Jeremia 4:7 - O Debleskro Lab 2024 (Sinte-Manouche)

⁷ I marepaskro, hoy marell i menshen an boud themma, stas pre. Har i levo, hoy vell dran o veesh, kras lo pes ap o drom, te dell yob t'maro them paash oun rhačrell t'mare forya yaake, kay nay djivell kek koy dren.

O Debleskro Drom 2021 (Sinte)

⁷ I marepaskro, hoi marell i menshen an bud themma, stas pre. Har i lewo, hoi well dran o weesh, kras lo pes ap o drom, te dell job tumaro them paash un chatchrell tumare forja jaake, kai nai djiwell kek koi dren.

Jeremia 4:7 Referans Kwoze

Jeremia 5:6

Doleske venna leve dran o veesh oun marenn len; divye djoukle dran o divyo oun trouk them dandrenn len an kotya, oun bare divye margodje lourenn glan lengre forya. Hakeno, koon vin vella, vella an kotya dandedo. Lengri doosh hi boud oun phari. Boud kope djan le mandar krik.

Jeremia 2:15

O levo dell gole pral leste, dell zorelo gole oun krell leskro them paash. Oun leskre forya venn pre rhačedo yaake, kay nay djivenn kek koy dren.

Jesaja 6:11

Oun me poučom: “Har rah, ray?” Oun yob penas: “Bis te bouder kek menshe an i forya djivenn, vitar kek mensho an i khera, oun ko harhetikri phoub har i moulo them vas.”

Jesaja 1:7

T'maro them hi i moulo them, t'mare forya van tele rhačedo. Glan t'mare yaka rhan i vi-themarya kova, hoy ap t'mari phoub bares vas. Lauter hi moulo oun paash, har te perans i divye koy pral.

Daniel 7:4

O ersto his har i levo, oun les his čirklengre moussya har i adlari. Oun me dikom, har i bare čirklengre moussya lestar krik lino van. Oun ko firho vas pre hadedo i phoubyatar, oun pre-čiddo ap peskre pire har i mensho. Oun les vas o dji i menshestar dino.

Jeremia 50:17

O Israel his har i nashedo bakro, hoy lan i leve palla. Ko ersto his o baro ray dran o them Assour, kova rhas les. Pal leste vas o baro ray pral o them Babilonia, o Neboukadnezar. Kova dandras ko mass tele, hoy ap leskre kokale ačas.

Jeremia 25:9

Doleske moukau kol lourden te vell dran i themma, kay kote čiddo hi, kay norden hi. Lengro pralstouno hi o baro ray, o Neboukadnezar, dran o them Babilonia. Koles rodom vin, te krell yob, hoy kamau. Kolla perenn pral t'mende oun t'maro them, ninna pral kol tsele themma kay trouyel. Kal themma moukau yaake paash te dell, te ačell či har barra pral hako tsireske. Oun i vavar menshenge, kay kova dikenn, ačell o rakepen krik i trashatar, oun yon denn i vasta pral o shero khetne.

Jeremia 49:19

Har i levo vin vell dran i bourra pash o pani Yordan, vau me, oun tradau i Edomaryen sik dran lengro them, oun čivau koles pral o them, kones me vin rodom. Kek hi har me! Kek hounte penell mange, hoy te krap! oun kek ray hi zorleder har me!

Jeremia 34:22

Ava, me kharau len pale kay, oun anau len pale glan kava foro, penell o baro Devel. Yon venn troul kava foro tardo, oun lenn kava fores penge dren, oun rhačrenn les tele. Oun kol forya an o them Youda moukau yaake khetne te dell, te venn le har i moulo them, kay nay djivell bouder kek dren.

Jeremia 33:10

Kova penell o baro Devel: T'mer penan: Kava them hi i moulo them, kek menshe oun kek firhe djivenn kote. Djinenn, kal forya an o them Youda oun i dromma o forestar Yerusalem, kay kanna yaake paash dino hi, te hi kote bouder kek mensho oun kek firho dren,

Jeremia 26:9

Hoske peneh tou glan-vi an o baro Debleskro lab: Kava khereske djal har koleske an Shilo? Hoske peneh, kay kava foro vell yaake paash dino, te djivell bouder kek koy dren?” Oun i tsele menshe van troul leste an o baro Debleskro kheer.

Jeremia 25:38

Yob djas vin, har i terno levo vin vell dran peskro khatepen, te marell lo. Oun lengro them ačas khetne stakedo čiddo. Yaake baro his o kourepen, oun o baro Debleskri rholi pral lende.

Jesaja 5:9

O baro Devel, ko ray pral o bolepen oun i phoub, das pes sovel oun penas glan mire kanda: Kol boud khera venn paash dino, oun kek djivell bouder an kol bare shoukar khera!

2. Rajengro liil 24:1

An ko tsiro, har o Yoyakim o baro ray his, djas o baro ray dran o them Babilonia peskre lourdentsa pre ap o them Youda. Leskro lab his Neboukadnezar. Oun o Yoyakim hounte vitsras pes tel leste oun hounte playsras leske boud love. Pal triin bersha phagas lo leha oun kras bouder gar, hoy kova kamas.

Daniel 5:19

Doleske daran oun trissan i menshe dran hako them oun rakepen lestar. Oun yob maras, yaake har yob kamas, oun moukas koles te djivell, kones yob kamas, te ačell lo djido. Yob hadas menshen oun kras vavaren tikno, yaake har leske shoukar his.

Jeremia 50:44

Har i levo vin vell dran i bourra pash o pani Yordan, vau me oun tradau i Babilonaryen sik dran lengro them, oun čivau koles pral o them, kones me vin rodom. Kek hi har me! Kek hounte penell mange, hoy te krap! oun kek ray hi zorleder har me!

Jeremia 27:8

Kanna penau t'menge, te hounte krenn t'mer, hoy kamell o baro ray dran Babilonia t'mendar, yaake har hounte krell i gouroum, koles i kasht troul leskri meen hi, kova, hoy leskro ray kamell. Hako them peskre menshentsa, hoy kamell kova gar te krell, koles dau i phagi. Leskre menshe hounte merenn an o kourepen, i bokatar oun dran nasslepen, bis te moukau o Neboukadnezares ko them dren te lell.

Jeremia 9:11

Me poučom: Baro Devel, hoske rhačell ko them oun vell moulo, yaake kay nay djal kek bouder koy trouyel? Koon hi gosevo oun hayvell kova? Ap koneste penal tou kova, yaake te penell yob kova i vavarenge?

2. Rajengro liil 25:1

Har o Sedekya an o enyato bersh baro ray his, vas o baro ray pral o them Babilonia, o Neboukadnezar, peskre tsele lourdentsa pre glan o foro Yerusalem. Kova his ap o deshto dives an o deshto čon. Oun yob čivas peskre lourden troul o tselo foro, oun moukas čik pre te vitsrell troul o foro, te krell lo i drom, hoy djal pral ap o foreskri massouri.

Jeremia 4:29

Dran kol tsele forya nashenn le penge glan koy gole kol lourdendar, kay klissenn ap i graya, oun kolendar, kay denn karye, oun nashenn an pesse vesha oun khatrenn pen mashkral i barra. Hako foro vell mouklo čiddo. Kek djivell bouder koy dren.

Jeremia 22:7

Me bičrau lourden pash toute, kay krenn tiro kheer paash; hakenes lendar hi peskro tover an o vast oun dell kol vi-rodede pesse kashta an kotya oun vitsrell len an i yag.

Jeremia 44:2

Kava penell o baro Devel, ko ray pral o bolepen oun i phoub, kay o Israeleskro Devel hi: T'mer dikan koy tseli bibarht, kay me moukom pral o foro Yerusalem te vell, oun pral kol tsele forya an o them Youda; kava dives hi lendar či har barra pral, oun kek djivell bouder an kol forya.

Ezekiel 12:20

An kol forya djivell bouder kek. Oun o harhetikro them vell i moulo them. Palle dikenn oun hayvenn t'mer, te hom me o baro Devel.

Ezekiel 21:31

Me, o baro Devel, tiro ray, penau touke: Krik ko dikleha troul tiro shero! Le i rayeskri stadi tele! Či ačell har his. Kova, kay pral his, vell tele. Oun kova, kay tele his, vell pral!

Ezekiel 32:2

Tou, mensho, gib i ropaskri gili pral o Farao, ko baro rayeste o themestar Egiptia, oun pen leske: Tou patseh, te hal har i terno levo, o bareder ray mank i tsele rayende, oun hal har i baro čilačo firho an o baro pani. An kol lengste panya, kay djiveh, phourdal dourho dran tiro nak, te das o pani pre karye. Oun tire heryentsa stakral yaake, te vas i čik dran o pani pre oun o pani čiklo.

3. Mose 26:31

Me moukau t'mare forya an kotya te dell, oun dau kol platse paash, kay t'mare rhorhene deblen an-mangan. Oun kova, hoy t'mer mange rhačrenn, oun ko lačo soungepen, hoy vell vin, kova kamau bouder gar te soungell.

3. Mose 26:33

T'men tradau me mank i menshende an i vavar themma, oun lau t'men o rhareha palla. T'maro them vell i moulo them, oun t'mare foryendar ačell či pral har barra.

Jeremia 8:16

Kolla, kay kamenn te kourenn pen mentsa, hi pash o foro Dan tardo. Foun kotar shounah koy gole lengre grayendar. O tselo them trissell koy golyatar hoy i graya denn. Yon venna oun rhan ko tselo them pre, lauter, hoy ap ko them hi, kol forya oun lauter, hoy koy dren djivella.

Jeremia 22:6

Oun kova hi, hoy o baro Devel penell pral o kheer o baro rayestar pral o them Youda: Ninna te kamau kava kheer yaake har i vesha an o them Gilead oun i berge Libanon, krau kava foro har i moulo foro, kay kek bouder djivell.

Jeremia 46:18

Me dau man sovel pash miro djipen, penell o baro ray, koleskro lab hi o baro Devel, o ray pral o bolepen oun i phoub’: I baro ray vella, kay hi bareder har i tsele vavar, yaake har i berga Tabor bareder hi har i berga troul late, oun har i berga Karmel hadell pes pash o baro pani.