2. Samuel 5:9 - O Debleskro Drom 2021 (Sinte)

⁹ Jaake djiwas o David an kau sorelo kheer un das les ko lab ‘Davideskro foro’. Un job kras budeder khera un kras o foro buchleder kotar, kai o Millo his bis mashkral an o foro.

O Debleskro Lab 2024 (Sinte-Manouche)

⁹ Yaake djivas o David an kava zorelo kheer oun das les ko lab Davideskro foro. Oun yob kras boudeder khera oun kras o foro bourhleder kotar, kay o Millo his bis mashkral an o foro.

2. Samuel 5:9 Referans Kwoze

1. Rajengro liil 9:24

Un koi tchai o Faraestar tserdas win dran o Davideskro foro, un was an lakro kheer, hoi o Salomo mukas lake te krell. Koi pal mukas lo ko turmo te krell, hoi kharell Millo.

1. Rajengro liil 9:15

Kowa hi o lab, hoi tchinlo hi pral i budi, hoi hunte kran i budepangre o baro rajeske Salomo. Lentsa kras job o baro Debleskro kheer un peskro kheer, un ko turmo Millo, un koi massuri trul Jerusalem, un kol forja Hazor un Megiddo un Geser.

2. Familjakro liil 32:5

Un o Hiskija rikras pes mishto un mukas kol massurja trul o foro, kote kai le tele phagedo his, newes te krell. Un kol turme kras lo bareder, un mukas win i duiti massuri pre te tchiwell. Ninna mukas lo o Millo sorleder te krell an o Davideskro foro, un mukas bud witsepaskre tchurja un shilte te krell.

1. Rajengro liil 11:27

Har hadas lo pes pral o baro rajeste, was kowa jaake: O Salomo mukas o turmo Millo te krell, un koi massuri tseles te krell, hoi djas trul o Davideskro foro.

2. Samuel 5:7

O David las ko sorelo kheer Zion peske dren. Kowa hi kanna o Davideskro foro.

1. Familjakro liil 11:8

Un job kras budeder khera un kras o foro buchleder kotar, kai o Millo his. Un o Joab tchiwas ko wawar kotar o forestar pale pre.

Čačepangre 9:20

Te his kowa gar mishto, hoi kran tumer, palle djal jag dran o Abimelech win, un koi jag chal hakenes pre, kai an o foro Sichem djiwella, ninna kolen, kai an o baro sorelo kheer djiwenna! Un lendar lauterendar djal jag win un chal o Abimeleches pre!

Čačepangre 9:6

Un i tikno tsiro koi pal wan i tsele mursha dran o foro Sichem khetne, ninna lauter, hoi an o baro sorelo kheer djiwan. Khetne djan le glan o foro Sichem pash ko baro ruk, hoi pash o baro bar tardo hi. Kote tchiwan le o Abimeleches pral pende, te well lo lengro baro rai.

2. Samuel 5:8

Koi penas o David ap ko diwes: “Koon kol Jebusarjen kamell te dell, kowa hunte djal kote pral an o foro, kai o pani an i berga tele nashell. Me nai dikau len gar glan i jaka, kol bangen un korelen!” Doleske well penlo: I korelo un i bango well gar an o kheer dren.

2. Rajengro liil 12:20

Ko tselo wawar koowa, hoi pral o Joash penepaske hi, un halauter, hoi lo kras, kowa hi tchinlo an i familjakro liil i bare rajendar pral o them Juda.

Debleskri gili 122:3

Jerusalem hi i sorelo kerdo foro, kai i menshe khetne wenna.

Jesaja 29:1

Djungeles djal tumenge an o foro Arijel, ko foro, kai o David djiwas! Djungeles djal tumenge, ninna te mukenn gar tele un wenn hako bersh, te rikrenn tumare bare diwessa!

2. Samuel 6:10

Un job mukas les gar pash peste te anell an o Davideskro foro. Na-a, job mukas les an ko kheer te anell, kai djiwell o Obed-Edom. Kowa his i mursh dran o foro Gat.

1. Rajengro liil 2:10

Un o David meras un was paskedo an o foro Jerusalem.

2. Rajengro liil 12:21

Un leskre pralstune budepangre kran pen khetne, te denn le les mulo. Un dui lendar dan les mulo an o kheer pash o Millo, ap ko drom, kai djal an o foreskro kotar, hoi kharell Silla. Kol dui his o Josachar, koleskro dad o Shimat hi, un o Josabad, koleskro dad o Shomer hi. Un jon paskran les pash peskre phurende an o Davideskro foro. Un leskro tchawo, o Amazja, was baro rai pal leste.

Nehemia 3:15

Un o Djido Panjeskro Wudar kras o Shallum, koleskro dad o Kol-Hose his. O Shallum his o pralstuno pral o them trul o foro Mizpa. Job kras ko Djido Panjeskro Wudar un tchiwas i dacha pre, un kol dui wudja dren, ninna i kashtengre un i saster, hoi i wudja pandenna. Un job tchiwas i massuri pale pre pash ko tikno pani Shelah, hoi pash o baro rajeskri baar his, bis pash o barrengro drom, hoi djal tele dran o Davideskro foro.