Jesaja 27:10 - O Debleskro Lab 2024 (Sinte-Manouche)

¹⁰ I zorelo foro hi mouklo. Kek djivell bouder an i shoukar khera. O foro hi har i divyo mouklo them, kay i groumya rhan oun pen tele čivenn, oun o zenlepen ap i bourra rhan.

O Debleskro Drom 2021 (Sinte)

¹⁰ I sorelo foro hi muklo. Kek djiwell buder an i shukar khera. O foro hi har i diwjo muklo them, kai i grumja chan un pen tele tchiwenn, un o senlepen ap i burra chan.

Jesaja 27:10 Referans Kwoze

Jesaja 17:2

Kol forya an Syria hi mouklo, oun i firhe nay rhan kote, oun kek hi koy, kay len krik tradell.

Micha 3:12

Doleske vell o Debleskro foro trouyel vitsedo har i harhetikri phoub. Oun an o foro Yerusalem ačell kek bar ap o vavar. Ap i berga, kay o Debleskro kheer tardo hi, venn divye bourra baro. Kova lauter vell yaake dran t'mari doosh.

Jeremia 26:18

“Har o Hiskiya o baro ray pral Youda his, penas o Debleskro rakepaskro, o Mika dran o foro Moreshet, ap i tsele menshende an Youda: Kova penell o baro Devel, ko ray pral o bolepen oun i phoub: I dives vell, kay vell o foro Sion yaake trouyel vitsedo har i harhetikri phoub, te vell o pralstouni phoub tele oun i telstouni phoub pral. O forestar Yerusalem ačell či pral har barra. Oun ap koy berga, kay kanna o Debleskro kheer tardo hi, vell i divye bourra bares.

Jeremia 26:6

palle krau kava khereha har ko khereha an Shilo. Oun me krau, te penenn i vavar menshe, te kamenn le yekes te praasell: Mou djal touke har o foreske Yerusalem!

Jesaja 17:9

An kol divessa hi lengre zorele barrengre forya mouklo čiddo, har i forya, hoy i Hivarya oun i Amorarya pal pende moukan, har nashan le penge glan i Israelitaryen. Oun kek mensho djivell bouder koy.

Ezekiel 36:4

Doleske shounenn, t'mer berge Israel, hoy o baro Devel penell! Kava penell o baro Devel, maro ray, ap i bare oun tikne berge, ap i panya oun tale, ap i barra, hoy i tele-phagede kherendar pral ačan, oun ap i moukle forya. I menshe dran i themma troul t'mende, randan t'men vin, oun t'mer van lenge sapaske.

Ropaskre gilja 5:18

te dikah mer ap i berga Sion, kay li yaake moulo koy čiddo hi, oun i divye djoukle pral late nashenna.

Ropaskre gilja 1:4

I dromma pash i berga Sion hi mouklo. Kek vell an o foro an kol bare divessa. I tsele foreskre voudya hi pre, i rashayenge hi ropaske, i terne ča rovenna. Har pharo hi kova lauter o foreske!

Jesaja 64:10

Maro raylo Debleskro kheer, kay sharan tout mare phoure, rhačras i yag pre, oun maro shoukar koova hi khetne stakedo čiddo.

Jesaja 25:2

Tou kral o zorelo foro paash. Lestar ačas či pral har barra. Ko foro, kay i zoreli massouri troul leste his, hi čiddo an kotya. Kote, kay rayen dran vavar themma pengre shoukar khera his, hi kek foro bouder. Oun kek nay čivell len pale pre.

Jesaja 7:25

Ninna koy phoub, hoy kanna i harhetikri phoub hi, vell yaake pherde soubyengre bourra oun soubyengro zenlepen, te darenn i menshe, te djan le koy. Oun yon tradenn i groumya koy, oun i bakre stakrenn lauter khetne.

Jesaja 7:21

An ko tsiro hi yek morshes yek terni groumni oun douy bakre.

Jesaja 32:19

Ninna te denn brishineskre barra o veesh paash, oun o foro djal tele,

Jesaja 35:1

Barhteles vell ko them, hoy kanna tato oun moulo hi. Oun o divyo trouk them sal, oun lauter an leste djivell pre oun anell bloume vin.

Jesaja 49:21

Palle poučeh toutar an tiro dji: Koon anas mange yaake boud čaven ap i phoub? Me homs mouklo, kek čaventsa, kokres oun krik tradedo. Oun kolla kote, koon tserdas len bares? Ačom me gar kokres pral? Kay his kolla?

Jeremia 25:37

Lengro them, hoy yaake shoukar his, hi palle i moulo them. O baro Devel an peskri rholi kras les paash.

Jeremia 52:27

Oun o baro ray pral o them Babilonia moukas len temerl te dell an o foro Ribla, hoy an o them Hamat čiddo hi. Yaake hounte djan i menshe dran o them Youda an o pandepen.

Jesaja 24:10

Tele phagedo oun khetne stakedo hi o foro, hako kheer hi tele pandlo, te nay vell kek dren.