Zefanja 1:5 - O Debleskro Lab 2024 (Sinte-Manouche)

⁵ Me marau lauteren, kay pral ap pengre khera i bolepangre momlia an-mangenn. Ninna kolen marau, kay vitsrenn pen tele glan mande, oun denn pen sovel ap mande, oun ap i vavar rig denn le pen sovel ap ko moulo debleste, kay kharell Milkom.

O Debleskro Drom 2021 (Sinte)

⁵ Me marau lauteren, kai pral ap pengre khera i bolepangre momlia an-mangenn. Ninna kolen marau, kai witsrenn pen tele glan mande, un denn pen sowel ap mande, un ap i wawar rig denn le pen sowel ap ko mulo debleste, kai kharell Milkom.

Zefanja 1:5 Referans Kwoze

Jeremia 19:13

Oun kol khera an Yerusalem oun kol khera kol bare rayendar an o them Youda, kolla venn ninna pale-čiddo har koy platsa Tofet, – i tsele khera, kay yon pral pre i tsele bolepangre momelenge soungepaskro koova rhačran oun i vavar rhorhene deblenge mool vin čoran.

2. Rajengro liil 17:33

Yaake mangan le o baro Debles an oun ninna vavar deblen, yaake har kol menshe kran, kolendar yon van.

1. Rajengro liil 11:33

O Salomo moukas man, oun mangas i Astarte an, kay debletsa, hoy i Sidonarya an-mangenn. Ninna mangas lo o Kemosh an, ko devel, hoy i Moabarya an-mangenn, oun o Milkom, ko devel, hoy i Ammonarya an-mangenn. Yob djas gar ap mire dromma oun kras gar, hoy mishto hi glan mire yaka. Pal mire laba oun miro čačepen djivas lo gar, har kova leskro dad, o David kras.

Amos 5:26

Kanna hi yaake, t'mer kran t'menge douy figuren, te mangenn len an: o Sakkut, koles kharenn baro ray oun o Kayvan, koles kran har i sterna. Doleske hounte hidjrenn t'mer kolen t'mentsa

2. Rajengro liil 23:12

Oun yob kras kol rhačepangre paash, hoy pral ap o kheer koy tardo his, kay o Ahases leskri isema his. Kol rhačepangren moukan i bare raya pral o them Youda te krell. Ninna kolla, kay o Manasse kras, phagas lo tele. Kolla his tardo ap kol douy platse glan o baro Debleskro kheer. Oun o Yosia djas koy oun vitsras lengri čik an ko tikno pani, hoy kharell Kidron.

2. Rajengro liil 17:41

Oun kal menshe, kay van dran vavar forya, mangan o baro Debles an, oun mangan ninna pengre deblen an. Oun ninna lengre čave oun čavengre čave krenn yaake har lengre phoure kran bis ap kava dives.

1. Rajengro liil 18:21

Har yon lauter khetne his, djas o Eliya glan i tsele Israelitaryen oun penas: “Har dour kamenn t'mer gomme ap douy rigya te djan? Hi o baro Devel o čačo Devel, palle nashenn leske pal, te hi o Baal, palle nashenn leske pal!” I menshe penan leske kek lab pale pale.

Remarja 14:11

An o Debleskro lab hi činlo: O Devel penell: Yaake har čačo hi, te djivau, yaake perell hakeno glan mande tele, te sharell lo man. Oun hakeno penella: Tou hal o baro Devel.

Mateo 6:24

Kek boudrell nay douy rayenge. Te vals kova yaake, boudrals lo ko yekeske mishto, oun ko vavareske gar mishto. Ko yekes kamals yob gar, kol vavares kamals yob o djiyestar. Tou nay boudreh gar o Debleske oun rodeh tiro bravlepen.

Hosea 4:15

Israel, ninna te kameh tou tout trouyel te loubrell, kamau gar, te krenn i menshe an o them Youda sau koova har tou, oun anenn doosh ap pende. Ma djan an i forya Gilgal oun Bet-Aven, te mangenn kote i rhorhene deblen an! Oun ma denn t'men kote sovel oun penenn “Me dau man sovel pash o djido Debleste.”

Jeremia 32:29

Oun kol lourde dran o them Babilonia, kay troul kava foro tardo hi, venna dren, oun rhačrenn kava foro tele kol tsele kherentsa, kay vas ap i dache soungepaskro koova rhačedo o rhorheno debleske Baal, oun mool vin čoredo kol vavar rhorhene deblenge. Doleske vas i rholi an mande.

Jeremia 5:7

Hoske bistrap i doosh mire menshendar? Yon djan mandar krik, oun denn pen sovel pash koleste, kay kek devel hi. Har me len čalo krom, phagan le mantsa, oun djan an i loubyengro kheer.

Jeremia 4:2

Te denn t'men sovel oun penenn: Me dau man sovel pash o djido Debleste … oun t'mer rhorhenn gar koy pashel, oun rikrenn t'maro lab, palle poučenn mandar i menshe an i vavar themma, te čivap miri barht ap lende, oun yon sharenn pen, kay prindjrenn yon man.

Jesaja 48:1

Shounenn, t'mer dran o kheer Yakob, t'mer, kay venn o labeha Israel gole dino, oun venn dran o kheer Youda. T'mer denn t'men sovel pash o baro Debleste, oun penenn, te mangenn o Israeleskro Debles an. An o čačepen oun i djoudjo djiyeha krenn t'mer kova gar.

Jesaja 45:23

Me dom man sovel pash mande kokres, oun hoy penom, hi čačo oun nay vell gar krik lino: Hakeno hounte vitsrell pes glan mande ap i phoub, oun hako mouy dell pes sovel

Jesaja 44:5

Yek pal o vavar penell: O baro Devel hi miro ray. Boud kamenn tire menshe te vell. Yon činenn ap pengro vast: Me hom o baro Debleske, oun kharenn pen Debleskre menshe.

1. Rajengro liil 11:5

Oun o Salomo mangas i debletsa Astarte an, hoy his koy debletsa foun i Sidonarya. Ninna o debles Milkom mangas lo an, ko djoungelo debles, koles i Ammonarya an-mangan.

Josua 23:7

Ma čivenn t'men khetne kol vavar menshentsa, kay gomme an kava them djivenn. Lengre deblen denn gar an-gole! Ma denn t'men sovel pash lende! Ma anenn lenge firhen oun vavar koova! Ma vitsrenn t'men tele glan lende!

5. Mose 10:20

Oun hounte shounenn ap t'maro baro Debleste oun mangenn les kokres an. Rikrenn t'men ap leste kokres. Te denn t'men sovel, denn t'maro sovel pash leskro lab.

Bičepangre 10:9

O vavar dives, har yon pash o foro Yoppe van, djas o Petro ap o kheer pral pre, te mangell lo o Debles an. His rhapaskro tsiro.

2. Rajengro liil 17:32

Kal menshe mangan ninna o baro Debles an, oun rodan morshen mank pende vin, te venn le rashaya oun rhačrenn firhen o baro Debleske an kol khera ap kol moulne platse.

Jeremia 5:2

Ninna te denn yon pen sovel pash o djido Debleste, hi kova rhorhepen.

Jeremia 7:9

T'mer han čorepangre oun marepangre, kay denn vavaren moulo, t'mer morsha rhorhenn t'mare romyen vavar djouvyentsa, t'mer djouvya, rhorhenn t'mare romen, vavar morshentsa, t'mer denn t'men sovel oun rikrenn koya gar dren, t'mer rhačrenn firhen o rhorheno debleske Baal oun nashenn pal vavar deblende.

Jeremia 7:10

Oun palle venn t'mer glan mande an kava kheer, hoy mange kerdo vas, oun penenn: Menge nay djal či. Oun krenn savo koova doureder, hoy rhoyran man.

Jeremia 8:2

Oun kol kokale venn koy trouyel vitsedo glan o kham oun o čon oun i tsele bolepangre momlia, kolen kaman kol menshe, oun mangan len an, oun nashan lenge pal. Kolendar poučan yon oun sharan len. Kol kokale venn gar pre hadedo oun venn gar paskedo. Yon venn foul i phoubyake.

Jeremia 12:16

Yon sikran mire menshende, har te denn le pen sovel ap o debleste Baal. Kanna vell yaake: Te moukenn yon pen mire menshendar te sikrell, har te denn yon pen ap miro lab sovel, oun penenn: Pash o djido Debleste … palle moukau len mashkral mire menshende te djivell.

Jeremia 49:1

Laba pral i Ammonarya. Kava penell o baro Devel: Hi o Israeles kek čave? Hi les kek čave, kay nay lenn o them pengre phourendar dren? Hoske las ko devel, koles i Ammonarya an-mangenn, o Milkom, o them Gad dren? Oun hoske djivenn leskre menshe kote?

Hosea 10:2

Lengre djia hi pherdo rhorhepen. Kanna vell lengri doosh pral lende. Lengre altare venn khetne phagedo, oun kol pre-čidde bare barra venn tele dino.

5. Mose 4:19

Te hadenn t'mare yaka pre pash o bolepen oun dikenn o kham oun o moonto oun i tsele bolepangre momlia, ma moukenn t'men kolendar krik te tserdenn, te čivenn t'men tele glan lende oun mangenn len an. T'maro baro Devel das len i menshenge an i vavar themma ap i phoub.

Jesaja 22:1

Kate sikrell o Devel, hoy pral i dikepaskri tala vella. Hoy djas touha, Yerusalem? Hoske djan t'mer lauter pral ap i khera?