5. Mose 16:3 - O Debleskro Drom 2021 (Sinte)

³ Te chan tumer ko chapen, ma chan maro koi pashel, kai shutlo jarro dren hi. Har djan tumenge dran o them Egiptia win, hunte chan efta diwessa maro, an koleste kek shutlo jarro dren his, jaake sik hunte nashenn tumenge. Kanna chan ninna efta diwessa maro, kai kek shutlo jarro dren hi, te bistrenn gar ko diwes, kai djan dran o them Egiptia win, kai anan le jaake bud duka ap tumende. Doleske kharah mer kau maro ‘dukengro maro’.

O Debleskro Lab 2024 (Sinte-Manouche)

³ Te rhan t'mer ko rhapen, ma rhan maro koy pashel, kay shoutlo yarro dren hi. Har djan t'menge dran o them Egiptia vin, hounte rhan efta divessa maro, an koleste kek shoutlo yarro dren his, yaake sik hounte nashenn t'menge. Kanna rhan ninna efta divessa maro, kay kek shoutlo yarro dren hi, te bistrenn gar ko dives, kay djan dran o them Egiptia vin, kay anan le yaake boud douka ap t'mende. Doleske kharah mer kava maro doukengro maro.

5. Mose 16:3 Referans Kwoze

2. Mose 12:39

I Israelitarja mukan o them Egiptia jaake sik, te nai tchiwan le kek chapen penge khetne, te lan le les lentsa ap o drom. Kokres kol mare, hoi gar peklo his, lan le peha. Kolla mare, kai kek shutlo jarro dren hi, pekan le kanna.

2. Mose 34:18

Ma bistrenn kol bare diwessa, kai chan kek maro dran shutlo jarro. An o tchon Abib chan efta diwessa kek maro dran shutlo jarro jaake har me tumenge penom! An ko tchon djan tumer win dran o them Egiptia.

Louka 22:19

Un job las i kotar maro, parkras pes pash o Debleste, phagas ko maro, das kowa lende, un penas ap lende: “Ake, chan! Kau maro hi miro mass. Me dau man tumenge. Te hom buder gar koi, krenn kowa pale un pale, te well tumenge an tumaro shero, hoi me krom tumenge!”

4. Mose 9:11

Jon hunte chan ko chapen an o duito tchon ap o deesh-te-starto diwes, ap i rati, un hunte chan koi pashel ko maro, kai kek shutlo jarro dren hi, ninna shutlo senlepen.

2. Mose 12:8

Ko mass well peklo pral i jag. Un jon hunte chan les an koi rat khetne o maro, kai kek shutlo jarro dren hi. Un shutlo senlepen chan le pashel.

1. Tessalonikarja 1:6

Un kowa, hoi dikan tumer ap mende, kowa krenn tumer kanna ninna, un djiwenn jaake, har o rai Jesus djiwas. Har shunan tumer o Debleskro lab, patsan les un hans bachtelo pral kowa, ninna te kran i menshe tumenge o djipen phares. Koi bacht das o Debleskro Ducho an tumende.

1. Korintarja 5:8

Un jaake har tchiwan jon ko shutlo jarro krik un chan sau maro, kai kek shutlo jarro dren his, jaake hunte djiwas mer maro newo djipen an o djudjepen un an o tchatchepen. Mer hunte mukas maro phuro djipen, un djiwas buder gar an o tchilatchepen.

Zakarie 12:10

O Davideskre menshenge un i menshenge an Jerusalem krau lengre djia pre, te wenn le kamles jek ap o wawareste un mangenn mandar latchepen. Un jon dikenn ap koleste, kai dan le an i rig tchurje. Un jon denn gole i ropah pral leste, har jek pral peskro mulo tchaweste gole dell, koles kek wawar tchawe hi, un har rowenn i menshe pral pengro phureder tchawo, kai meras.

Debleskri gili 127:2

Tchitcheske hi, te stenn tumer sik taissarlakro pre, un han beshdo bis an i rat, un marenn tumen tele, te lenn tumaro chapen. Kowa dell o baro Dewel peskre malen an o sopen.

Debleskri gili 111:4

Job mukell men gar te bistrell, hoi lo an peskri bari soor kras. Latcho un kamlo hi lo.

Debleskri gili 102:9

Hako diwes sanenn kolla pral mande, kai kamenn mange tchilatchepen, un praassenn man.

1. Rajengro liil 22:27

un pen lenge: ‘Kawa penell o baro rai: Tchiwenn koles an o stilepen, un denn les gar bud maro te chal, un gar bud pani te pijell, bis te wau me sasto dran o kurepen pale.’”

4. Mose 28:17

Un ap o deesh-te-pantchto diwes ninna an ko tchon, hi ko ersto diwes kol efta diwessa, kai hunte chan kek maro dran shutlo jarro.

3. Mose 23:6

Un o 15. (deesh-te-pantchto) diwes ninna an ko tchon, hi ko ersto diwes kol diwessa, kai hunte chan kek maro dran shutlo jarro. Efta diwessa chan tumer kek maro, an koleste shutlo jarro hi.

2. Mose 12:11

Jaake hunte chan les: trul tumaro per i dori pandlo, i kircha ap tumare herja, un i kasht an tumaro wast. Chan o chapen sik! Ko chapen kharell Passa. Tumer chan les, te sharenn man, tumaro baro Debles.

2. Mose 12:17

Rikrenn tumen ap kal laba: An kol efta diwessa chan tumer maro, kai kek shutlo jarro dren hi. Ap kau diwes lom me tumen lauteren dran o them Egiptia win. Doleske rikrenn tumen ap kawa, un krenn kowa hako bersh, tumer un tumare tchawe, kai wenna pal tumende hako tsiro.

5. Mose 4:9

Denn soreles jak ap tumende, te bistrenn gar – jaake rah har djiwenn, – hoi tumare jakentsa dikan! Un penenn tumare tchawenge un lengre tchawenge,

5. Mose 16:2

Djan ap koi platsa, hoi tumaro baro Dewel peske win rodell, te well job kote an-mangedo. Un kote marenn leske i viecho, nai well i bakro, i busni oder i grumni, hoi chan pash o chapen, hoi well Passa kharedo.

Jesaja 52:12

Kau kopo hunte nashenn gar sik kotar win, witar gar jaake har wans ap o naashepen. O baro Dewel djal tumenge glan win, un dell pal tumende jak, job, o Dewel pral o Israel.

Josua 4:7

Palle penenn tumer lenge: ‘O pani dran o Jordan atchas tardo glan o mochton, kai o baro Debleskre deesh laba dren his, har was o mochton mank o pani ap i wawar rig hidjedo. Un kal barra hi kate, te bistrenn i Israelitarja kowa kek tsireske.’”