Efesarja 6:17 - O Debleskro Drom 2021 (Sinte)

¹⁷ Ma bistrenn, te las tumen o Jesus Kristo dran o tchilatchepen un o merepen win! Kowa hi tumenge har i sasterni stadi ap tumaro shero. Lenn ninna o Debleskro lab an tumaro wast. Kowa hi har i charo, hoi dell tumen o Debleskro Ducho.

O Debleskro Lab 2024 (Sinte-Manouche)

¹⁷ Ma bistrenn, te las t'men o Yezous Kristo dran o čilačepen oun o merepen vin! Kova hi t'menge har i sasterni stadi ap t'maro shero. Lenn ninna o Debleskro lab an t'maro vast. Kova hi har i rharo, hoy dell t'men o Debleskro Dourho.

Efesarja 6:17 Referans Kwoze

Hebrearja 4:12

O Debleskro lab hi djido un sorelo, un tchinell sorleder har i charo, hoi tchinell ap dui rigja. Jaake har tchinell i charo dur dren an o mass, ninna an i kokale, jaake tchinell o Debleskro lab dur dren an o mensheskro dji, un sikrell leste, hoi hi latcho un tchilatcho an leskro djipen.

Jesaja 59:17

Un jaake har riwell i lurdo i sasterno gad an, jaake riwell job o tchatchepen an. Un jaake har i lurdo i sasterni stadi ap peskro shero tchiwell, jaake tchiwell job o kurepaskri bacht ap peste. Leskri choli hi har i plaashka ap leste, te dell lo kolende pengri phagi, kai i wawarenge tchilatchepen kran.

Debleskro tsiro 19:15

Un dran leskro mui well i charo win, hoi latches tchinella. Koleha kurell lo pes i menshentsa an i tsele themma, un well sorleder har jon. Job anell len i sasterno wasteha. Jaake har jek i drake paash stakrella, te well i mool win, jaake stakrell lo kolen paash, kai gar ap leste shunenna, un anell i choli o sorelo Deblestar ap lende.

1. Tessalonikarja 5:8

Mer djiwah ap o diwes. Doleske das jak, har te djiwas! Jaake har i kurepaskro riwell i sasterno gad ap peste, te nai dukrell les kek, jaake riwas mer o patsepen un o kamlepen ap mende har i ripen. I kurepaskro tchiwell ninna i sasterni stadi ap peskro shero, te dukrell les kek ap leskro shero. Jaake nai dukrell men kek, te dikah mer ap o Jesus Kristeste, un djinah soreles, te lell men o Jesus Kristo dran o tchilatchepen un o merepen win.

Jesaja 49:2

Job kras miro rakepen har i charo, hoi mishto tchinell, un khatras man tel peskro wast. Un job kras mandar i failo, hoi dell mishto tchurje, un rikrell man khatedo har i faile an lengri possita.

Debleskro tsiro 2:16

Krenn kanna ko tchilatcho koowa buder gar! Te mukenn tumer kowa gar, palle wau an i tikno tsiro, un tchingrau ap kolende, kai shunan gar ap mande. Un miro rakepen tchinella har i charo.

Debleskro tsiro 12:11

Mare phrala his sorleder har ko phukepaskro. O terno bakro, hoi maredo was, kowa thowas lengri doosh peskro rateha tele. Mare phrala sikran i menshende o tchatcho drom pash o Debleste, ninna te wan le doleske maredo.

Hosea 6:5

Doleske bitchrom tumenge mire rakepangre. Un lengro rakepah dau me tumen khetne, un marau tumen mire labentsa, hoi wenn dran miro mui. Miro tchatchepen well glan har o kham.

Debleskro tsiro 1:16

Un an leskro tchatcho wast his les efta bolepangre momlia. Un dran leskro mui was i charo, hoi ap dui rigja nai tchinella. Un leskro mui his har o kham.

Mateo 4:4

Penas o Jesus: “An o Debleskro lab hi tchinlo: O maro kokres rikrell i menshes gar djido. Job djiwell dran hako lab, hoi o Dewel rakrella.”

Mateo 4:7

Penas o Jesus: “Ninna hi an o Debleskro lab tchinlo: Rike o Debles gar dineleske, te sikrell lo tut har sorelo job hi.”

1. Samuel 17:5

Les his i sasterni stadi ap leskro shero. Un ninna ko gad ap leste his dran tikne kotja saster kerdo, un his shob-desha (60) kilogramme pharo.

1. Samuel 17:58

Un o Saul putchas lestar: “Koneskro tchawo hal tu, terno mursh?” Un o David penas: “Me hom o tchawo tiro budepaskrestar, o Isai, dran Betlehem.”

2. Samuel 22:36

Baro Dewel, tu rikreh tiro wast pral mande, te dukrell man kek. Tu dikeh latches ap mande un kreh man bares.

Zakarie 4:6

“Kol efta momlia hi o baro Debleskre jaka, hoi lauter dikenn, hoi ap i phub djala.”

Efesarja 5:26

te wenn le erligo un djudjo glan leste. Job thowas lengri doosh lendar tele, har patsan le leskro lab, un wan leske an o pani thodo.