Efesarja 4:32 - O Debleskro Drom 2021 (Sinte)

³² Awenn kamlo jek ap o wawareste, un lenn i dji o wawareske! Bistrenn o tchilatchepen, hoi o wawar ap tumende kras! Ninna o Dewel bistras tumaro tchilatchepen, har o Jesus Kristo tumenge meras.

O Debleskro Lab 2024 (Sinte-Manouche)

³² Avenn kamlo yek ap o vavareste, oun lenn i dji o vavareske! Bistrenn o čilačepen, hoy o vavar ap t'mende kras! Ninna o Devel bistras t'maro čilačepen, har o Yezous Kristo t'menge meras.

Efesarja 4:32 Referans Kwoze

Markus 11:25

Un te han tumer tardo un mangenn tchomone o Deblestar, bistrenn ko tchilatcho koowa, hoi i wawar ap tumende kras, te bistrell tumaro dad an o bolepen ninna ko tchilatcho koowa, hoi tumer kran.

2. Korintarja 2:10

Te bistrenn tumer o tchilatchepen, hoi o wawar ap tumende kras, palle bistrau me kowa ninna. Awa, te dals tchomone, hoi hunte bistroms me, palle bistrom me kowa tumenge. Kowa djinell o Jesus Kristo.

Efesarja 5:1

Tumer han o Debleskre tchawe. Un job kamell tumen i tselo djijeha. Doleske krenn lauter jaake, har o Dewel kowa krella,

Louka 6:35

Me penau tumenge: Awenn latches kolenge, kai hi tchilatcho ap tumende! Krenn kolenge latchepen! Patsenn tumare lowe win ap kolende, kai tumer gar djinenna, te lenn tumer lendar tchomone pale! Te krenna tumer kowa lauter, palle dell o Dewel tumen peskro brawlepen an o bolepen, un tumer wenn o baro Debleskre tchawe. O Dewel hi ninna latches ap kol menshende, kai tchilatche hi, un kai parkrenn pen gar pash leste.

Louka 6:37

Ma sikrenn ap o wawareskri doosh! Un o Dewel dikell gar ap tumari doosh. Ma penenn: Kowa hunte lell i phagi! Un o Dewel dell tumen kek phagi. Bistrenn ko tchilatchepen, hoi i wawar menshe ap tumende kran. Un o Dewel bistrell ko tchilatchepen, hoi tumer kran.

1. Korintarja 13:4

Kones hi o Debleskro kamlepen an o dji, kowa rikrella lauter win. Job hi latcho un silwerella gar. Job krell pes gar bares un sharell pes gar.

Louka 17:4

Te krell lo efta kope ap o diwes tchilatcho koowa ap tute, un te well lo efta kope pash tute un penella, kai les kowa khaitella, jaake ab buder gar chojedo ap leste!”

Mateo 6:12

Un biste mari doosh, hoi mer ap mende anam! Un ninna mer bistrah o tchilatchepen, hoi i wawar ap mende kran.

Debleskri gili 145:9

O baro Dewel hi latches ap hakeneste. Un krell peskro dji pre halauterenge, kolen job kras.

1. Johanni 2:12

Tchowale, me tchinau tumenge kau lab, te bistrenn tumer gar, kai o Jesus Kristo meras tumenge. O Dewel las tumari doosh tumendar.

Remarja 12:10

Kamenn i phralen un i phenjen o tselo djijestar! Hakeno hunte rikrell o wawares bareder har pes kokres.

1. Johanni 1:9

Mer te mangah men tele glan o Debleste, un penah leske, hawi doosh mer ap mende lam, palle krell lo, hoi job penas un lell i doosh mendar krik. Job hi latcho un tchatcho un thowell o tselo tchilatchepen mendar tele.

2. Korintarja 2:7

Kanna hunte bistrenn ko koowa, hoi job kras. Rakrenn latches leha, te well leske gar buder ropaske.

Jakobo 5:11

Kolla hi tchatchepah bachtelo, kai rikran soreles ap o Debleste. Tumer shunan, har rikras pes o Hiob soreles ap o Debleste, un tumer djinenna, hawo brawlepen o Dewel les lauter das. O Debles hi i baro dji i menshenge un hi lenge latches.

2. Korintarja 6:6

Maro djipen sikrella, te ham o Debleskre budepangre. Mer djiwah i djudjo djipen un djinah, hoi o Dewel kamella. Mer wah gar khino an mare djia, ham kamlo, un krah, hoi o Debleskro Ducho menge penella. Un an maro kamlepen hi kek chochepen.

Louka 11:4

Un biste maro tchilatchepen, hoi mer kram! Un ninna mer bistrah o tchilatchepen, hoi i wawar ap mende kran. Ma muk men tiro dromestar tele te djal!”

Louka 1:78

Maro Debles hi i baro dji menge. Leskro kamlepen well pash mende. Kowa hi har o kham, hoi djal pre ap o bolepen,

Jesaja 57:1

O baro Dewel penell: Kowa, kai an o tchatchepen tardo his, meras. Un kek lell kowa an peskro dji. Un kolla, kai rikran ap mande, nashran pengro djipen. Un halauter krenna, har te wals kowa gar lengro koowa. Tchatchepah, ko tchatcho mensho was win lino dran o tselo tchilatchepen un bibacht.

Gosewe laba 19:22

Kowa, hoi i mensho rodell, hi kamlepen. Hi feteder te hal tchorwelo har te wals i chocheno.

Gosewe laba 12:10

Kowa, kai an o tchatchepen tardo hi, les hi i dji peskre viechenge. I tchilatchen hi kek dji lenge.

Debleskri gili 112:9

Job dell bud i tchorwelen. Leskro tchatchepen atchell hako tsireske. Leskri soor un leskro railepen well baro.

Ruth 2:20

Kote penas i Naomi ap i Rut: “O baro Dewel mu tchiwell peskri bacht ap leste! O baro Dewel tserdas peskro latchepen gar pale, – gar i djidendar, witar gar i mulendar.” Un pale penas i Naomi ap late: “Tu hunte djiness, ko mursh hi jek mare menshendar. Job hi jek kolendar, kai pal maro tchatchepen menge ap i rig hunte wenn.”

2. Petro 1:7

Koon o Debles kamella, koles hi ninna i dji peskre phralenge un phenjenge. Kones i dji hi peskre phralenge un phenjenge, kowa kamell ninna i tsele menshen ap kai phub.

Bičepangre 28:2

Kolla, kai kote djiwan, lan men kamles pre. Brishin das, un his shila. Doleske kran le i jag, un lan men pash pende.

2. Samuel 7:21

Pal tiro lab un pal tiro dji kral tu ko tselo baro koowa, un penal kowa mange, tiro budepaskro.

Gosewe laba 19:11

Koles tchatcho goswepen hi an o dji, kowa well gar sik chojedo, un dikell gar ap i doosh i wawarendar. Doleske dikenn le pre ap leste.

Jeremia 38:12

Un o Ebed-Melech, penas ap o Jeremia: Tchip kal phure kotja plachte tel tire mussja, te tchinell tut gar koi dori an i mass; kowa kras o Jeremia.