Daniel 9:24 - O Debleskro Drom 2021 (Sinte)

²⁴ Efta kope efta-deesh (70) bersha hi ko tsiro, hoi o Dewel peske glan tchiwas, te well o tchilatchepen un i doosh krik lino tire menshendar un dran o Debleskro foro. Palle well i phagi krik lino un ko tchatchepen well, hoi hako tsiro atchella. Un kowa, hoi an o dikepen diklo was, well tchatcho, ninna kowa, hoi o Debleskre rakepangre glan-wi penan. Un o Debleskro kheer well pale newes o Debleste dino.

O Debleskro Lab 2024 (Sinte-Manouche)

²⁴ Efta kope efta-deesh (70) bersha hi ko tsiro, hoy o Devel peske glan čivas, te vell o čilačepen oun i doosh krik lino tire menshendar oun dran o Debleskro foro. Palle vell i phagi krik lino oun ko čačepen vell, hoy hako tsiro ačella. Oun kova, hoy an o dikepen diklo vas, vell čačo, ninna kova, hoy o Debleskre rakepangre glan-vi penan. Oun o Debleskro kheer vell pale neves o Debleste dino.

Daniel 9:24 Referans Kwoze

Remarja 5:10

Dikenn! Ap ko tsiro, kai kamam o Deblestar tchi te djinell, meras o Debleskro tchawo menge. Leskro merepen anas men pash o Debleste, te djiwas pale leha khetne. Un kanna ham o Debleskre mala. Un leskro tchawo djiwella, te djas mer gar nashedo.

Jesaja 61:1

O baro Debleskro ducho hi ap mande. O baro Dewel rodas man win un bitchras man, te penap i tchorwelenge o latcho lab. te krap i phagede djia sasto, te penap i pandlen, te hi le buder gar pandlo, un penap i stilden, te nai djan le win dran o stilepen.

4. Mose 14:34

Star-deesh diwessa dikan tumen trujel, har ko them hi, un star-deesh bersha hunte hidjrenn tumari doosh: jek bersh hako diweske, te haiwenn tumer har kowa hi, te tserdau miro wast tumendar krik.

3. Mose 25:8

Ap ko tsiro, kai rikran efta kope ko Debleskro bersh dren, kowa hi pal 49 (star-deesh-te-enja) bersha,

Bičepangre 3:22

O Mose penas: I Debleskro rakepaskro har me hom, sawes bitchrell o Dewel pash tumende. Kowa hi jek tumare menshendar. Shunenn ap hako lab, hoi job tumenge penella!

Jesaja 56:1

Kawa penell o baro Dewel: Djiwenn pal mire tchatchepaskre laba, un krenn, hoi tchatcho hi! Sik well ko diwes, kai lau tumen dran o tchilatchepen win, un tchiwau tumen an o tchatchepen.

Jesaja 51:6

Dikenn pre an o bolepen un tele ap i phub! O bolepen verdjal har i jagakro ducho verdjal. Un i phub perell an peste khetne har i ripen, un hi gar buder. Ninna te merenn kolla, kai ap late djiwenn, har i matsille, lau me tumen dran o merepen win hako tsireske. Un hako tsireske tchiwau tumen an o tchatchepen.

Debleskri gili 2:6

“Ap i berga Zion, kai mange hi, tchiwom me i baro rajes, koles me wi-rodom.”

Jesaja 51:8

Lenge djal har i ripen dran bakrengro bal, hoi i kirme paash chan. Miro tchatchepen atchell hako tsiro tardo, un hako tsireske lau tumen dran i bibacht win.

Debleskri gili 45:7

Miro Dewel, tiri rajeskri beshepaskri atchell hako tsireske. Tu hal i tchatcho un latcho rai pral tire menshende.

Debleskro tsiro 14:6

Un me dikom i wawar bolepaskres dur pral ap o bolepen. Kowa hunte penas i menshenge o latcho lab, hoi atchella un gar pre-herella. Job penas les i tsele menshenge, hoi ap i phub djiwenna, haki natsjona, haki harmenatsjona, hako rakepen, un an hake themma.

Hebrearja 2:17

Doleske hunte was o Jesus an lauter jaake, har leskre phrala, te well les i baro dji lenge, un te well lo lenge i tchatcho baro rashai glan o Debleste, te mangell lo leskre menshenge, te lell job i doosh lendar krik.

Ezekiel 4:6

Un te hi ko tsiro trujel, palle tchip tut i duito kopo tele, kau kopo ap i tchatchi rig, un hidje i doosh o kherestar Juda 40 (star-deesh) diwessa. Jek diwes hi jek bersheske.

Debleskro tsiro 3:7

“Tchin kau liil ap o Debleskro budepaskro, kai dell jak ap i patslende an o foro Filadelfia: Kawa penell o Debleskro tchatchepaskro. Koles hi o Davideskro klidepaskro an o wast. Job te krell o wudar pre, palle nai krell les kek pale pandlo. Job te krell o wudar pandlo, palle nai krell les kek pre.

Hebrearja 9:26

Te wals kowa gar jaake, hunte merals lo bud kope jaake rah, har i phub koi hi. Job was kanna an kau tsiro, kai mer djiwah, te merell lo, un te lell lo jek kopo hako tsireske i doosh i menshendar.

1. Korintarja 1:30

O Dewel kras, te wan tumer ap o Jesus Kristeskro drom. Kanna djinah, hoi tchatchepah goswepen hi. O Jesus Kristo kras men tchatcho glan o Debleste. Job rodas men win, te was leske koi, un las mari doosh mendar krik.

Johanni 3:34

Koles, kai o Dewel pash mende bitchras, kowa rakrell o Debleskre laba. O Dewel dell an leste peskro tselo Debleskro Ducho, un rikrell tchi pale.

2. Familjakro liil 29:24

Palle maran i rashaja kol busja, un witsran lengro rat ap i chatchepaskri, te well i doosh i Israelendar krik lino. Kowa kran le jaake, har lenge o baro rai penas: te marenn le viechen, kai tseles chatchedo wenn un wawar, te well i doosh i tsele Israelendar krik lino.

1. Johanni 3:8

Kolla, kai djiwenn an o tchilatchepen, kolla hi o bengestar. O beng krella o tchilatchepen jaake rah, har job koi hi. Doleske was o Debleskro tchawo ap kai phub, te phagell lo o bengeskri soor.

2. Petro 1:1

Me, o Simon Petro, tchinau kau liil. Me budrau o Jesus Kristeske un hom leskro bitchepaskro. Me tchinau ap lauterende, kai lan ninna ko patsepen har mer. Ko kutch patsepen, kai tchiwas men an o tchatchepen glan o Debleste, das men maro Dewel un o Jesus Kristo, kai las men dran o tchilatchepen win.

Hebrearja 10:14

Jek kopo meras o Jesus Kristo kolenge, kai wenna pash o Debleste, un kras len hako tsiro tchatcho un erligo glan leste.

Hebrearja 7:26

O Jesus hi o baro rashai, kai hunte well men. Job hi latcho glan o Debleskre jaka. Kek tchilatchepen, witar kek doosh hi ap leste. Na-a, job hi gar jaake har mer tchilatche menshe ham, kai ham pale-tchiddo glan o Debleste. Un o Dewel kras les bareder har hako wawar an o bolepen.

Kolossarja 2:14

Har kram tchilatcho koowa, his kowa jaake, har te wals mari doosh an i liil tchinlo. Ko liil las lo, un tchiwas les ap o trushel.

Kolossarja 1:20

Un o Jesus Kristo hi ko drom, kai o Dewel un i menshe pale mala wenna. Har job ap o trushel meras, un peskro rat ratas, anas o Dewel lauteren pash peste khetne, hoi hi an o bolepen un ap i phub.

Bičepangre 3:14

Tumer dan koles buchoste, kai was o Deblestar, un kai his kek tchilatchepen an leste. Un tumer mangan o Pilatestar, te mukell lo koles dran o stilepen te djal, kai maras jekes.

Johanni 1:41

Kowa hatsas peskro phrales Simon, un penas ap leste: “Mer hatsam ko baro rajes, kolestar o Dewel penas, te well job.” Kowa kharella ap grichtikes Kristo.

Louka 1:35

O bolepaskro penas ap late: “O Debleskro Ducho un leskri soor well pral tute. Doleske well o ternepen o Deblestar un well Debleskro tchawo kharedo.

Markus 1:24

“Hoi kameh tu mendar, Jesus dran Nazaret? Wal tu, te maress men? Me djinau, koon tu hal: Tu weh o Deblestar.”

Mateo 11:13

Un i tsele Debleskre rakepangre un o Mose rakran glan i rah tsiro pral kau newo tsiro. Kanna hi o Johanni koi, un ko newo tsiro was.

Mateo 1:21

Un joi lella i tchawes. Tu deh les o lab Jesus. Job lella i doosh peskre menshendar ap peste.

Ezekiel 28:12

Tu, mensho, gib i ropaskri gili pral o baro rajeste o forestar Tirus, un pen leske: Kawa penell o baro Dewel, maro rai: Ap tute was diklo, har jek hi, koleske lauter mishto djas. Baro goswepen his tut un hals jaake shukar, te djals gar shukeder.

Ropaskre gilja 4:22

Tumer an o foro Zion, palle hi tumari doosh tumendar krik lino! O baro Dewel mukell tumen buder gar pandles krik te anell. Palle anell job tumari doosh, tumer Edomarja, ap tumare sherja pale, un tchakrell ko tchilatcho koowa pre, hoi kran.

3. Mose 8:15

Un o Mose maras les kote, un las tchomone ko ratestar, un makas peskro gushteha ko rat ap i shinga, hoi pral ap i star ekke ap i chatchepaskri hi. Ko tselo wawar rat tchoras lo tella pash i chatchepaskri win. Jaake las lo koi tseli doosh un ko tselo pale-tchiddo koowa krik, hoi ap koi chatchepaskri his, te nai well li o Debleske dino.

Filiparja 3:9

Leske kamau te djiwell. Har djiwom pal o Moseskre lila kras man kowa gar tchatcho glan o Debleste. Na-a, miro patsepen ap o Jesus Kristeste kras man tchatcho glan o Debleste. Koon patsell ap o Jesus Kristeste, koles tchiwell o Dewel an o tchatchepen.

Mateo 4:5

Pal kowa anas les o beng an o Debleskro foro. Kowa hi o foro Jerusalem. Un o beng tchiwas les ap o Debleskro baro kheer pral pre,

Louka 21:22

An kol diwessa well o Debleskri choli ap i menshende tele. Palle well lauter tchatcho, hoi an o Debleskro lab tchinlo hi.

Bičepangre 4:26

I bare raja ap kai phub un i bare pralstune wan lauter khetne. Jon hi chojemen ap o Debleste un ap ko baro rajeste, kones o Dewel bitchras.

Zakarie 4:14

Koon dikas o ropah tele ap o tikno koowa, kowa dikell bachteles ap o pralstuno bar, har hidjrell les o Serubbabel an peskro wast.

Jesaja 42:4

Leske kokres djal gar i soor krik, un job phagell witar gar khetne, bis te kras lo, te djiwenn i menshe ap i tseli phub pal o tchatchepen. Un i menshe an dur themma dikenn ap leste, te sikrell lo len peskro drom.