Mateo 2:13 - O Debleskro Lab 2024 (Sinte-Manouche)

¹³ Oun har yon penge djan, vas o Debleskro bolepaskro pash o Yosefeste an i souni, oun penas ap leste: “Ste pre! Le o ternepas oun leskri dat, oun naash an o them Egiptia! O Herodes moukell o ternepas te rodell, te marell lo les. Ač koy, bis te penau me les touke, te vess pale!”

O Debleskro Drom 2021 (Sinte)

¹³ Un har jon penge djan, was o Debleskro bolepaskro pash o Josefeste an i suni, un penas ap leste: “Ste pre! Le o ternepas un leskri dat, un naash an o them Egiptia! O Herodes mukell o ternepas te rodell, te marell lo les. Atch koi, bis te penau me les tuke, te wess pale!”

Mateo 2:13 Referans Kwoze

Bičepangre 12:11

Kanna djinas o Petro, kay kova kek souni his, oun yob penas: “Kanna djinau čačepah, kay bičras o ray Yezous peskro bolepaskres mange. Oun kova las man dran o Herodeskre vasta vin, ninna dran halauter, hoy kaman i bibolde mantsa te krell.”

Bičepangre 10:7

Har o bolepaskro peske djas, kharas o Kornelio douy boudepangren oun i patslo lourdes pash peste kolendar, kay his hako tsiro pash leste.

Bičepangre 5:19

An i rati vas i bolepaskro o Deblestar oun kras kol voudya an o stilepen pre, oun anas len vin, oun penas ap lende:

Mateo 2:12

Oun an i souni penas o Devel lenge, te djan le gar pash o Herodeste pale. Yaake djan le penge, te venn le ap i vavar drom an pengro them pale.

Mateo 1:20

Har leske kova an o shero trouyel djas, vas o Debleskro bolepaskro pash leste an i souni, oun penas: “Yosef, tou Davideskro čavo, ma traash, te less i Mariat pash toute, te romedineress lat! O ternepen vas dran o Debleskro Dourho an late.

2. Mose 1:22

Kanna penas o Farao ap i Egiptarya an peskro tselo them: “Kol tsele morsh čave, hoy neves boldo van, vitsrenn an o pani Nil! Oun i čen moukenn te djivell!”

Mateo 2:16

I goseve morsha djan ap i vavar drom an pengro them, oun van gar pash o Herodeste pale. Har yob kova hayvas, vas i bari rholi ap leste. Oun yob bičras lourden an o foro Betlehem oun an i gaba trouyel, te marenn le kol tsele morsh čaven, kay douy bersha oun terneder hi. Kol douy bersha his ko tsiro, kay i goseve morsha leske penan, te vas o čavo boldo bis ko dives.

Hiob 33:15

An i rat, te perell o sopen ap i menshende, dell lo len sounya. Te hi le čiddo ap pengro čiben,

Hiob 33:17

te anell lo len tele pengro čilačo dromestar, oun te rikrell lo len pale, te venn le pre-phourdo.

Josua 4:18

Oun har i rashaya kova kran, oun lengre herya ap o them čivan, vas o pani an o Yordan pale oun nashas pale yaake pral i tsele rigya har glan ko tsiro.

Debleskro tsiro 12:14

Oun koy djouvyake van čirklengre moussya dino, har i baro čirkles hi, te nay djal li an o moulo them ap ko kotar phoub, kay yoy nay djivella dour krik ko sapestar. Kote ačell li triin-te-paash bersha. Oun kote lell li halauter te rhal oun te piyell.

Bičepangre 16:36

Kova vas pash o Pauleste oun penas leske: “I čačepangre bičran man, te penap t'menge, te han t'mer gar bouder stildo. Avenn vin oun djan t'maro drom. Kek krell t'menge čilačepen!”

Bičepangre 10:22

Penan le: “O Kornelio, ko pralstouno i lourdendar, bičras men. Kova hi i lačo morsh, oun patsell ap o Debleste. I tsele bibolde rakrenn lačes pral leste. I Debleskro bolepaskro penas ap leste, te lell yob tout an peskro kheer, oun te shounell yob, hoy tou leske kameh te penell.”

Bičepangre 7:19

oun rodas i drom, har te rikrell lo mare menshen tele. Oun yon hounte boudran tel dava, oun hounte moukan pengre tikne čaven, te merenn yon.

Mateo 10:23

Te lenn le t'men an yek foro palla, palle nashenn an i vavar foro! Čačepah, me penau t'menge, t'mer venna gar an hako foro an o them Israel yaake rah har o Mensheskro Čavo gar pale vas.

Josua 3:17

Oun i rashaya, kay o morhton hidjrenn, kay o Debleskre deesh laba dren hi, kolla ačan tardo mashkral an o pani Yordan ap i phoub, hoy his bouder gar sapeno, bis te djan i tsele Israelitarya ap i vavar rig.

Debleskro tsiro 12:6

Oun koy djouvel nashas an o moulo them, kay kek menshe djivenna. Kote hi o Debles lake i kotar phoub, kay ačell li deesh-te-douy-sheel-te-shob-desha (1.260) divessa, oun lell halauter, hoy lat hounte vella djipaske.

Josua 4:10

Oun kol rashaya, kay ko morhton hidjrenn, ačan mashkral an o pani Yordan tardo, bis te halauter kerdo his, hoy o baro Devel ap o Yosua penas, te penell lo kova i tsele menshenge, yaake har o Mose kova ap o Yosua penas. Oun i tsele menshe djan sik vergel.

Debleskro tsiro 12:4

Oun leskri pori tserdell o triinto kotar kol bolepangre momelendar krik, oun vitsras len tele ap i phoub. Oun ko baro lolo sap hi glan koy djouvyate tardo, kay an o tsiro vas, te vell o ternepen. Oun yaake sik, har ko ternepen vals, kamas les lo pre te rhal.

Mateo 2:22

Ap o drom shounas lo, te hi o Arkelao kanna o baro ray pral o them Youdea. Kova his o Herodeskro čavo. Doleske trashas o Yosef, te djal lo kote pale. Oun o Devel penas leske an i souni, kay te djal. Oun yob djas an o them Galilea.

1. Rajengro liil 3:5

Kote an o foro Gibeon moukas pes o baro Devel o Salomeske an i souni te dikell an i rati. Oun o Devel penas: “Tou nay poučeh man, hoy kameh mandar.”

Mateo 2:14

Oun yob stas pre an koy rat, las o ternepas oun leskri dat, oun djas lentsa an o them Egiptia.

Bičepangre 12:7

Ap yek kopo his an ko stilepen i zoreli momeli, oun o Debleskro bolepaskro his koy tardo, oun das o Petres an i rig, djangras les pre, oun penas: “Ste sik pre!” Oun kol sasterne shelle peran leskre vastendar tele.

1. Rajengro liil 11:17

An ko tsiro his o Hadad i terno morsh. Oun yob nashas peske, oun khetne leha his Edomarya, kay his boudepangre leskro dadestar. Oun yon nashan an o them Egiptia.