2. Mose 27:1 - O Debleskro Drom 2021 (Sinte)

^1-2 O Debleskri chatchepaskri kress tu dran o kasht ko rukestar, hoi kharella Akatsia. Pral i tseli chatchepaskri well lolo saster. I chatchepaskri well 2,50 (dui-te-paash) metari lengsto un ninna jaake buchlo, un well 1,50 (jek-te-paash) metari pral. Ap haki pralstuni ekka well i shing win. Kol shinga wenn kerdo dran jek kotar kasht har i chatchepaskri.

O Debleskro Lab 2024 (Sinte-Manouche)

^1-2 O Debleskri rhačepaskri kress tou dran o kasht ko roukestar, hoy kharella Akatsia. Pral i tseli rhačepaskri vell lolo saster. I rhačepaskri vell 2,50 (douy-te-paash) metari lengsto oun ninna yaake bourhlo, oun vell 1,50 (yek-te-paash) metari pral. Ap haki pralstouni ekka vell i shing vin. Kol shinga venn kerdo dran yek kotar kasht har i rhačepaskri.

2. Mose 27:1 Referans Kwoze

Hebrearja 13:10

Mer djah ap o newo drom. Menge meras o Jesus Kristo ap o trushel. Kolla, kai djan ap o phuro drom, marenn viechen an o Debleskro kheer ap kai phub. Koon gomme viechen marella un glan o Debleste anella, koleske hi o Jesus Kristo gar koi.

2. Familjakro liil 4:1

Un job kras i Debleskri chatchepaskri dran lolo saster. Koja his deesh metarja lengsto un buchlo un pantch metarja fun tel bis pral.

2. Samuel 24:18

Un o Gad was ap ko diwes pash o David un penas ap leste: “Dja koi pral ap koi djobeskri platsa ko murshestar Arauna, ko Jebusari! Un kre kote o baro Debleske i chatchepaskri!”

2. Mose 40:29

Win glan o khereskro wudar tchiwas lo i sasterni chatchepaskri, un ap leste chatchras lo viechen un chapen o baro Debleske, jaake har job leske penas.

2. Mose 40:10

Mak ninna i sasterni chatchepaskri un lakre tsele koola, te well li o Debleske un leske kokres!

2. Mose 24:4

Koi tchinas o Mose hako lab, hoi o baro Dewel penas, an i liil. Un sik taissarlakro stas job pre un kras i chatchepaskri tele glan i berga, kote pre vieche chatchedo wenna o baro Debleske. Ninna tchiwas lo deesh-te-dui barra pre kol deesh-te-dui bare familjenge, kai wan o Israeleskre tchawendar: jek bar haki familjake.

2. Mose 35:16

koi sasterni chatchepaskri, kai vieche chatchedo wenna o Debleske, ninna koi netsa dran lolo saster, kol hidjepaskre kashta un lauter, hoi koi pashel hi; ko thopaskro tcharo un leskre herja;

4. Mose 3:31

Un jon hunte denn garda ap ko sonakaskro mochton, koi chapaskri, koi momelengri, o Debleskro sonakaskro bob un o Debleskri sasterni chatchepaskri, kai vieche chatchede wenna. Ninna denn le garda ap i tselo Debleskro koowa an leskro kheer, koleha jon budrenna, ninna ap koi plachta mank kol dui iseme un ap halauter, hoi koi pashel hi.

4. Mose 4:13

Jon hunte khossenn ninna koi jagakri tchik ap o Debleskri chatchepaskri tele, un tchiwenn i loli plachta koi pral.

2. Rajengro liil 16:14

Un koi chatchepaskri dran lolo saster, kai o baro Debleske vieche chatchedo wan, koi chatchepaskri mukas lo krik te tchiwell, te well li gar mashkral koi newi chatchepaskri un o baro Debleskro kheer tardo, un tchiwas les serwes pash koi newi chatchepaskri.

1. Familjakro liil 6:49

Un jaake dan i Israelitarja i menshen dran o kheer Levi forja un phub trul kol forja, te nai chan lengre vieche.

Esra 3:2

Un o Jeshua, koleskro dad o Jozadak his, kras pes ap i budi khetne peskre phralentsa, kol rashajentsa, un o mursheha Serubbabel, koleskro dad o Shealtijel his, un leskre phralentsa. Un jon kran i newi sasterni chatchepaskri, te nai chatchrenn le viechen koi pre o Israeleskro Debleske, jaake har tchinlo hi an o liil o Debleskro murshestar, o Mosestar.

2. Mose 17:15

Un o Mose kras i chatchepaskri o Debleske, te wenn kote vieche chatchedo o Debleske, un das koi chatchepaskri o lab ‘O baro Dewel krell man soreles an o kurepen’.

2. Mose 31:9

koi sasterni chatchepaskri, kai i vieche o Debleske chatchedo wenna, un ko tselo koowa, hoi pashel hi, un o thopaskro tcharo un koleskre herja;

2. Mose 39:39

koi sasterni chatchepaskri, kai vieche chatchedo wenna o Debleske, koi sasterni netsa, lakre hidjepaskre kashta un i tsele koola, hoi koi pashel hi; ko thopaskro tcharo un leskre herja;

2. Mose 40:6

Glan o Debleskro plachteno kheer tchip i sasterni chatchepaskri, kai i vieche o Debleske chatchedo wenna.

4. Mose 4:14

Un ko tselo koowa, kai budrenn jon peha, tchiwenn le koi pral pre: jagakre tchare, massengre forshette, bare roja, kolentsa lenn le i jagakri tchik krik, tchare, kai o rat dren wella, un ko tselo koowa, hoi koi pashel hi. Pral halauter tchiwenn le i latchi ledertikri plachta. Palle tchiwenn le kol hidjepaskre kashta an i gustria ap o bob.