Sikepaskro 9:11 - O Debleskro Lab 2024 (Sinte-Manouche)

¹¹ Pale dikom, har ap kay phoub djala: O sikeder naashepaskro vell gar glanstounes an. O zorleder kourepaskro hi gar o feteder lourdo. Sikle menshe hi gar kolla, konen o boudeder rhapen hi. I goseve hi gar i bravele. Kova, kay čomone mishto hayvell, hi gar kova, kay an-diklo hi. O tsiro oun i barht penenn, har hakeneske djal.

O Debleskro Drom 2021 (Sinte)

¹¹ Pale dikom, har ap kai phub djala: O sikeder naashepaskro well gar glanstunes an. O sorleder kurepaskro hi gar o feteder lurdo. Sikle menshe hi gar kolla, konen o budeder chapen hi. I gosewe hi gar i brawele. Kowa, kai tchomone mishto haiwell, hi gar kowa, kai an-diklo hi. O tsiro un i bacht penenn, har hakeneske djal.

Sikepaskro 9:11 Referans Kwoze

Jeremia 9:23

Koon kamell pes te sharell, kova te sharell pes, kay yob prindjrell man, oun te hayvell yob, kay me o baro Devel hom. Me krau miro dji pre i menshenge, oun krau, hoy čačo oun mishto hi ap i phoub. Savo koova hi mishto glan mire yaka. Kova penau me, o baro Devel.

Sikepaskro 3:17

Kote penom mange: O Devel rakrell o čačepen vin pral koleste, kay djivell an o čačepen, oun pral koleste, kay djivell an o čilačepen. Hako koova, oun halauter, hoy yek krell, koleske dell i čačo tsiro.

Sikepaskro 3:14

Me hayvom, kay halauter, hoy o Devel krella, hako tsireske ačella. Kek mendar nay krell čomone pashel, oun kek mendar nay lell čomone krik. Kova halauter krell o Devel, te sharas mer les.

Efesarja 1:11

Yob kras, te vam mer o Debleskre čave. Oun ko bolepaskro bravlepen, hoy leskro hi, vell ninna maro. Kova kamas o Devel glan i rah tsiro yaake. Oun lauter, hoy yob kamella, krell lo.

2. Familjakro liil 20:15

Oun o Yaziel penas: “Shounenn mishto, menshale dran o them Youda oun dran o foro Yerusalem, oun tou, baro ray Yosafat! Kava penell o baro Devel t'menge: Ma darenn, oun denn gar tiknes palla glan kol boud lourdende, kolen t'mer dikenna! Kava kourepen hi gar t'maro kourepen, o Debleskro kourepen hi.

5. Mose 8:18

Doleske ma bistrenn t'maro baro Debles! Yob hi kova, kay tout i zoor das, te nay lenn t'menge bravlepen khetne. Oun yaake rikrell yob kova, hoy lo t'mare phourentsa vin kras. Ninna kava dives rikrell lo pes ap kova.

Sikepaskro 4:4

Oun me dikom, har marenn pen i menshe tele oun krenn lači boudi, te venn le feteder har kol vavar, yaake te zilverenn kolla ap lende. Kova hi ninna či-moldo, oun yaake har te nashals yek pal o dourho, hoy djal pral i phoub.

Jeremia 46:6

Kova kay sik hi, nay nashell peske gar. Oun kova kay zorelo hi, vell tapedo. Kote, an o nordetikro them pash o pani Eufrat peran le, oun ačenn le moulo čiddo.

Sikepaskro 7:13

Dik, hoy o Devel halauter kras! Kek nay krell vavarčandes, hoy yob bango kras!

Sikepaskro 4:1

Palle dikom halauter, hoy gar čačo hi ap i phoub. Me dikom i sva kolendar, kay dan le lenge gar lengro čačepen, oun kolenge kek ap i rig vas. Kolla, kay kran lenge čilačepen, his zorelo. Doleske vas kek ap lengri rig.

Sikepaskro 2:12

Kote djom trouyel, te dikap, hoy vell dran o gosvepen vin? Hi kova vavarčandes har kova, hoy vell dran o narvlepen oun o dinlepen vin? Hoy krell ko morsh, kay pal mande o baro ray hi? Kova hoy glan leste kerdo vas, krell yob ninna!

Hiob 34:29

Te rikrell pes o Devel pale, nay penell kek leske: Tou anal doosh ap toute! Te khatrell lo pes, nay dikell les kek. Hoy nay krenn i menshe, hoy nay krell i natsyona,

2. Samuel 17:14

Koy penas o Absalom oun hakeno an Israel: “Kova hoy o Houshay penas, hi feteder har kova, hoy o Ahitofel penas.” Yaake kras o baro Devel, kay kek kova kras, hoy o Ahitofel an leskro gosvepen penas. O baro Devel kamas i bibarht pral o Absalom te anell.

Maleachi 3:18

Palle dikenn t'mer pale, kay djal gar emliges kolenge, kay an o čačepen tardo hi oun kolenge, kay krenn o čilačepen. Djal vavarčandes koleske, kay mangell o Debles an, har koleske, kay mangell les gar an.

1. Samuel 17:50

Yaake his o David o zorleder. Oun les his kokres i vitsepaskri oun i bar. Oun leskro bar tapras o Goliates oun das les moulo. O Davides his kek rharo an peskro vast.

2. Samuel 17:23

O Ahitofel shounas, kay vas kova gar kerdo, hoy yob penas. Koy čivas lo i ledertikri plarhta ap peskri bourika, beshas pes koy pre oun klissas khere an peskro foro. Kote penas lo i menshenge an peskro kheer, hoy te krenn le pal leskro merepen. Palle bladas lo pes pre, oun meras. Oun yob vas paskedo an o moulengro kheer peskro dadestar.

5. Mose 8:17

Oun t'mer te nay penenn gar an t'mare djia: Miri zoor oun mire vastengri boudi anas mange kava tselo bravlepen!

1. Samuel 6:9

Palle sikrell pes, havi rigyatar koy bari bibarht pral mende vas: Te djan le pre an lengro them, ap o drom an Bet-Shemesh, palle his o baro Devel, kay savi bari bibarht ap mende anas. Te djan le ap i vavar rig, palle hayvah, te his gar leskro vast, hoy men das, oun kava tselo koova čičeske ap mende vas, oun kek bičras les.”

Debleskri gili 76:5

Tou hal rayleder oun bareder har i berge, hoy hako tsiro ačenna.

Gosewe laba 1:5

Kolla, kay gosevo hi, shounenn, har te venn le gomme gosveder. Kolla, kay siklo hi, hatsenn, har te djan le pengro drom.

Sikepaskro 9:2

Halauter hounte merenna. Kova djal yaake yekeske har ko vavareske, koleske, kay shounell ap o Debleste har koleske, kay kamell či o Deblestar te djinell, koleske, kay krell o lačepen oun koleske, kay krell o čilačepen, koleske, kay hi erligo oun koleske, kay hi pale-čiddo, koleske, kay rhačrell firhen o Debleske har koleske, kay rhačrell kek firhen leske. Yaake har o lačeske djal, yaake djal o čilačeske. Oun kova, kay dell pes sovel, koleske djal yaake har koleske, kay kamell pes gar sovel te dell.

Zakarie 4:6

“Kol efta momlia hi o baro Debleskre yaka, hoy lauter dikenn, hoy ap i phoub djala.”

Sikepaskro 9:3

Kova hi koy bibarht pash halauter, hoy djal ap kay phoub, te djal ko yekeske har ko vavareske djala. Oun koy pashel hi o dji o menshendar pherdo čilačepen oun pherdo dinlepen, yaake rah har yon djivenna; pal kova merenn le!

Jeremia 48:14

T'mer morsha dran o kheer Moab, har nay penenn t'mer t'mendar: Mer ham zorele kourepangre oun čače morsha?