Jesaja 42:25 - O Debleskro Lab 2024 (Sinte-Manouche)

²⁵ Kote moukas lo peskri bari rholi pral mende te vell, oun moukas men an i zorelo kourepen te vell. Leskri rholi his troul mende trouyel har i yag, oun mer hayvam kova gar. Ninna har rhačras men leskri rholi, lam kova gar an mare djia.

O Debleskro Drom 2021 (Sinte)

²⁵ Kote mukas lo peskri bari choli pral mende te well, un mukas men an i sorelo kurepen te well. Leskri choli his trul mende trujel har i jag, un mer haiwam kowa gar. Ninna har chatchras men leskri choli, lam kowa gar an mare djia.

Jesaja 42:25 Referans Kwoze

Hosea 7:9

I vavar menshe rhan leskri zoor, oun yob hayvell kova gar. O Efrayim hi har i phouro morsh, koleskre balla parno van. Oun yob hayvell gar, kay leskro tsiro sik trouyel hi.

Jesaja 57:11

Konestar trashal oun daral tou yaake, te rhorhral man oun bistral man, oun moukal man touke gar an o shero te vell? Hi kova gar yaake: I rah tsiro penom či koy pral. Oun doleske dareh bouder gar mandar.

Jesaja 57:1

O baro Devel penell: Kova, kay an o čačepen tardo his, meras. Oun kek lell kova an peskro dji. Oun kolla, kay rikran ap mande, nashran pengro djipen. Oun halauter krenna, har te vals kova gar lengro koova. Čačepah, ko čačo mensho vas vin lino dran o tselo čilačepen oun bibarht.

2. Rajengro liil 25:9

Oun yob rhačras o baro Debleskro kheer tele, ninna ko kheer o baro rayestar oun kol vavar khera an o foro Yerusalem; ava, hako baro kheer rhačras lo tele.

Nahum 1:6

Koon nay ačell tardo glan leskri rholi? Koon nay ačell djido, te vell lo rhoyedo? Leskri rholi rhačell har i yag. Ninna i berge phagenn an kotya glan leste.

Ezekiel 20:34

Oun me lau t'men vin dran kol tsele themma oun natsyone, kay tradedo van, oun anau t'men pale khetne. I zorelo vasteha oun i pre-hadedi moussyah oun bari rholyah krau me kova.

Jeremia 5:3

Baro Devel, tire yaka dikenn ap i djipen an o čačepen. Tou dal len i phagi. – Yon hayvenn kova gar. Tou kral len paash moulo. – Oun yon ačan, har yon hi. Yon djan pal pengro shero. oun kamenn gar pengro čilačo drom te moukell.

Jesaja 47:7

Oun tou penal: Me ačau rayetsa hako tsiro. Oun moukal gar an tiro dji te djal, te nay perals kava koova ap toute pale. Har kova vin djals, his touke či moldo.

Jesaja 29:13

O baro Devel, maro ray, penas: Kal menshe sharenn man labentsa. Lengre čipya hadenn man. Lengre djia hi dour krik mandar. Te mangenn le man an, rakrenn le palla, hoy lenge glan penlo vas.

Jesaja 9:13

Ap yek dives las o baro Devel lendar i pralstunen krik, ninna kol rhorhene rakepangren, kay penan, kay lengre laba o Deblestar van. Kova hi, har te činals yek i mačestar o shero oun o pori tele, oun i roukestar i patria oun i telstouno kotar. I phourende oun i an-dikle hi o shero. Kol rhorhene, kay penenn, lengre laba vans o Deblestar, hi o pori.

5. Mose 32:22

Miri rholi rhačell pre har i yag, oun rhačrell i tseli phoub, oun halauter, hoy ap late bares vas, oun rhačell tele bis an o telstunepen, oun vell bis tele pash i berge.

Hiob 40:11

Čore tiri tseli rholi vin, dik ap lauterende, kay pre-phourdo hi, oun vitse len tele!

Jesaja 5:25

Doleske moukell o baro Devel peskri rholi pral peskre menshende te vell. Oun yob hadell peskro vast ap lende oun dell len. Oun i berge trissenn. Oun i moule ačenn čiddo ap i dromma har čik. Oun an kova lauter moukell leskri rholi gar palla, leskro vast ačell hadedo, te dell lo trad.

Jesaja 9:19

Oun lengri bok hi yaake baro, te taprenn le pal rhapen ap hake rigya, oun rhan hako tikno kotar, oun venn gar čalo. Hakeno krell o djipen o vavarestar paash.

Jesaja 48:8

An kek tsiro shounan t'mer, hoy penom, vitar gar kaman kova te djinell. Oun i rah tsiro his t'mare kanda pandlo mire labenge. Čačepah, me djinom t'maro phoukepen. Oun yaake rah har ap i phoub han, venn t'mer kharedo: Kolla, kay kamenn či o Deblestar te djinell.

Jeremia 7:20

Doleske penell o baro Devel, maro ray: Miri bari rholi vell pral kava foro, pral i menshende oun pral i firhende, pral kol rouka an o veesh oun pral ko djob an kava them. Miri rholi hi har i yag, hoy kek nay krell vin.

Jeremia 12:11

Hi ropaske, har paash ko them glan mande čiddo hi, kek djivell bouder koy. O tselo them hi paash, oun kek khaytell les.

Ropaskre gilja 2:3

An peskri zoreli rholi phagas lo halauter tele, hoy o themes Israel zorelo kras. Har i lourde dran vavar themma van, tserdas lo peskro čačo vast mendar pale. Oun o Yakobeskro them kras lo paash, yaake har i bari yag halauter pre rhačrella.

Ropaskre gilja 2:4

Yob rikras peskro bogo, oun las i faylo an peskro čačo vast, har yek, kay kourell pes mentsa. Oun har i kourepaskro maras lo halauteren, kay menge kamlo oun kouč his. Oun leskri rholi vas pral mende har i zoreli yag.