Sikepaskro 8:1 - O Debleskro Lab 2024 (Sinte-Manouche)

¹ Kay hi ko mensho, kay hi čačepah gosevo? Kay hi kova, kay hayvell te penell, hoske čomone yaake hi har kova hi? Dik i menshes an i yaka, palle nay peneh, hi lo gosevo oder gar. Te hi lo gosevo, palle dikell lo lačes ap i vavareste. Leskro gosvepen lell leskri rholi krik.

O Debleskro Drom 2021 (Sinte)

¹ Kai hi ko mensho, kai hi tchatchepah gosewo? Kai hi kowa, kai haiwell te penell, hoske tchomone jaake hi har kowa hi? Dik i menshes an i jaka, palle nai peneh, hi lo gosewo oder gar. Te hi lo gosewo, palle dikell lo latches ap i wawareste. Leskro goswepen lell leskri choli krik.

Sikepaskro 8:1 Referans Kwoze

Bičepangre 6:15

Oun kol tsele pralstoune dikan ap o Stefaneste, har leskro mouy vas yaake har i Debleskro bolepaskro.

5. Mose 28:50

Len hi kek dji t'menge. Ninna i phoure oun i čave khaytenn len gar.

2. Petro 1:20

Oun kova hounte djinenn t'mer: Kek Debleskro rakepaskro rakras nay pestar Debleskre laba.

2. Timoteo 4:17

O ray Yezous his ap miri rig, oun das man i zoor, te nay penap kote o tselo lačo lab lestar, yaake te shounan les ninna kolla, kay hi kek bibolde. Oun yob las man yaake dran lengre vasta vin, har te voms dran i leveskro mouy vin lino.

Bičepangre 4:29

Ray, shouneh tou, kay yon men kanna trad denna? Mer ham tire boudepangre. De men koy zoor, te nay rakras toutar!

Bičepangre 4:13

Har yon dikan, har o Petro oun o Yohanni rakran, kay kek traash an lende his, kran le bare yaka. Oun yon hayvan, kay kolla kek bare rakepangre oun goseve morsha hi, oun djinan ninna, kay yon o Yezouseha khetne his.

Gosewe laba 17:24

Kova, kay hayvell, hoy mishto oun gar mishto hi, moukell pes gar tele te rikrell, te lell lo gomme boudeder gosvepen. I dinelo dikell kate te kote.

Hiob 33:23

Te vell palle i bolepaskres pash leste, kova ap leskri rig hi, yek kol zeryendar, kolen o Devel vin bičrell, te penenn le menge, hoy menge mishto hi,

Efesarja 6:19

Mangenn mange ninna, te dell o Devel man i čače laba, oun te darap gar i menshendar, te sikrap lende o Debleskro drom oun penap lenge kova, hoy djinenn le gar.

Mateo 17:2

Oun glan lengre yaka las lo i bolepaskro raylepen. Leskro mouy vas har o kham. Oun leskro ripen vas biyalo har i bari momeli.

Daniel 2:47

Oun o baro ray penas ap o Daniel: “Čačepah t'maro Devel hi o Devel pral i tsele debla, oun o ray pral i tsele bare raya ap kay phoub. Yob sikrell kova, hoy khatedo his oun kek djinas. Yaake nay penal tou menge, hoy koy souni kamas te penell.”

Gosewe laba 24:5

I gosevo morsh hi har i zorelo, oun yek, kay boud djinell, an koleste hi pherdi zoor.

Gosewe laba 1:6

Yon nay hayvenn goseve laba, oun rakepen, kay o čačepen dren khatedo hi, ava, laba, kay goseve menshe penan, oun save, kay hounte rodess, hoy yon kamenn te penell.

1. Mose 40:8

Penan yon ap leste: “Mer dam souni. Oun kek hi koy, kay penell nashte, hoy mare sounya menge penenna.” Penas o Yosef ap lende: “O Devel penell nay, hoy kol sounya penenna. Penenn t'mare sounya mange!”

Remarja 13:5

Doleske hounte shouness ap lende, gar kokres dran i daar glan i phagi, na-a, ninna dran tiro dji, hoy touke penell, te kress tou o lačepen.

Gosewe laba 21:29

O čilačo stakrell zoreles pre i baro mouyeha. Kova, kay o čačepaske tardo hi, moukell gar peskro drom.

2. Mose 34:35

Har vas lo vin, te penell lo ap i Israelitarya, hoy o baro Devel leske penas, dikan yon, har leskro mouy hi har o kham. Palle khatras o Mose peskro mouy pale tel ko diklo, bis te djas lo pale dren, te rakrell lo o baro Debleha.

Gosewe laba 12:8

Kones gosevo koova an o shero hi, kova vell sharedo. Kones dinelo koova an o shero hi, ap koleste dikenn le tele.

Daniel 2:22

Yob čakrella pre oun sikrell, hoy khatedo hi, oun djinell, hoy an o tamlepen hi; pash leste hi kek tamlepen.