Amos 5:12 - O Debleskro Drom 2021 (Sinte)

¹² Me djinau ko bud tchilatcho koowa, hoi kran tumer. Un dikau, har baro tumari doosh hi. Tumer rikrenn tumen gar pale, latche menshen palla te lell, un mukenn tumen te ginell. Kek tchatchepen denn tumer i tchorwelen.

O Debleskro Lab 2024 (Sinte-Manouche)

¹² Me djinau ko boud čilačo koova, hoy kran t'mer. Oun dikau, har baro t'mari doosh hi. T'mer rikrenn t'men gar pale, lače menshen palla te lell, oun moukenn t'men te ginell. Kek čačepen denn t'mer i čorvelen.

Amos 5:12 Referans Kwoze

Amos 5:10

Chojedo han tumer ap koleste, kai tumenge o tchatchepen penell, un tumende sikrell, kai kowa gar mishto hi, hoi kran.

Jesaja 1:23

Tire pralstune hadan pen pral mande un djan khetne i tchorepangre. Un hakeno lendar mukell pes te ginell. Un kol tchawe, kolen kek dai un kek dad hi, kolenge krenn le kek tchatchepen win. Un ko koowa kol djuwjendar, kolengro rom meras, mukenn le gar glan pende te well.

Maleachi 3:5

Un me kamau pash tumende te well, te wap tumaro tchatchepaskro rai. Un mange nai patsenna, me rakrau o tchatchepen win pral i menshende, kai hadenn man gar: kolla, kai durkrenna, kol mursha, kai chochran pengri romjat, un kol djuwja, kai chochran pengri romes, kolla, kai phagenn pengri sowel, un kolla, kai djan djungeles kolentsa trujel, kai budrenn lenge, un kolla, kai chochenn kol djuwjen, kolengro rom meras, un kolla, kai chochenn kol tchawen, kolen buder kek dad hi, un kolla, kai rikrenn kol wi-themarjen tele, kai djiwenn mashkral tumende. Ko penell o baro Dewel, ko rai pral o bolepen un i phub.

1. Samuel 8:3

Jon djan gar o drom har lengro dad, un rodan kowa, hoi lenge o feteder his, un lan tchorchanes lowe, un phagan o tchatchepen.

Jakobo 5:6

Koles, kai his kek doosh ap leste, anan tumer glan i tchatchepangre, te well lo mulo dino. Kowa kamas pes gar tumentsa te tchingrell.

Jakobo 5:4

Shunenn! Tumer chochran tumare budepangren, kai budran ap tumaro them, un dan len kek lowe. Kolla denn gole ap o bolepen. Lengri gole shunell o Dewel, ko rai pral o bolepen un i phub.

Bičepangre 7:52

Penenn mange: Dell jek Debleskro rakepaskro, kai lan tumare phure gar palla? Jon maran kolen, kai glan-wi penan, te well ko jek, kai hako tsiro o tchatchepen krella. Job was, un tumer phukran ap leste un maran les.

Micha 7:3

Lengre wasta hi sik, te krenn le tchilatcho koowa. I pralstune un tchatchepangre raja denn kolen o tchatchepen, kai denn len lowe. Kol sorele an o them krenn, hoi le kamenn, chochenn un rissrenn o tchatchepen trujel.

Micha 3:11

Tumare tchatchepangre mursha mukenn pen te makell. Tumare rashaja lenn lowe koleske, hoi le i menshenge penenn. Un i lowenge penenn o Debleskre rakepangre, glan-wi, hoi wella. Un tumer penenn: “O baro Dewel hi ap mari rig. Kek bibacht nai well pral mende.”

Amos 2:16

Ninna o sorleder mank i tchatche murshende mukell ap ko diwes peskro charo pal peste un nashell peske. Kowa penell o baro Dewel.

Ropaskre gilja 3:34

Tchatchepah, o baro Dewel dikell, te wenn i tsele pandle an i them khetne stakedo. Les, o Debles pral halauter, hi glan i jaka, te well i mensheske peskro tchatchepen krik lino, un pral i mensheskro koowa chochepen pre anlo well.

Jeremia 29:23

Koi phagi was ap lende doleske, kai kran le i wi-ladjedo koowa an Israel, un lan penge romjen, kai romedino hi, un penan an miro lab tchomone glan-wi, hoi chochepen his, hoi me lenge gar an o mui tchiwom. Me djinau, hoi le kran, me dikom les, penell o baro Dewel.

Jesaja 66:18

Me djinau kowa, hoi jon kran, un kowa, hoi an lengre sherja glan djas. Un me wau, te lap i menshen khetne dran i tsele themma un dran hako rakepen. Un jon wenna un dikenn miro railepen.

Jesaja 47:9

Well i diwes, kai well kowa lauter pral tute: Tu nashreh tiro romes, un tire tchawe hi mulo. Kowa well sik un soreles ap jek diwes pral tute, ninna te djineh bud drawepangre laba pre te penell, hoi te rikrenn i bibacht dur tutar, un kral bud bengeskro koowa.

Jesaja 33:15

Kolla, kai an o tchatchepen tardo hi, un rakrenn, hoi tchatcho hi; kolla, kai kekeske chochepah lowe tele lenn, te wenn le brawelo, un tserdenn pengre wasta pale, te kamell jek len lowe te dell, te anenn le chochepen pre; kolla, kai shunenn gar ap kolende, kai kamenn jekes te marell, un kolla, kai djan gar kolentsa, kai o tchilatchepen krenn,

Jesaja 29:21

kolla, kai chochepah doosh ap i wawarende anan, un chochenn i tchatchepangre murshen, un anenn len pengre chochene labentsa jaake dur, te denn le kek tchatchepen koleste, kai kek doosh ap leste hi.

Jesaja 10:2

An i tchorwelengro koowa rakrenn le kek tchatchepen win. Un kolenge, kai gar an-dikle hi mank mire menshende, lenn le kowa krik, hoi lenge pal o tchatchepen hi. Jon lenn kowa krik, hoi i djuwjen hi, kolengre romma meran, un tchorenn i tchawen win, kolen kek dad buder hi.

Jesaja 5:23

Djungeles djal kolenge, kai i lowenge koles an o tchatchepen tchiwenn, kai doosh ap peste anas, un kolenge lengro tchatchepen krik lenn, kai an o tchatchepen tardo hi.

Gosewe laba 22:22

Ma rande o tchorweles win, doleske kai lo tchorwelo hi! Te hal leha glan i tchatchepangre, ma le leskro tchatchepen krik.

Hiob 31:21

An kek tsiro hadom me miro wast pre ap i tchaweste, koles kek dad buder hi, ninna te djinom, te hi halauter ap miri rig, kai his an o foreskro wudar beshdo.

Ruth 4:1

Un o Boas djas pre pash o foreskro wudar, kai i mursha khetne wenn, un beshas pes koi. Kote was ko wawar mursh, kai lake ninna koi hunte wals, kolestar o Boas rakras. Un o Boas penas ap leste: “Ab kai pash mande, un besh tut pash mande!” Un job was un beshas pes pash leste.

5. Mose 31:21

Palle well bud bibacht un djungelo koowa pral lende. Un jon giwenn koi gili. un koja well gar bistedo lengre tchawendar, un sikrell lende, kai dom len trad, hoi wella, te mukenn le miro drom. Glan te anom len an ko them, koleske me man sowel dom, te anau len koi, prindjrau ko koowa, hoi lenge an o shero trujel djal.”

5. Mose 16:18

Tchiwenn tchatchepangre murshen un wawar pralstunen dren an tumare forja, hoi tumen tumaro baro Dewel della! Jaake te hi an hako them kol deesh-te-dui bare familjendar tchatchepangre, kai rakrenn o tchatchepen jaake win pral pengre menshende, te lell hakeno peskro tchatchepen.

Debleskri gili 127:5

Bachtelo hi kowa, koles bud kolendar pash peste hi. Te well i doosh ap leste anlo, wenn le leske ap i rig, te lell lo peskro tchatchepen.

Gosewe laba 17:8

Kowa, kai wawaren tchorchanes lowe dell, te krenn le, hoi job kamell, an koleskre jaka hi peskre lowe har durkepangre barra, hoi anenn leske bacht an hako koowa.

Ezekiel 13:22

Tumare chochene labentsa dukran i djia kolendar, kai an o tchatchepen djiwenn, un kolenge kamom kek daar te krell. Un tumer kran i wasta kolendar sorelo, kai tchilatcho koowa krenn. Jaake kran tumer, te djan le gar tele lengro tchilatcho dromestar, te atchenn le djido.

Hosea 5:3

Me prindjrau o Efrajim mishto, un kowa hoi o Israel krell, hi gar khatedo glan mande. O Efrajim lubras pes trujel, o Israel kras pes pale-tchiddo.

Amos 2:3

Me marau lengro baro rajes un i lengre tsele pralstunen, penell o baro Dewel.

Amos 5:7

Bibacht ap tumende, tumer rissrenn o tchatchepaskre laba, un stakrenn ap o tchatchepen trujel!

Amos 8:4

Shunenn kowa, tumer parepangre, kai rikrenn i tchorwelen tele, te atchell len buder tchi djipaske!

2. Mose 23:3

Pen o tchatchepen, ninna te hi kowa i tchorwelo, kai chochras.

2. Mose 23:6

Te hal tu i tchatchepaskro, hunte dess tu koles peskro tchatchepen, koon an o tchatchepen hi, ninna te hi lo tchorwelo.

Hiob 20:19

I tchorwelen rikras lo tele, un was lenge gar ap i rig. Job tradas menshen dran pengre khera, te lell lo peske kol khera, hoi job gar kras.