Haggai 1:11 - O Debleskro Drom 2021 (Sinte)

¹¹ Doleske penom, te well kek brishin pral tumaro them, pral i berge, pral o them, kai o djob, i drake un i djeteskre ruka bares wenna, un pral halauter, hoi dran i phub well, ninna pral i menshende un i viechende. Kowa, hoi tumare wastentsa krenn, djal tumenge buder gar mishto.

O Debleskro Lab 2024 (Sinte-Manouche)

¹¹ Doleske penom, te vell kek brishin pral t'maro them, pral i berge, pral o them, kay o djob, i drake oun i djeteskre rouka bares venna, oun pral halauter, hoy dran i phoub vell, ninna pral i menshende oun i firhende. Kova, hoy t'mare vastentsa krenn, djal t'menge bouder gar mishto.

Haggai 1:11 Referans Kwoze

Haggai 2:17

Me rikrom o brishin pale, tumaro djob meras tele, brishineskre barra mukom ap tumari hachetikri phub te perell. Pal ko tselo koowa wan tumer gar pale pash mande, un mangan tumen gar tele pash mande.

5. Mose 28:22

Job bitchrell tumen sawo nasslepen, hoi chal tumen pre, tumaro mass well lolo un tato, un i fibro chatchell an tumende. Un job rikrell o brishin pale an tumaro them. Un i tato ducho krell, te well o djob nasselo un merell tele. Un kowa halauter well pral tumende bis te mulo han.

2. Rajengro liil 8:1

O Elisa rakras kol djuwjah, kai kras lo lakro tchawes djido, un penas: “Dja krik tire menshentsa an i wawar them, te djiwess koi! O baro Dewel mukell i tsiro te well an kau them, kai bokenn i menshe efta bersha.”

1. Rajengro liil 17:1

O Elija dran o gab Tishbe an o them Gilead penas ap o Ahab: “Me penau tuke an o lab o baro Deblestar, kai o Israeleskro djido Dewel hi, glan koleste hom me tardo: An kol bersha, hoi kanna wenna, dell kek brishin, witar gar djal i sapeno ducho pre dran i phub, bis te penau me kowa.”

Amos 9:6

Job hi kowa, kai krell peskro kheer an o bolepen, un tchiwell peskro bolepaskro kheer pral i phub. Job dell o pani win gole dran o baro pani, un tchorell les ap i phub. Leskro lab hi ‘baro Dewel’.

Amos 7:4

Palle mukas man o baro Dewel, maro rai, i wawar dikepen te dikell: Job das i baro tatepen gole, te dell lo i menshen i phagi. Un o tatepen chas o baro pani pre, hoi tel i phub hi, un kamas o them pre te chatchrell.

Amos 5:8

O baro Dewel kras o bolepangre momlia, kol momlia, hoi sikrenn: o wend well un i nijal well. Dran i rat krell job o diwes, un dran o diwes i rat. Dran o baro pani lell job o pani un tchorell les ap i phub. Job kharell ‘Baro Dewel’.

Ropaskre gilja 1:21

I menshe shunan, har dau phares ducho, un kek well, te penell lo mange latche laba. Kolla, kai hi chojedo ap mande, shunan miri bibachtjatar, un sanan, te kral tu kowa mantsa. Muk ko diwes te well, kolestar rakral, te djal lenge har mange kanna.

Hiob 34:29

Te rikrell pes o Dewel pale, nai penell kek leske: ‘Tu anal doosh ap tute!’ Te khatrell lo pes, nai dikell les kek. Hoi nai krenn i menshe, hoi nai krell i natsjona,

Jeremia 14:2

O them Juda hi bibachtelo koi tchiddo. I menshe an i forja merenna i bokatar. Lenge hi ropaske un jon beshenn pen ap i phub. Un an Jerusalem denn le i wasta pral o shero khetne.

Maleachi 3:9

Doleske han praassedo! Halauter tumendar tchoran mandar.

Maleachi 3:11

Un me rikrau i stepangren dur krik tumari phubjatar, te chan le gar kowa pre, hoi kote baro was. Un tumare drakengre ruka wenn pherde drake. Ko penell o baro Dewel, ko rai pral o bolepen un i phub.

Haggai 2:19

An tumare djobengre khera atchell doha djob. I drakengre ruka hidjrenn pale drake, i faigetikre ruka hidjrenn faige, i granatikre phabjengre ruka hidjrenn phabja, un i djeteskre ruka hidjrenn djeteskre drake. Kau diwesseha tchiwau miri bacht un miri soor ap tumaro them.