1. Johanni 3:5 - O Debleskro Drom 2021 (Sinte)

⁵ Tumer djinenna, kai o Jesus Kristo was, te lell lo ko tchilatcho koowa krik, hoi kram. Tumer djinenn ninna, kai an leste kek tchilatchepen hi.

O Debleskro Lab 2024 (Sinte-Manouche)

⁵ T'mer djinenna, kay o Yezous Kristo vas, te lell lo ko čilačo koova krik, hoy kram. T'mer djinenn ninna, kay an leste kek čilačepen hi.

1. Johanni 3:5 Referans Kwoze

2. Korintarja 5:21

O Dewel tchiwas mari tseli doosh ap maro rajeste, o Jesus Kristeste, kai job kek tchilatchepen kras, te was mer tchatcho un erligo glan o Debleskre jaka.

Hebrearja 9:28

jaake hunte meras o Jesus Kristo jek kopo i menshenge, te lell lo i doosh bud lendar ap peste. Ap ko tsiro, kai well lo i duito kopo, well lo gar, te lell lo i doosh i menshendar krik. Na-a. Palle well lo kolenge, kai tchiwan pengro dji ap leste, te lell lo len pash peste, un te dell lo len lauter kowa, hoi hi lenge an o bolepen.

1. Petro 3:18

Ninna o Jesus Kristo las jek kopo duka ap peste, har job ap o trushel meras, un mari doosh ap peste las. Job his i latcho, un meras i tchilatchenge. Kowa kras lo, te anell lo len pash o Debleste. I menshe maran les. O Debleskro Ducho kras les djido.

1. Petro 2:24

O tchilatchepen, hoi mer kram, las o Jesus Kristo ap peste, un hidjras les ap o trushel. Har job menge meras, hi kowa jaake, har te meram mer leha. Kanna hi o tchilatchepen an mende mulo. Un mer djiwah nai i latcho un tchatcho djipen. Kol duka, hoi o Jesus ap peste las, kran maro djipen sasto.

Hebrearja 9:26

Te wals kowa gar jaake, hunte merals lo bud kope jaake rah, har i phub koi hi. Job was kanna an kau tsiro, kai mer djiwah, te merell lo, un te lell lo jek kopo hako tsireske i doosh i menshendar.

Johanni 1:29

Ap o wawar diwes dikas o Johanni, kai o Jesus pash leste wella. Un o Johanni penas: “Dikenn, kawa hi o Debleskro bakro, kai lell i menshengri doosh ap peste.

Debleskro tsiro 1:5

Latchepen un bacht tumenge! Kowa dell tumen o Jesus Kristo! Job sikrell i menshende o tchatcho drom pash o Debleste. Un job hi o glanstuno lauterendar, kai stenn i mulendar pre un wenn djido. Un job hi ninna o rai pral i tsele raja ap kai phub! Job kamell men o tselo djijestar, un las men dran mari doosh win, un plaissras menge peskro rateha.

1. Johanni 1:7

Mer te djiwah khetne o Debleha an o tchatchepen, jaake har o Dewel an o tchatchepen tardo hi, palle nai ham mer ninna lauter khetne an o tchatchepen. Un o rat leskro tchawestar thowell mari tseli doosh mendar tele.

1. Johanni 1:2

Awa, ko djipen was pash mende, un sikras pes mende. Mer dikam les. Doleske rakrah mer kolestar, kai dikam un shunam. Un mer penah tumenge, koon ko djipen della, hoi gar pre-herella. Kowa his pash peskro dadeste an o bolepen, un was pash mende.

Tito 2:14

Job das peskro djipen an o merepen, te las lo mari tseli doosh ap peste, un te kras lo maro dji djudjo, te was mer leskre menshe, un te kamas i tseli sorjah latcho koowa te krell.

1. Petro 2:22

Job kras kek tchilatcho koowa. Un dran leskro mui was kek chochepen.

Hebrearja 1:3

O Debleskro tchawo hi railo un baro har o Dewel. Un kowa, hoi hi o Debles an o dji, hi ninna o tchawes an o dji. Dran leskro sorelo lab rikrell lo lauter khetne, hoi job kras. O Debleskro tchawo las mari doosh un maro tchilatchepen mendar, un job beshas pes ap i tchatchi rig o baro Deblestar an o bolepen.

1. Timoteo 1:15

Hi tchatcho, hoi kanna penau. Un tumer nai patsenn man: Maro rai, o Jesus Kristo, was ap kai phub, te anell lo kolen ap o drom pash o Debleste, kai dur lestar an o tchilatchepen djiwenna. Kolendar hom me o djungleder.

Mateo 1:21

Un joi lella i tchawes. Tu deh les o lab Jesus. Job lella i doosh peskre menshendar ap peste.

1. Johanni 2:1

Mire tchawe, me tchinau tumenge kowa, te krenn tumer kek tchilatchepen! Un jek te kras i tchilatcho koowa, jaake hi men i rakepaskro, kai well ap mari rig un rakrell mishto menge pash maro dadeste an o bolepen. Kowa hi o Jesus Kristo, kai an o tchatchepen glan o Debleste tardo hi.

1. Petro 1:20

Har i phub gar koi his, rodas o Dewel les win, te merell lo i menshenge. Un an kau tsiro, kai djiwah, was lo tumenge ap i phub.

Hebrearja 4:15

Job, maro baro rashai, haiwell men mishto, un djinella, te hi men kek soor pral o tchilatchepen. Les kamas o beng ninna o Debleskro dromestar tele te anell, jaake har kamell lo men o Debleskro dromestar tele te anell. Jek koowa his an o Jesuseskro djipen wawartchandes har pash mende: Kek tchilatchepen his an leste.

Hebrearja 7:26

O Jesus hi o baro rashai, kai hunte well men. Job hi latcho glan o Debleskre jaka. Kek tchilatchepen, witar kek doosh hi ap leste. Na-a, job hi gar jaake har mer tchilatche menshe ham, kai ham pale-tchiddo glan o Debleste. Un o Dewel kras les bareder har hako wawar an o bolepen.

1. Timoteo 3:16

Tchatchepah, an maro patsepen hi i baro tchatchepen: O Debleskro tchawo was i mensho. Hoi job kras, hi tchatcho. Ko sikras men o Debleskro Ducho. I bolepangre dikan ap leste. An i tsele themma rakran le lestar. Ap i tseli phub patsan le ap leste. An o bolepen las les o Dewel pash peste.

Johanni 14:30

Man hi buder gar bud tsiro, te rakrap tumentsa. O beng, kai hi o rai pral kai phub, wella. Les hi kek soor pral mande.

Johanni 8:46

Koon tumendar nai penella, kai me jek tchilatcho koowa krom? Me te penau o tchatchepen, hoske patsenn tumer man gar?

Johanni 1:31

Me djinom gar, koon kowa hi. Me wom, te taufrap i menshen an Israel an o pani, te sikrap nai len, koon job hi.”

Louka 23:47

Har ko pralstuno lurdo dikas, hoi koi djas, sharas lo o Debles un penas: “Tchatchepah, kawa his i latcho mursh.”

Louka 23:41

Kawa hi mari phagi koleske, hoi kram. Mer anah tchatchepah doosh ap mende. Kawa mursh kras kek tchilatchepen.”

Hosea 14:2

Tu Israel, dja pale pash o baro Debleste, ko tiro Dewel hi! Koi doosh, hoi ap tute anal, mukas tut an i bibacht te perell.

1. Petro 1:18

Tumer djinenna, o Jesus Kristo plaissras kek sonakai un kek rup, – kowa lauter atchell gar, – te lell lo tumen win dran tumaro phuro djipen, hoi tchi moldo his, har djan ap ko drom, kai tumare phure djan.

1. Johanni 2:2

Job kokres las mari doosh mendar, un las lat ap peste, har job menge ap o trushel meras. Gar mari doosh kokres las lo ap peste. Na-a, job las ninna i doosh i tsele menshendar ap kai phub ap peste.

1. Johanni 2:29

Tumer djinenna: O Jesus Kristo kras, hoi tchatcho hi glan o Debleste. Jaake djinenn tumer ninna: Kolla, kai krenn, hoi tchatcho hi glan o Debleste, kolla hi o Debleskre tchawe.

1. Johanni 3:8

Kolla, kai djiwenn an o tchilatchepen, kolla hi o bengestar. O beng krella o tchilatchepen jaake rah, har job koi hi. Doleske was o Debleskro tchawo ap kai phub, te phagell lo o bengeskri soor.