Remarja 12:1 - O Debleskro Lab 2024 (Sinte-Manouche)

¹ Mire phrala, o Devel hi kamlo ap t'mende. Doleske mangau t'men o tselo djiyestar: Djivenn t'maro djipen o Debleske, oun venn leske kokres koy, yaake te vell o Devel barhtelo pral t'mende. Te djivenn t'mer yaake, sharenn t'mer les. Oun kova hi t'mari boudi.

O Debleskro Drom 2021 (Sinte)

¹ Mire phrala, o Dewel hi kamlo ap tumende. Doleske mangau tumen o tselo djijestar: Djiwenn tumaro djipen o Debleske, un wenn leske kokres koi, jaake te well o Dewel bachtelo pral tumende. Te djiwenn tumer jaake, sharenn tumer les. Un kowa hi tumari budi.

Remarja 12:1 Referans Kwoze

1. Petro 2:5

Ninna t'mer han save djide barra. T'mentsa kamell o Devel peskro kheer pre te čivell. Yob rodas t'men vin, te venn t'mer leskre rashaya, oun te venn leske koy. An t'mende das o Yezous Kristo peskro Dourho. Doleske nay sharenn o Debles yaake, har yob kova kamella.

Remarja 6:13

Denn yak, te krenn či t'mare vastentsa, heryentsa, yakentsa oun mouyentsa, hoy krell o čilačepen ap kay phoub zorleder! Djivenn o tselo djiyeha o Debleske, har save, kay his moulo, oun van pale djido. Krenn kova lauter, hoy krell o lačepen zorleder!

Remarja 6:19

Me penom t'menge kova yaake, te hayvenn man nay. Har hans gomme gar patslo, kran t'mer djoungelo oun čilačo koova. Oun o čilačepen an t'mende vas baro oun bareder. Kanna hi kova vavarčandes. Doleske krenn kova, hoy lačo oun čačo hi! Yaake djivenn t'mer o Debleskro djipen.

Remarja 12:2

I menshe ap kay phoub djivenn pal pengro shero. Ma djivenn yaake har yon! Moukenn t'men o Deblestar neves te krell, te hayvenn t'mer, hoy yob kamella: kova, hoy hi lačo oun mishto oun čačo.

Efesarja 4:1

Me hom an o stilepen o Yezouseske, maro rayeske, oun mangau t'men o djiyestar, te djivenn t'mer t'maro djipen har save menshe, kolen o Devel peske khetne gole das.

Debleskri gili 19:14

Mouk man gar khetne kolentsa te djal, kay hi pre-phourde, te tserdenn le man gar ap lengri rig. Yaake vell kek doosh ap mande, oun me krau kek baro čilačo koova.

Remarja 6:16

T'mer djinenna: Koon t'maro ray hi, ap koleste hounte shounenn. Koleskre boudepangre han t'mer. Te shounenn t'mer ap o čilačepen, palle hi o čilačepen o ray pral t'mende, oun t'mer merenna. Te shounenn t'mer ap o Debleste, palle krell lo t'men čačo.

2. Korintarja 4:16

Doleske vah mer gar khino, ninna te moukell men mari zoor. Ko djipen, hoy o Devel an mende das, vell hako dives pale neves.

Debleskri gili 116:12

Har nay krau me kova pale mishto miro baro Debleske, hoy yob lauter mange kras?

1. Tessalonikarja 4:1

Mire phrala, mer sikram t'mende, har te djivenn t'maro djipen yaake, te vell o Devel barhtelo pral t'mende. Oun kova krenn t'mer. Kanna mangah t'men yaake har maro ray, o Yezous, mangals t'mendar: Krenn kova gomme boudeder oun feteder!

2. Korintarja 5:20

Yaake ham mer o Debleskre bičepangre. Men hi o Yezous Kristeskro čačo vast. Doleske mangah i menshendar, te venn le pash leste. Oun kova hi yaake, har te dell len o Yezous Kristo gole: “Avenn pash o Debleste! Avenn leskre mala!”

Jesaja 56:7

kolen anau pash miri berga, kay me djivau, oun krau len barhteles an miro kheer, kay mangenn man i menshe an. Yon nay anenn mange firhen: save, hoy venn mange rhačedo ap miri rhačepaskri, ninna save, hoy rhan le glan mande. Oun me dikau lačes ap kova. Miro kheer vell kharedo: Kheer, kay i menshe dran hake themma o Debles an-mangenn.

Efesarja 5:10

Rodenn pal kova, hoy hi mishto glan o Yezouseste, maro rayeste!

Filiparja 2:17

Me anom t'men ap o Debleskro drom. Doleske hom me glan leste tardo har i rashay, kay anell leske t'maro patsepen. Ninna te meroms pash miri boudi o Yezous Kristeske, hom me kanna barhtelo t'mentsa khetne pral t'maro patsepen.

1. Korintarja 1:10

Mire phrala, me shounom, kay hi čingepen mashkral t'mende. Kova penan mange kolla dran i familya koy djouvyatar Kloe. Kanna mangau t'men an o lab maro rayestar, o Yezous Kristestar: Ma čingrenn t'men bouder! Ačenn khetne oun rikrenn khetne an kova, hoy t'mer krenna oun patsenna!

Remarja 2:4

Hi touke o Debleskro baro lačepen či moldo? Les hi i baro dji oun dell i menshen gar sik pre. Djineh tou gar o Debleskro lačepen, hoy kamell tout ap leskro drom te anell?

1. Petro 2:20

Te krenn t'mer čilačo koova oun venn doleske dino, hi kova gar mishto, ninna te rikrenn t'mer i douka vin. Te krenn t'mer lačo koova, oun yon doukrenn t'men dran kova, palle sharell t'men o Devel.

Filiparja 4:18

Kanna hi man lauter, hoy man hounte vell djipaske, oun boudeder har doha. O Epafrodito anas mange kova lauter, hoy t'mer mange bičran. Kova hi yaake, har te anans t'mer o Debleske lačo koova, hoy soungell mishto, oun kay dikell lo lačes pre oun hi barhtelo pral kova.

2. Korintarja 6:1

Mer ham o Debleskre boudepangre. Doleske penah t'menge: Ma vitsrenn gar o Debleskro lačepen an i čik!

Remarja 15:30

Mire phrala, mangau t'mendar an o lab maro rayestar o Yezous Kristestar, oun an o kamlepen, hoy o Debleskro Dourho men das: Mangenn mantsa khetne o Debles o tselo djiyeha,

Remarja 15:16

Yob bičras man, te boudrap o Yezous Kristeske oun te djap pash kolende, kay kek bibolde hi, te sikrap len o Debleskro drom. Yaake hom har i rashay, kay anell kol menshen, kay kek bibolde hi, pash o Debleste. Oun o Devel dell len peskro Dourho, te venn le leskro. Oun yob dikell lačes ap lende.

Jeremia 6:20

Me poučau či pal o soungepaskro koova dran o them Saba, oun pal ko goudlo soungepaskro djet, hoy vell dran i dour them. Kol firhe, hoy t'mer mange rhačrenna, kamau me gar. Oun ap kol firhe, hoy t'mer mange marenna, dikau gar lačes.

Filiparja 1:20

Me patsau te rikrell man o Devel an o vast, oun kamau o tselo djiyestar te krap či, kay hounte ladjap man glan leste. Kamau gar, te trashap i menshendar. Yaake har rakrom hako tsiro o Yezous Kristestar, oun trashom lendar gar, yaake kamau les ninna kanna an o stilepen te krell, ninna te hounte merap, te dikenn i menshe ap miro djipen oun ap miro merepen, har baro oun raylo o Yezous Kristo hi.

1. Timoteo 2:3

Kova kamell maro Devel, kay das men o nevo djipen.

1. Tessalonikarja 5:12

Mire phrala, mer mangah t'men: Shounenn ap t'mare pralstunende, kay boudrenn mashkral t'mende! O Devel čivas len an pengri boudi, te sikrenn le t'men, hoy yob kamella!

Louka 7:47

Oun me penau touke kanna: Lakri bari doosh hi latar krik lino. Doleske kamell li man o tselo djiyeha. Koneske gar boud doosh krik lino vella, kova kamell man gar i tselo djiyeha.”

Hebrearja 13:22

Mire phrala, me mangau t'men, shounenn ap kol laba, hoy me t'menge an kava tikno liil činom!

1. Timoteo 5:4

Te hi kol djouvyen čave, čavengre čave, hounte venn kolla lenge koy. Yaake sikrenn yon, te patsenn le ap o Debleste. Oun yon parkrenn pen pash pengri day oun pengri mami, hoy kolla lenge lauter kran. Kova hi mishto glan o Debleskre yaka.

1. Tessalonikarja 4:10

Oun t'mer krenn o lačepen ap i patslende an o tselo them Macedonia. Mire phrala, moukenn gar tele, te krenn kova boudeder oun feteder!

Remarja 9:23

Kova kras lo, te sikrell lo peskro baro raylepen ap kolende, kay lan leskro kamlepen. Kolen rodas lo vin, te djivenn le leha khetne an leskro raylepen.

Hosea 14:2

Tou Israel, dja pale pash o baro Debleste, ko tiro Devel hi! Koy doosh, hoy ap toute anal, moukas tout an i bibarht te perell.

2. Korintarja 4:1

O Debles hi i baro dji menge, oun das men kay boudi, te sikras i menshende leskro drom. Doleske vah gar khino, te kras kova.

2. Korintarja 10:1

Me, o Paulo, rakrau t'mentsa kamles oun lačes, yaake har o Yezous Kristo kamles oun lačes hi. Hi menshe mank t'mende, kay penenna: “Me te hom pash t'mende, nay rakrau kek triin laba. Te hom dour t'mendar krik, palle rakrau zorele labentsa.”

5. Mose 14:2

T'mer han o baro Debleskre menshe. Yob hi t'maro Devel. T'men rodas lo vin dran i tsele themma ap i phoub, te venn i natsyona, hoy leske hi.

Filemon 1:10

Oun doleske mangau toutar miro čaveske, o Onesimo, te vess tou leske lačes. Kate an o stilepen penom leske o Yezous Kristestar. Oun yob vas patslo, oun vas miro čavo an o patsepen.