shunell: Me shunau, hoi o bolepen mandar mangell, un o bolepen shunell, hoi i phub lestar mangell.

1. Timoteo 1:13

His i tsiro, kai rakrom djungeles pral leste, un lom i patslen palla, te marap len. An ko tsiro prindjrom les gar, un djinom gar, hoi me krom. Job kras mange peskro dji pre, un las man dran o tchilatchepen win.

2. Korintarja 4:1

O Debles hi i baro dji menge, un das men kai budi, te sikras i menshende leskro drom. Doleske wah gar khino, te kras kowa.

Zakarie 13:9

Un kolenge, kai pral atchenn, wenn phare tsirja, kai hunte djan le dren, te wenn le djudjo kerdo, jaake har rup un sonakai djudjo kerdo well an i jag. Palle denn le ap mande gole, un me shunau len. Me penau: ‘Jon hi mire menshe.’ Un jon penenn: ‘Tu baro Dewel, hal maro Dewel.’”

Ezekiel 37:27

Un me djiwau mank lende. Un me hom lengro Dewel, un jon hi mire menshe.

Ezekiel 36:28

Un tumer djiwenn an kau them, hoi dom tumare phurende, un han mire menshe, un me hom tumaro Dewel.

Ezekiel 11:20

Palle krenn le, hoi lendar kamau, un djiwenn pal mire tchatchepaskre laba. Un jon hi mire menshe, un me hom lengro Dewel.

Jeremia 32:38

Jon hi mire menshe, un me hom lengro Dewel.

Jeremia 31:33

Ko newo koowa, hoi palle i menshentsa Israel win krau, hi wawartchandes. Me dau len mire laba an lengre djia un an lengre sherja. Me wau lengro Dewel, un jon wenn mire menshe. Kawa penell o baro Dewel.

Hosea 2:2

Palle wenn i menshe dran o them Juda un i menshe dran o them Israel khetne. Un khetne rodenn le penge jek pralstunes win, te well lo o rai pral lende. Un jon djiwenna an o tselo them. Hawo baro diwes well ko diwes, kai djal jaake, har o lab Jesreel kharell!

Jeremia 51:5

I Babilonarja kran baro tchilatchepen ap o Israeleskro Debleste. O Israel un o Juda wan gar muklo pengro Deblestar, ko baro Deblestar, kai hi o rai pral o bolepen un i phub.

Ezekiel 36:11

Un me krau, te wenn i menshe un vieche bud ap tumende. Jon lenn bud tchawe. Un me krau te nai djiwenn i menshe kote jaake, har an i phure tsirja his. Un krau tumenge budeder latchepen har an kek tsiro glan kowa. Palle dikenn un haiwenn tumer, te hom me o baro Dewel.