Hosea 11:8 - O Debleskro Drom 2021 (Sinte)

⁸ Har nai mukaus me tutar, Efrajim, har nai daus tut an o wast kolendar, kai marenn tut, Israel? Kraus me tuha, har krom kol forjentsa Adma un Zebojim? Na-a, kowa phagals miro dji! Tu khaiteh man jaake!

O Debleskro Lab 2024 (Sinte-Manouche)

⁸ Har nay moukaus me toutar, Efrayim, har nay daus tout an o vast kolendar, kay marenn tout, Israel? Kraus me touha, har krom kol foryentsa Adma oun Seboyim? Na-a, kova phagals miro dji! Tou khayteh man yaake!

Hosea 11:8 Referans Kwoze

Jeremia 31:20

Efrajim, tu hal miro kutch tchawo, miro tchawo, koles kamau bud! Hako kopo, kai hunte dap les trad, well lo mange gar dran o shero. Miro dji dell soreles an mande: me hunte wap leske latches, penell o baro Dewel.

Mateo 23:37

Tumer menshe an o foro Jerusalem! Tumer maran o Debleskre rakepangren, un dan kolen i barrentsa mulo, kai o Dewel pash tumende bitchras. Bud kope kamom tumen pash mande te lell, te dap garda ap tumende, har i kachni ap peskre terne garda della, un lell len tel peskre phora. Un tumer kaman gar.

Hosea 6:4

Hoi te krap tuha, Efrajim? Hoi te krap tuha, Juda? Tumer mukenn man jaake sik har i wolka, hoi taissarlakro krik djal, un har ko pani, hoi ap o senlepen hi.

5. Mose 32:36

Tchatchepah o baro Dewel dell peskre menshende lengro tchatchepen. Te dikell lo, har leskre budepangre nashran pengri soor, khaitenn le les. Te dikell lo, har kek ap lengri rig hi, krell job peskro dji lenge pre.

5. Mose 29:23

Palle penenn i menshe dran i tsele wawar themma: “Hoske kras o baro Dewel kawa kau themeha? Hoske was lo jaake chojedo?”

Judas 1:7

Jaake lan ninna kol menshe i phagi, kai djiwan an i forja Sodom un Gomorra un an kol forja trul lende. Jon kran wi-ladjedo koowa har kol bolepangre un djan wawar mass palla. I phagi, hoi pral kol menshende was, sikrell mende, hoi kolenge djal, kai sawo koowa krenna. Jon djan an i jag, hoi hako tsiro chatchella.

2. Petro 2:6

Un o Debleskri choli was pral kol forja Sodom un Gomorra. Un job chatchras kol forja jaake te atchas tchi har barra un jagakri tchik. Jaake sikras job kolende, kai pal lende wenna, hoi djal kolentsa, kai gar ap leste shunenna.

Amos 4:11

His sawe forja pash tumende, kai krom jaake paash, har krom i forja Sodom un Gomorra paash. Un tumer hans har i kotar kasht, hoi was win tserdedo dran i jag. Ninna palle wan tumer gar pale pash mande, penell o baro Dewel.

Ropaskre gilja 1:20

Ach, baro Dewel, dik, har bud traash man hi, har i duk an mande chatchella! Miro dji rissrell pes an mande! Hoske shunom gar ap tute? Glan o kheer tapras o charo mire tchawen, un an o kheer meran le dran i djungelo nasslepen.

2. Rajengro liil 13:23

Un o baro Dewel his latcho ap i Israelende un kras peskro dji lenge pre un dikas kamles ap lende, jaake har job peskro lab das o Abrahameste, o Isaakeste un o Jakobeste. Un job das len gar an o merepen un witsras len gar pestar krik bis ap kau diwes.

2. Samuel 24:16

Har sikras ko bolepaskro peskro wasteha ap o foro Jerusalem, te well ko nasslepen koi, khaitas o baro Debles koi bibacht. Un job penas ap ko bolepaskro, kai anas o merepen pral i menshende: “Kanna hi doha! Le tiro wast lendar krik!” O Debleskro bolepaskro his tardo ap koi djobeskri platsa o murshestar Arauna. Kowa his i Jebusari.

Čačepangre 10:16

Un jon witsran kol wawar deblen pendar krik un mangan o baro Debles an. Koi khaitas les, te well o Israeleske jaake pharo kerdo.”

1. Mose 14:8

Kanna djan kol pantch raja pral i forja Sodom, Gomorra, Adma, Zebojim un Bela dran i forja win. Bela kharella kanna Zoar. Un jon djan pengre lurdentsa an i tala Siddim.

Debleskro tsiro 18:18

Kolla lauter dikan koi jag, hoi ko fores pre chatchras, un dan gole, un penan: “Kek foro his jaake shukar har kawa!”

Debleskro tsiro 11:8

Un kal mule mursha hi ap o drom tchiddo an ko baro foro, kai ninna lengro rai ap o trushel maredo was. Kau foro hi har o foro Sodom un har o them Egiptia.

Zefanja 2:9

Me, o baro Dewel, kai hom o rai pral o bolepen un i phub un o Israeleskro Dewel, me dau man sowel pash miro djipen: Ko diwes wella, kai djal kol themenge Moab un Ammon har i forjenge Sodom un Gomorra. Hako tsireske wenn kal themma i mulo them, kai loneskre grube hi, un diwjo senlepen bares wella. Kolla, kai mire menshendar djido atchan, jon randenn len win, un lenn penge ninna lengro them.

Amos 7:6

Koi khaitas ninna kowa o baro Debles. Un o baro Dewel, maro rai, penas: “Kowa te well gar jaake!”

Amos 7:3

Koi khaitas kowa o baro Debles, un job penas: “Mishto, kowa well gar jaake!”

Ropaskre gilja 3:33

Job hi gar bachtelo, te dell lo i menshes peskri phagi, un anell o ropen pral leste.

Jeremia 9:7

Lengro rakepen hi har faile, hoi anenn o merepen. Peskro mujeha rakrell hakeno kamles, an o dji lurell job, har te taprell lo o wawares.

Jeremia 3:12

Dja koi un de kol laba gole ap kolende, kai djiwenn an o norden un pen: “Tu Israel, kai djal mandar krik, am pale”, penas o baro Dewel. Palle kamau buder gar chojedo ap tumende te dikell. Man hi i dji tumenge, un kamau gar hako tsiro chojedo te well ap tumende.

Jesaja 63:15

Dik dran o bolepen tele, un dik tele dran tiro railo kheer! Kai hi tiro kamlepen, hoi menge chatchell? Kai hi tiri soor? Hi tut buder kek dji un kek latchepen menge?

Debleskri gili 106:45

palle was an leskro shero, hoi kras lo lentsa win, te hi lo lengro Dewel. Un an peskro baro latchepen khaitan le les.

1. Rajengro liil 3:26

Un koi djuwjake, kai lakro ternepen djiwas, chatchras lakro dji peskro tchaweske, un joi das gole ap o baro rajeste: “Miro rai, mangau tut, de lat ko ternepen djides, un mare les gar!” Koi wawar penas: “Na-a, job te well gar miro, witar gar tiro. Tchinenn les an dui kotja!”

Jesaja 16:11

Doleske rowell miro dji pral i menshende an o them Moab. Lauter an mande trissell o foreske Kir-Heres.

Jeremia 18:8

Te mukenn jon palle pengro tchilatcho koowa, khaitell man kowa, kai dom len trad, te well bibacht pral lende.

Jeremia 42:10

Te atchenn tumer an kau them, palle mukau me tumen pale bares te well, un me phagau tumen gar khetne; me krau tumen soreles, un tradau tumen gar win dran o them; man khaitell, kai hunte anom sawi bibacht pral tumende.

Ropaskre gilja 3:32

Ninna te dukell lo jekes, well lo leske pale kamles. Jaake baro hi leskro latchepen.

Ezekiel 6:9

Kote, kai le pandle hi, wau me lenge an o shero. Un jon dikenn dren, te dom len i phagi koleske, hoi jon kran: Jon phagan mantsa un nashan chochene deblen palla. Palle rissrell lenge halauter an pende pral ko tselo djungelo koowa, hoi jon kran.

Ezekiel 33:11

Pen ap lende: O baro Dewel, maro rai penell: Me dau man sowel pash miro djipen: Mange hi gar shukar, te merell o tchilatcho mensho. Na-a me kamaus, te djal lo peskro tchilatcho dromestar tele, un djiwell lo! Doleske, djan tele tumare tchilatche dromendar! Hoske kamenn tumer te merell, tumer dran o kheer Israel?

Hosea 7:1

Hako kopo, kai kamau mire menshenge lauter pale mishto te krell, palle sikrell pes, hawi doosh o Efrajim ap peste anas, un har baro o tchilatchepen kol menshendar an o foro Samaria hi. Jon hi chochepangre. Tchorepangre phagenn an i khera dren. Un randepangre tchorenn i menshen win ap o drom.

Micha 5:3

Un job, ko newo rai, dell garda ap lende, har i bakrengro garda dell ap peskre bakren. Leskro Dewel bitchras les, un leskri soor well lestar, o baro Deblestar. An ko tsiro djal leskro railepen un leskri soor jaake dur har i phub hi. Un i menshe an leskro them nai djiwenn kek darjah.

5. Mose 29:22

Jon dikenn: O them hi chatchedo, i phub pherdo loon un shwefla. Lauter dikell win har i forja Sodom un Gomorra, Adma un Zebojim, har o baro Debleskri bari choli ap lende was un jon chatchedo wan. Kek nai witsrell djob an i phub. Tchi well bares. Kek senlepen djal pre.

2. Familjakro liil 36:15

Un o baro Dewel, lengro phurengro Dewel, bitchras bud bitchepangren pash lende, te dell lo len trad. Les khaitan peskre menshen un peskro kheer.

Jeremia 9:6

Doleske penell o baro Dewel, ko rai pral o bolepen un i phub: Har o rup an i jag djudjes kerdo well, jaake kamau mire menshen dukentsa djudjes te krell. Dell tchi wawares, hoi krap me nai mire menshenge.