3. Mose 7:18 - O Debleskro Drom 2021 (Sinte)

¹⁸ Te chal jek ap o triinto diwes gomme ko massestar, palle dikell o baro Dewel gar latches ap kowa un ap koleste, kai anas ko viecho glan leste. O mass was pale-tchiddo. Un koon chal kolestar, hunte hidjrell peskri doosh, hoi job koleha ap peste las.

O Debleskro Lab 2024 (Sinte-Manouche)

¹⁸ Te rhal yek ap o triinto dives gomme ko massestar, palle dikell o baro Devel gar lačes ap kova oun ap koleste, kay anas ko firho glan leste. O mass vas pale-čiddo. Oun koon rhal kolestar, hounte hidjrell peskri doosh, hoy yob koleha ap peste las.

3. Mose 7:18 Referans Kwoze

4. Mose 18:27

Un kawa, hoi tumer mande denna, hi jaake, har te dans tumer djob un mool.

3. Mose 22:25

Ginenn witar gar sau viecho jekestar, kai kek Israelitari hi, te anenn les glan tumaro Debleste. Sawe vieche hi buder gar bud moldo. Ap sawende dikell o baro Dewel buder gar latches.

3. Mose 11:41

Kol tsele tikne vieche, hoi djan pral i phub, kolla, kai djan ap pengro per, ninna kolla, kai len hi star un budeder herja, jon hunte wenn pale-tchiddo tumenge. Kek chal len!

1. Petro 2:24

O tchilatchepen, hoi mer kram, las o Jesus Kristo ap peste, un hidjras les ap o trushel. Har job menge meras, hi kowa jaake, har te meram mer leha. Kanna hi o tchilatchepen an mende mulo. Un mer djiwah nai i latcho un tchatcho djipen. Kol duka, hoi o Jesus ap peste las, kran maro djipen sasto.

Hebrearja 9:28

jaake hunte meras o Jesus Kristo jek kopo i menshenge, te lell lo i doosh bud lendar ap peste. Ap ko tsiro, kai well lo i duito kopo, well lo gar, te lell lo i doosh i menshendar krik. Na-a. Palle well lo kolenge, kai tchiwan pengro dji ap leste, te lell lo len pash peste, un te dell lo len lauter kowa, hoi hi lenge an o bolepen.

Remarja 4:11

Tchinlo was o Abraham, te well diklo: Job hi tchatcho dran o patsepen, hoi glan kau tsiro an leste his. Doleske was lo kharedo: O dad lauterendar, kai patsenn ap o Debleste, ninna te hi le gar ap o mass tchinlo. Lengro patsepen tchiwell len an o tchatchepen.

Louka 16:15

Koi penas o Jesus ap lende: “Glan i menshengre jaka kamenn tumer latcho te well. O Dewel prindjrell tumaro dji. Hoi pash i menshende bud molella, hi tchi moldo an o Debleskre jaka.

Maleachi 1:13

Un tumer penenn: ‘Dikenn, hawi budi hi men koleha! Ko well menge dran o nak win.’ Tumer anenn mange viechen, kai hi tchoredo, bango un nasselo. Penap me koi pre: ‘Kowa hi shukar, hoi tumer mange krenn’, penell o baro Dewel.

Maleachi 1:10

‘Kamaus, te wals jek tumendar koi, kai krals o wudja an miro kheer pandles, te krenn tumer gar tchitcheske i jag ap miri chatchepaskri! Man hi doha tumendar’, penell o baro Dewel, ko rai pral o bolepen un i phub. ‘Un kol marede vieche, hoi mange anenn, hi mange gar mishto.’

Amos 5:22

Ninna te chatchrenn tumer mange viechen un chapen, hom gar bachtelo pral kowa. Kol thulle viechen, hoi mange marenn un glan mande chan, nai dikau buder gar glan i jaka.

Hosea 8:13

Jon anenn mange viechen, un chan pen tchalo ap ko mass. Me, o baro Dewel, dikau gar latches koi pre. Lengri doosh bistrau me gar, un lengro tchilatchepen well pral lende: Jon hunte djan pale an o them Egiptia pale.

Ezekiel 18:20

Kokres kowa, kai doosh ap peste anell, hunte merell. I tchawo hunte hidjrell gar i doosh peskro dadestar. Witar gar hunte hidjrell o dad koi doosh, hoi o tchawo ap peste anas. Kowa, kai o tchatchepen kras, ap leste well leskro tchatchepen pale. Un kowa, kai doosh ap peste anas, ap leste well leskri doosh pale.

Jeremia 14:12

Jon nai rikrenn pen pale o chapastar, un rowenn ap mande jaake bud har kamenn le, me shunau len gar. Ninna te chatchrenn jon mange viechen un chapen, dikau gar latches ap lende. Me marau len an o kurepen, ninna i bok un o nasslepen marenn le.

Jeremia 14:10

Jaake penas o baro Dewel kal menshendar: Jon nashenn jek rigjatar ap i wawar, jaake har kamenn le. Doleske dikell o baro Dewel gar latches ap lende. Leske well an o shero, hawo tchilatcho koowa jon kran. Un lengri doshake dell job len i phagi.

Jesaja 66:3

Kowa, kai mange i gurum marell, marell ninna i menshes i chocheno debleske. Kowa, kai mange i terno bakro temerl dell, marell ninna i djukles i chocheno debleske. Kowa, kai mange chapen glan anell, anell ninna balengro rat i chocheno debleske. Kowa, kai mange sungepaskro koowa chatchrell, parkrell pes ninna pash i chocheno debleste. Jon djan pengre dromma jaake har jon les kamenna. Un shukar hi an lengre jaka, hoi an mire jaka djungeles hi.

Jesaja 65:4

Rati hi le beshdo pash i mulengre khera, te putchenn le i mulen, un atchenn pral i rat an khatede platse, kai mangenn le wawar deblen an. Jon chan balengro mass, un pijenn summi, hoi mass dren hi kol viechendar, hoi pale-tchiddo hi.

3. Mose 22:23

Grumja un bakre, kolen i lengsteder heri hi oder i tikneder heri, sau vieches nai anell jek glan o baro Debleste, te dell lo les pestar kokres. Te anell lo les, te rikrell lo peskri sowel dren, hi kowa gar latcho glan o baro Debleskre jaka.

3. Mose 22:16

Te mukenn le wawar Israelitarjen kolestar te chal, anenn le bari doosh ap i Israelitarjen. Me hom o baro Dewel. Un kowa, hoi i Israelitarja mange anenn, hi kokres mange.

3. Mose 20:19

Kek te sowell i phenjah peskri datar oder peskro dadestar. Koon sawo koowa krell, anell ladj ap peskri bibi. Jon hunte hidjrenn pengri doosh.

3. Mose 20:17

Te sowell i mursh peskri penjah, i tchai leskro dadestar oder leskri datar, hi kowa i bari ladj. Kol dui hunte wenn mulo dino glan i tsele menshende. Ko mursh sowas peskri phenjah, un hunte hidjrell peskri doosh.

3. Mose 17:16

Te thowell lo pes gar, witar gar peskre koola, hunte hidjrell lo peskri phagi.

3. Mose 10:19

O Aron penas ap o Mose: “Dik, kau diwes maran le o baro Debleske ko viecho pengri doshake, ninna ko viecho, koleskro tselo mass chatchedo was. Un hoi djas, dikeh tu! Har nai choms kau diwes ko viechestar, hoi i doshake maredo was? Wals kowa an o baro Debleskre jaka palle jaake, te dikals lo mishto ap kowa?”

3. Mose 10:17

“Hoske chan tumer ko mass gar ap i Debleskri platsa? Kau mass was i viechestar, hoi o baro Debleske anlo was, un his i rashajenge kokres, te chan le les. O baro Dewel das les tumende, te hidjrenn i doosh i Israelendar krik, te well lauter pale mishto mank lende un o baro Debleste.

3. Mose 5:17

Te krell jek tchomone, kolestar o baro Dewel penas, te krell lo les gar, anas lo i doosh ap peste, ninna te djinas lo gar, te penas o baro Dewel: “Ma kre kowa!”

3. Mose 7:19

Ko mass, hoi tchomoneha khetne well, hoi pale-tchiddo hi, kowa hunte well gar buder chalo. An i jag witsedo un chatchedo hunte well ko mass. Kokres kowa, kai gar pale-tchiddo hi glan o baro Debleste, nai chal ko mass, hoi o baro Debleske anlo was.

Gosewe laba 15:8

O baro Dewel dikell chojedes ap kowa, hoi o tchilatcho leske anell. Te mangenn les kolla an, kai an o tchatchepen tardo hi, dikell lo latches ap lengro mangepen.

3. Mose 19:5

Te anenn tumer i viecho o baro Debleske, te chan les khetne glan leste, palle krenn kowa jaake, te dikap latches ap tumende!