Remarja 2:12 - O Debleskro Lab 2024 (Sinte-Manouche)

¹² Kolla, kay kran o čilačepen, djan nashedo, ninna te prindjran le gar o Moseskre laba, kay penenn, har yon hounte djivenn. Oun lauter, kay prindjran kol laba oun kran o čilačepen, lenn ninna pengri phagi.

O Debleskro Drom 2021 (Sinte)

¹² Kolla, kai kran o tchilatchepen, djan nashedo, ninna te prindjran le gar o Moseskre laba, kai penenn, har jon hunte djiwenn. Un lauter, kai prindjran kol laba un kran o tchilatchepen, lenn ninna pengri phagi.

Remarja 2:12 Referans Kwoze

1. Korintarja 9:21

Te hom me pash i menshende, kay rikrenn pen gar ap o Moseskre laba, palle djivau me har yon, te anap len pash o Yezous Kristeste, ninna te rikrau me man ap o Debleskro čačepen. Oun kova hi o Yezous Kristeskro lab.

Galatarja 3:10

Kol vavar, kay rikrenn pen ap o Moseskre laba, oun kamenn yaake čačo te vell glan o Debleste, kolla hi tel o Debleskro praasepen. O Debleskro lab penella: Hakeno hi praasedo, koon gar lauter krella, hoy o Moseskre laba penenna. Oun kek mensho hi koy, kay krell lauter, hoy o Moseskre laba penenna.

Remarja 8:3

O Moseskre laba nay dan ko djipen gar. I menshe nay kran kova gar, hoy an o Moseskre lila činlo hi. Ko čilačepen, hoy an lende his, moukas len gar te krell, hoy o Devel lendar kamas. Doleske penas o Devel: “O čilačepen hounte merell.” Oun yob bičras peskro čaves, te vell lo i mensho har mer, kay čilačo ham. Yob las maro čilačepen ap peste oun meras. Oun yaake meras o čilačepen leha oun nashras peskri zoor pral mende.

Remarja 1:32

Yon djinenna, o Devel dell kolen i phagi, kay yaake djivenna. Oun koy phagi hi o merepen. Ninna te djinenn le kova, krenn le ko čilačo koova, oun sharenn kolen, kay kova ninna krenna.

Mateo 11:24

Me penau t'menge: Ap ko dives, kay rakrell o Devel o čačepen pral i tsele menshende vin, lenn t'mer i bareder phagi, har kol menshe an o foro Sodom.

Jakobo 2:10

Te rikreh tout ap i tsele laba, hoy an o Moseskre lila činlo hi, oun te kreh tou yek čilačo koova, palle hi kova, har te rikrals tou tout ap či, oun tou leh doosh ap toute.

Remarja 4:15

Te djinell yek gar, hoy o Devel lestar kamella, oun krell i čilačo koova, nay djinell lo gar, kay kova čilačo hi. Kolla, kay djinenn, hoy o Devel lendar kamella oun krenn kova gar, pral kolende vell o Debleskri rholi. Yaake anenn o Moseskre laba, hoy menge penenna, hoy o Devel mendar kamella, čačepah o Debleskri rholi pral i menshende.

Mateo 11:22

Ap ko dives, kay rakrell o Devel o čačepen vin pral i tsele menshende ap i phoub, djal kol menshenge an i forya Sidon oun Tirus feteder har t'menge kate.

5. Mose 27:26

“Praasedo vell kova, kay rikrell gar kal tsele čačepaskre laba.” Oun i tsele menshe hounte penenn: Amen!

Galatarja 3:22

O Debleskro lab penella, kay hi hako mensho pandlo ap o čilačepen. Ko yek drom, kay anell men vin dran o čilačepen, hi o patsepen ap o Yezous Kristeste. Kova penas o Devel.

Johanni 19:11

Penas o Yezous: “Tout vals kek zoor pral mande, te dals tout o Devel koya gar. Doleske hi koles, kay das man an tire vasta, bareder doosh har tout.”

Bičepangre 2:23

T'mer dan o Yezouses an i vasta kolendar, kay gar ap o Debleste patsenna. Oun kolla dan les ap o troushel, oun kote meras yob. Oun hoy t'mer leha kran, kova his yaake glan-diklo o Deblestar.