Daniel 9:16 - O Debleskro Drom 2021 (Sinte)

¹⁶ Ach, maro rai, kre pal tiro tselo tchatchepen! Un muk tiri choli pale te djal! Ab buder gar chojedo ap tiro foro Jerusalem un ap koi berga, kai tu djiwal. Mer un mare phure anam doosh ap mende un kram tchilatcho koowa. Un kolla lauter, kai djiwenn trul mende, praassenn doleske tiro fores Jerusalem un tire menshen.

O Debleskro Lab 2024 (Sinte-Manouche)

¹⁶ Ah, maro ray, kre pal tiro tselo čačepen! Oun mouk tiri rholi pale te djal! Ab bouder gar rhoyedo ap tiro foro Yerusalem oun ap koy berga, kay tou djival. Mer oun mare phoure anam doosh ap mende oun kram čilačo koova. Oun kolla lauter, kay djivenn troul mende, praasenn doleske tiro fores Yerusalem oun tire menshen.

Daniel 9:16 Referans Kwoze

Zakarie 8:3

Me wau pale ap i berga Zion un djiwau mashkral an o foro Jerusalem. Palle kharell pes Jerusalem ‘foro, kai rikrenn pen i menshe ap o baro Debleste’. Un i berga Zion, kai djiwau me, o baro Dewel, ko rai pral o bolepen un i phub, kai berga kharell ‘Debleskri berga’.”

Daniel 9:20

Un har me jaake miro baro Debleha rakrom, un man tele mangom, un leske miri doosh un i doosh mire menshendar Israel penom, un me glan leste trul o Debleskri berga rowom,

Debleskri gili 31:1

I gili o rajeske pral i gipangre. O David kras kai gili.

Debleskri gili 79:4

Mer ham praassedo kolenge, kai trul mende djiwenn, ham lenge sapaske, un jon rikrenn men dineleske.

Debleskri gili 71:2

Tu kreh, hoi tchatcho hi. Doleske ab tu ap miri rig un le man win dran i tchilatche wasta! Shun miri gole un rike man!

2. Mose 20:5

Tu witsress tut gar glan i wawar debleste tele, un mangess les gar an. Me, o baro Dewel, hom tiro Dewel, un kamau, te kamess man kokres. Kolen, kai kamenn mandar tchi te djinell un anenn doosh ap pende, dau me i phagi. Me dau ninna i phagi lengre tchawende un kolengre tchawende jaake rah har triin-te-star familje jek pal i wawar djiwenn.

1. Johanni 1:9

Mer te mangah men tele glan o Debleste, un penah leske, hawi doosh mer ap mende lam, palle krell lo, hoi job penas un lell i doosh mendar krik. Job hi latcho un tchatcho un thowell o tselo tchilatchepen mendar tele.

2. Tessalonikarja 1:6

Job djal ninna pal o tchatchepen, te dell lo kolen i phagi, kai tumen palla lan.

Ezekiel 5:14

Tutar, Jerusalem, krau i mulo foro. Tchi har barra atchenn tutar pral. I menshe an i wawar themma trul tute trujel, san pral tute – hakeno kai djal koi un dikell tut.

Jeremia 32:32

Kowa hunte krap dran ko tselo tchilatchepen, hoi i menshe dran Israel un Juda kran, te choirenn le man. Jon, lengre bare raja, pralstune, rashaja un rakepangre, ninna kolla, kai djiwenn an o foro Jerusalem,

Jeremia 29:18

O kurepen, i bok un o nasslepen lenn len palla. Un i menshe dran i tsele themma ap kai phub denn i wasta khetne pral o shero, te dikenn le len. An hako them, kai tradau len, dikenn le ap lende har ap praassede menshende, kolendar darenn le. Un jon denn shol pral lende un praassenn len.

Jeremia 24:9

Me anau sawi bibacht pral lende, te atchell i menshenge an i tsele themma ap kai phub o rakepen krik. Kote, kai len tradau, wenn le sapaske un praassepaske. Te kamell jek o wawares te praassell, penell lo: Tuke te djal har kol menshenge dran Jerusalem un Juda!

Debleskri gili 143:1

I gili o Davidestar. Baro Dewel, shun miro mangepen! De jak ap miro ropen! Tu hal latcho un tchatcho! Doleske shun man!

Debleskri gili 41:13

Me shunau ap tute miro tselo djijeha. Doleske rikreh tu miro djipen, un mukeh man te djiwell pash tute hako tsiro.

Nehemia 9:8

Un har dikal, te rikrell lo pes ap tute peskro tselo djijeha, kral tu leha win un dal tu tiro lab, te dess leskre tchawende un kolengre tchawende, kai pal lende wenn, ko them, kai djiwenn i Kanaanitarja, un i Hetarja, un i Amorarja, un i Perisarja, un i Jebusarja, un i Girgasharja. Un tu rikral tiro lab. Tu hal tardo an o tchatchepen.

1. Samuel 2:7

O baro Dewel krell tchorwelo un job krell brawelo, ko jekes krell lo tikno, un ko wawares baro.

Debleskri gili 85:4

Tu rikral tiri choli pale, un chatchral buder gar i choljatar.

Jesaja 5:25

Doleske mukell o baro Dewel peskri choli pral peskre menshende te well. Un job hadell peskro wast ap lende un dell len. Un i berge trissenn. Un i mule atchenn tchiddo ap i dromma har tchik. Un an kowa lauter mukell leskri choli gar palla, leskro wast atchell hadedo, te dell lo trad.

Jeremia 32:31

Bari choli chatchas an mande pral kau foro jaake rah har lo tardo hi. Doleske hunte tchiwap les glan mande krik, te dikap les buder gar.

Daniel 11:45

Un job tchiwell peskre kutch plachtene khera pre mashkral o baro pani un o Debleskri berga. Un kote well leske o merepen, un kek well ap leskri rig.

Debleskri gili 89:51

Ma biste koi ladj, hoi hi ap mande, tiro budepaskro! Dik, har hidjrau ko tselo praassepen kolendar, kai tut gar prindjrenna.

Ezekiel 22:4

Ko rateha kolendar, kai maran, anan tumer doosh ap tumende. Un kol chochene deblen, hoi tumenge kran, kolentsa kran tumen pale-tchiddo. Doleske well ko diwes sik, kai lenn tumari phagi. Tumaro tsiro hi trujel. Doleske krau, te praassenn tumen i menshe dran wawar themma. Ap i tseli phub san le pral tumende.