Efesarja 6:14 - O Debleskro Drom 2021 (Sinte)

¹⁴ Awenn jaake rido har i kurepaskro, kai djal an o kurepen! Trul leskro per hi i pessi soreli dori, un ap leskro betch i sasterno gad. Ap peskre pire riwell lo sorele kircha. Glan leste rikrell lo i buchli sasterni patri. Ap leskro shero hidjrell lo i sasterni stadi un an leskro tchatcho wast i charo. Djiwenn an o tchatchepen! Kowa hi jaake har te pandan i pessi soreli dori trul tumaro per. Krenn kowa, hoi hi mishto un latcho! Kowa hi har i sasterno gad ap tumaro betch.

O Debleskro Lab 2024 (Sinte-Manouche)

¹⁴ Avenn yaake rido har i kourepaskro, kay djal an o kourepen! Troul leskro per hi i pessi zoreli dori, oun ap leskro beč i sasterno gad. Ap peskre pire rivell lo zorele kirrha. Glan leste rikrell lo i bourhli sasterni patri. Ap leskro shero hidjrell lo i sasterni stadi oun an leskro čačo vast i rharo. Djivenn an o čačepen! Kova hi yaake har te pandan i pessi zoreli dori troul t'maro per. Krenn kova, hoy hi mishto oun lačo! Kova hi har i sasterno gad ap t'maro beč.

Efesarja 6:14 Referans Kwoze

Jesaja 59:17

Un jaake har riwell i lurdo i sasterno gad an, jaake riwell job o tchatchepen an. Un jaake har i lurdo i sasterni stadi ap peskro shero tchiwell, jaake tchiwell job o kurepaskri bacht ap peste. Leskri choli hi har i plaashka ap leste, te dell lo kolende pengri phagi, kai i wawarenge tchilatchepen kran.

1. Tessalonikarja 5:8

Mer djiwah ap o diwes. Doleske das jak, har te djiwas! Jaake har i kurepaskro riwell i sasterno gad ap peste, te nai dukrell les kek, jaake riwas mer o patsepen un o kamlepen ap mende har i ripen. I kurepaskro tchiwell ninna i sasterni stadi ap peskro shero, te dukrell les kek ap leskro shero. Jaake nai dukrell men kek, te dikah mer ap o Jesus Kristeste, un djinah soreles, te lell men o Jesus Kristo dran o tchilatchepen un o merepen win.

Jesaja 11:5

Hako tsiro krell lo o tchatchepen. Hako tsiro penell lo, hoi tchatcho hi. Doleske hi o tchatchepen trul leste har i pereskri dori trul i ripen.

Louka 12:35

“Awenn hako tsiro mange koi! Un mukenn gar tumari momeli win te djal!

1. Petro 1:13

Doleske awenn gar khino an tumare djia, un denn garda, te atchenn ap o Debleskro drom! Dikenn ap ko baro latchepen, hoi o Dewel dell tumen ap ko diwes, kai well o Jesus Kristo pale.

2. Korintarja 6:7

Mer penah i menshenge o Debleskro tchatchepen un rakrah dran leskri soor. Kowa, hoi krah un rakrah, hi tchatcho. Jaake hi maro djipen un maro rakepen har i charo, koleha i kurepaskro kurell pes peskro rajeske.

Efesarja 5:9

Lauter kolla, kai ap leskro drom djana, krenn kowa, hoi latcho un tchatcho hi, un penenn o tchatchepen.

Debleskro tsiro 9:17

Un me dikom kol grajen un kolen, kai ap lende klissenna. Kolengre sasterne gada his lolo har i jag un blaueto un djelto. I grajen his shere har bare diwje margodja. Un dran lengre muja was jag un khand, hoi marella.

Debleskro tsiro 9:9

Un ap lengro betch his len sasterne gada. Un koi gole, hoi lengre mussja kran, his har koi gole, hoi bud wurdja pengre grajentsa krenn, kai an o kurepen nashenna.

Hiob 29:14

Hako tsiro krom, hoi tchatcho hi. Un miro tchatchepen his ap mande, har te wals lo miro ripen un miri stadi.

Remarja 13:12

Kau tsiro kanna hi har i rati. Sik hi i rati buder gar kai. Un o diwes wella. Dran kowa djiwas gar har i menshe, kai djiwenn an i rati. Te kras buder gar tchilatcho koowa! Kanna hunte kras mer kowa, hoi mishto hi, te well o tchilatchepen gar o rai pral mende.

Efesarja 6:13

Doleske riwenn kol koola ap tumende, hoi dell tumen o Dewel, te kurenn tumen mishto ap ko diwes, kai well o beng ap tumende. Palle han sorleder har job, un atchenn soreles tardo.

2. Rajengro liil 3:21

Har i Moabarja shunan, kai kol triin bare raja pengre lurdentsa pre wan, te kurenn le pen lentsa, dan jon i tsele murshen khetne gole, kai phuro doha his, kai nai djan an o kurepen, un anan len pash i themeskri rig, kai o them Israel well.