1. Mose 47:12 - O Debleskro Drom 2021 (Sinte)

¹² Ninna maro das job peskro dadeste un peskre phralende lengre familjentsa, jaake bud, kai hakenes doha his.

O Debleskro Lab 2024 (Sinte-Manouche)

¹² Ninna maro das yob peskro dadeste oun peskre phralende lengre familyentsa, yaake boud, kay hakenes doha his.

1. Mose 47:12 Referans Kwoze

1. Mose 45:11

Un me dau tut halauter, hoi tut hunte well djipaske. Jaake te wess gar tchorwelo, tu un tiri familja un lauter hoi tut hi. Pantch bersha hi glan mende, kai hi i menshen tchi te chal.’

1. Timoteo 5:8

Koon gar peskre menshenge koi hi, un kolenge, kai pash leste an o kheer djiwenna, kowa nashras peskro patsepen, un hi har jek, kai patsell gar ap o Jesus Kristeste.

1. Timoteo 5:4

Te hi kol djuwjen tchawe, tchawengre tchawe, hunte wenn kolla lenge koi. Jaake sikrenn jon, te patsenn le ap o Debleste. Un jon parkrenn pen pash pengri dai un pengri mami, hoi kolla lenge lauter kran. Kowa hi mishto glan o Debleskre jaka.

1. Timoteo 4:8

Te dikeh ap kowa, te wenn tire mussja un herja soreles, hi kowa gar bud moldo. Te dikeh ap kowa, te well tiro patsepen soreles, hi kowa bud moldo, un tu leh o tchatcho djipen. Ko djipen dell tut o Dewel kanna ap kai phub un an ko tsiro, hoi wella.

1. Tessalonikarja 2:7

Mer ham o Jesus Kristeskre bitchepangre un nai penams tumenge soreles, hoi te krenn. Kowa kram gar. Na-a, mer hams kamlo ap tumende, har i dai ap peskre tchawende.

Ruth 4:15

Un job krell tiro djipen bachteles, un dell jak, te djal tuke mishto, te weh phuro. Tiro tchaweskri romni, kai tut peskro tselo djijeha kamell, anas les ap i phub. Koja hi tuke budeder moldo har efta tchawe.”

2. Mose 20:12

Dik ap tiro dadeste un ap tiri date, te djal lenge mishto. Jaake djiweh i rah djipen an ko them, hoi tut tiro baro Dewel della.

1. Mose 47:24

Un te hi tumen newo djob, denn o pantchto kotar o baro rajeste! Kol wawar star kotja mu atchenn tumenge, jaake te hi tumen doha, kai nai witsrenn an i phub. Ninna hi tumen chapaske tumenge un tumare tchawenge, un kolenge, kai djiwenn an tumare khera.”

1. Mose 47:21

Un o Josef ginas i menshen an o tselo them Egiptia – fun jek rig o themestar ap i wawar rig, te wenn le budepangre o baro rajeske.

1. Mose 47:1

Un o Josef djas pash o baro rajeste un penas ap leste: “Miro dad un mire phrala pengre bakrentsa un pengre grumjentsa un halauter, hoi len hi, wan dran o them Kanaan un hi kanna an o them Gosen.”

1. Mose 50:21

Ma darenn! Me dikau ap tumende un tumare tchawende.” Jaake rakras job latche labentsa ap lengre djia.

1. Mose 45:7

Un o Dewel bitchras man glan tumende an kau them, te lell job tumen dran i bari bok win, te atchenn tumer un tumare tchawe djido ap i phub.

1. Mose 45:10

Tu djiwess an o them Gosen, hoi hi gar dur mandar: tu un tire tchawe un tire tchawengre tchawe, ninna tire bakre un busja, tire grumja un halauter, hoi tut hi.

Jesaja 22:24

Peskre tsele menshe hi ap leskri meen, peskre tchawentsa un tchawengre tchawentsa. Palle djal leske har o saster, ap koleste pirja, tchare un khore pre bladedo hi.