Hiob 42:8 - O Debleskro Drom 2021 (Sinte)

⁸ Kanna lenn efta terne gurma un efta bakre un djan pash o Hiob, un marenn kol viechen kote, un chatchrenn len mange! Un o Hiob, koles miro tchatcho wast hi, hunte mangell man tumenge. Ap koleste shunau un krau tumentsa gar, har hunte kroms. Tumer rakran gar o tchatchepen pral mande har job kras.”

O Debleskro Lab 2024 (Sinte-Manouche)

⁸ Kanna lenn efta terne gourma oun efta bakre oun djan pash o Hiob, oun marenn kol firhen kote, oun rhačrenn len mange! Oun o Hiob, koles miro čačo vast hi, hounte mangell man t'menge. Ap koleste shounau oun krau t'mentsa gar, har hounte kroms. T'mer rakran gar o čačepen pral mande har yob kras.”

Hiob 42:8 Referans Kwoze

4. Mose 23:1

O Bileam penas ap o Balak: “Muk kate ap efta platse barra pre te tchiwell, kai nai chatchrau viechen o Debleske, un an mange efta terne gurma un efta bakre!”

Jakobo 5:16

Doleske penenn tumenge tumari doosh, un mangenn o Debles jek o wawareske, te wenn tumer sasto. I mensho, kai djiwell jaake, har o Dewel kamella, job te mangell i tselo djijeha tchomone o Deblestar, nai krell o Dewel bud leske.

1. Familjakro liil 15:26

Un o Dewel his i Levitarentsa, kai o mochton hidjrenn, kai o baro Debleskre deesh laba dren hi, un lauter djas mishto. Doleske maran le leske efta terne gurma un efta mursh bakre.

Debleskri gili 103:10

Job dell men gar i phagi pal kowa, hoi kram, un dell men maro tchilatchepen gar pale.

Hiob 22:30

Ninna koles, kai doosh ap peste hi, lell lo dran o merepen win, dran kowa, kai tu kek tchilatchepen kreh.

Ezekiel 14:14

Ninna te wans kal triin mursha an ko them, o Noah, o Daniel un o Hiob, palle lans jon kokres pengro djipen dran o merepen win, kek wawar lentsa. Jon djiwan an o tchatchepen. Doleske loms len kokres dran o merepen win. Kawa penau me o baro Dewel, tumaro rai.

1. Mose 20:17

Har o Abimelech o Abrahameskri romjat las, kras o baro Dewel, kai kek djuwel an o Abimelecheskro kheer i ternepen lella. Un kanna mangas o Abraham o Debles lenge. Un o Dewel kras o Abimeleches sasto un leskri romjat un i djuwjen, kai leske budran, jaake, te lan le pale tchawe.

Jakobo 5:14

Te hi jek tumendar nasselo, kharell lo kolen, kai hi i phureder mank i patslende, te mangenn le o Debles leske, un te makenn le les o djeteha dren an o Jesuseskro lab.

Mateo 3:17

Un i rakepen dran o bolepen penas: “Kawa hi miro tchawo, koles me kamau. Pral leste hom me bachtelo.”

Hiob 42:9

Kote djas o Elifas peskre dui malentsa, o Bildad dran Shuach un o Zofar dran Naama, pash o Hiob, un jon kran, hoi o baro Dewel lenge penas. Un o baro Dewel shunas ap kowa, hoi o Hiob lestar mangas.

4. Mose 23:29

Un o Bileam penas ap o Balak: “Kre mange kate efta chatchepangre, un an mange kate efta terne gurma un efta bakre!”

Debleskro tsiro 3:9

Shunenn, hoi me kol bengeskre menshentsa krau, kai chochenn un penenn pendar, te hi le o Debleskre menshe, un jon hi kek Debleskre menshe. Me krau, te wenn le pash tumende, te witsrenn le pen glan tumende ap i phub, un te haiwenn le, te kamau tumen o tselo djijestar.

1. Johanni 5:16

Te dikeh tu, te kras i wawar patslo i tchilatcho koowa, palle hunte mangess tu o Debles leske! Un o Dewel dell les o djipen. Della ninna i doosh, hoi anell an o merepen. Un me penau gar, te mangess tu o Debles kolenge, kai koi doosh ap pende lan.

1. Johanni 5:6

O Jesus Kristo was pash mende. Job was taufedo an o pani un meras ap o trushel. Har meras lo, ratas lo peskro rat. Hi gar kokres leskro thopen an o pani, na-a, ninna leskro rat sikrell mende, kai job o Debleskro tchawo hi. Un o Debleskro Ducho penell menge kowa ninna. Un o Debleskro Ducho penell o tchatchepen.

Ezekiel 45:23

Un an kol efta diwessa, anell lo hako diwes efta terne saste gurma, un efta saste mursh bakre, te wenn le maredo un tseles chatchedo o baro Debleske, un koi pashel hako diwes jek mursh busni, te well i doosh un o pale-tchiddo koowa krik lino.

Hiob 1:5

Un har kol diwessa trujel his, kai le chan un pijan, palle bitchras o Hiob pash lende, te wenn le pash leste. Un job stas sik taissarlakro pre, un maras hakeneske lendar i viecho, un chatchras les o Debleske, te well lengri doosh krik lino. Job penas peske: Nai djals, te lan mire mursh tchawe doosh ap pende, un rakran djungeles pral o Debleste an pengre djia. Un jaake kras o Hiob pal hako baro chapen, hoi leskre mursh tchawe kran.

2. Familjakro liil 29:21

Un jon anan efta terne gurma, un efta mursh bakre un efta terne bakre un efta mursh busja, te marenn un chatchrenn le len o baro Debleske, te nai well i doosh krik lino o rajeskro kherestar, un o Debleskro kherestar un i tsele menshendar an o them Juda. Un o Hiskija penas ap i rashajende dran o kheer Aron, te chatchrenn le i viechen ap i chatchepaskri o baro Debleske.

1. Samuel 25:35

Un o David las lauter dran lakro wast, hoi joi leske anas, un penas ap late: “Dja pale khere un ma dare! Kowa, hoi tu mandar mangal, krau me jaake.”

4. Mose 23:14

Un job anas les pash i phub, hoi kharella ‘dur dikepen’, ap koi berga Pisga, un kras efta chatchepangre, un chatchras ap haki chatchepaskri o Debleske i terno gurum un i bakro.

2. Mose 18:12

Un o Jetro las i viecho, hoi job o Debleske maras un tseles chatchras, un ninna wawar vieche, hoi job maras, te chan le len khetne glan o Debleste. Un o Aron un i tsele phureder dran Israel wan un chan khetne o Moseskri romjakro dadeha kote, kai jon o Debles an-mangan.

Hebrearja 10:4

Della kek drom, kai lell nai o grumjengro rat un o bakrengro rat i doosh i menshendar krik.

2. Timoteo 4:14

O Alexandro, kowa, kai budrell i sasteha, kras mange bud tchilatchepen. O rai Jesus rakrell i phagi pral leste win pal kowa, hoi job kras.

Jeremia 15:1

Un o baro Dewel penas ap mande: Ninna te wals o Mose un o Samuel glan mande tardo, kroms me kal menshenge miro dji gar pre. Trade len krik mandar, un muk len te djal!

Jeremia 14:11

Un o baro Dewel penas ap mande: Tu mangess gar kal menshenge, te wap latches ap lende.

Jesaja 60:14

Un i tchawe kolendar, kai rikran tut tele, wenn pash tute, un tchiwenn pen glan tute tele. Un kolla, kai praassan tut, witsrenn pen glan tire herja an i tchik. Un jon kharenn tut ‘foro o baro Deblestar’, un ‘Zion, o foro o Israeleskro Deblestar’.

Hebrearja 7:25

Doleske nai krell lo, te djal kek kolendar nashedo, koon job pash o Debleste anas. Job djiwell hako tsireske, un mangell o Debles lenge.

Efesarja 1:6

te sharas mer leskro baro latchepen. Job his jaake latcho ap mende, te das lo peskro kamlo tchawes menge!

1. Mose 20:7

Un kanna, de koi romjat pale o romeste! Job hi i Debleskro rakepaskro. Un te mangell o Abraham tuke, atcheh tu djido. Te deh lat gar pale, hunte meress un lauter, hoi tiro hi.”

Hiob 1:8

Un o baro Dewel putchas o bengestar: “Dal tu ninna jak ap miro budepaskro, o Hiob? Kek wawar hi ap i phub, kai hi jaake har kowa. Job hi an o tchatchepen tardo, un kek doosh hi ap leste. Job mangell man an, un rikrell pes dur krik o tchilatchepastar.”

Hiob 35:8

Kolla hi i wawar menshe, kolenge kowa djungeles hi, te kreh tchilatcho koowa, un kolenge kowa latcho hi, te kreh latcho koowa.