Jeremia 22:5 - O Debleskro Lab 2024 (Sinte-Manouche)

⁵ Te shounenn t'mer gar ap kal laba, vell kava kheer paash dino. Kova dom man sovel pash mande kokres, penell o baro Devel.

O Debleskro Drom 2021 (Sinte)

⁵ Te shunenn tumer gar ap kal laba, well kau kheer paash dino. Kowa dom man sowel pash mande kokres, penell o baro Dewel.

Jeremia 22:5 Referans Kwoze

Amos 6:8

O baro oun zorelo Devel, ko ray pral o bolepen oun i phoub, das pes sovel pash peskro djipen oun penas: Me hom rhoyedo pral o pre-phourdepen o Yakobeskre čavendar, oun nay dikau lengre shoukar khera bouder gar glan i yaka. Doleske dau o foro oun lauter, hoy koy dren hi, an i vasta vavar menshendar.

Hebrearja 6:13

Te dell i mensho peskro lab, dell lo peskro dadeskro vast koy pre. Leskro dad hi bareder har yob. Yaake sikrell lo o vavares, te krell lo čačepah kova, hoy yob penas. Oun ko vavar patsell les. Har das o Devel o Abrahameste peskro lab, das lo peskro vast koy pre. His kek, kay his bareder har o Devel. Oun o Devel penas: Čačepah, boud barht moukau pral toute te vell, oun toutar venna boud boud čave. Oun o Abraham patsas o Debles, oun vitsras gar peskro patsepen ap i rig. Oun yaake las lo kova, hoy o Devel leske penas.

Jeremia 17:27

Te shounenn t'mer gar ap mande, oun djivenn ap o Debleskro dives har ap hako vavar dives, oun hidjrenn t'maro koova ap o Debleskro dives dren an kol voudya o forestar Yerusalem, palle čivau me yag an kol voudya, te rhačrenn i zorele khera pre an Yerusalem. Oun kek nay krell koy yag vin.

1. Mose 22:16

oun penas: “O baro Devel penell: Tou kamal tiro yek čaves mange te marell. Kova kamal tou mange te krell. Doleske dau man ap mande sovel, te čivap miri zoor oun miri barht ap toute. Oun toutar venna boud boud menshe. Yon venn yaake boud har bolepangre momlia ap o bolepen hi, oun har i santa pash o baro pani. Oun tire čave, kay pal toute venna, venna ray pral kolende, kay kourenn pen lentsa oun lenn kolengre forya krik.

Jeremia 39:8

Kol lourde dran Babilonia rhačran o baro rayeskro kheer oun kol tsele menshengre khera an o foro Yerusalem, oun dan o foreskre massurya tele.

Jesaja 1:20

Kamenn t'mer gar te shounell, oun pandenn t'mare djia glan mande, palle venn o rhareha moulo dino. Kova penau me, o baro Devel!”

Hebrearja 6:17

Har das o Devel peskre menshen peskro lab, das lo ninna peskro vast koy pre. Yaake sikras lo len, te dell lo len čačepah kova, hoy yob lenge penas.

Hebrearja 3:18

Kanna penenn mange: Pral koneste rakras o Devel, har yob pes sovel das, te venn le gar an leskro them, kay yon hako tsiro khere vans? Yob rakras kolendar, kay shounan gar ap leste.

Micha 3:12

Doleske vell o Debleskro foro trouyel vitsedo har i harhetikri phoub. Oun an o foro Yerusalem ačell kek bar ap o vavar. Ap i berga, kay o Debleskro kheer tardo hi, venn divye bourra baro. Kova lauter vell yaake dran t'mari doosh.

Debleskri gili 95:11

Doleske dom man sovel an miri rholi: “Yon te djan gar dren an miro them, kay nay vans le khere!”

2. Familjakro liil 7:22

Palle vell lenge penlo: “Yon moukan o baro Debles, ko Debles lengre phourendar, koles kay len dran o them Egiptia vin anas. Yon rikran pen ap i vavar debla. Glan lende djan le ap pengre čanga oun mangan len an. Doleske anas yob kay tseli bibarht pral lende.”

2. Familjakro liil 7:19

Te moukenn t'mer miro drom, oun rikrenn t'men gar ap mire laba oun miro čačepen, hoy me t'menge dom, oun djan pash vavar debla, oun mangenn len an, oun vitsrenn t'men glan lende tele ap i phoub,

Mateo 23:38

Doleske moukell o Devel peskro kheer pash t'mende oun djivell bouder gar koy.

Jeremia 26:4

Pen lenge: Kova hi, hoy o baro Devel penell: Me bičrom t'menge mire rakepangre, kay mange boudrenn, te penenn le t'menge, hoy te krenn. Boud kope bičrom len pash t'mende. T'mer dan gar yak ap kova, hoy le penan. Te shounenn t'mer gar ap mande oun djan gar ap miro drom, hoy t'mende sikrom, oun denn gar yak ap i laba, hoy mire rakepangre t'menge penenn,

Jeremia 44:26

Kanna shounenn, hoy o baro Devel t'menge penell, t'mer halauter dran o them Youda, kay djivenn an o them Egiptia: Me dau man sovel pash miro baro lab, penell o baro Devel, te vell miro lab bouder gar vin rakedo kol menshendar dran o them Youda, kay kate an o them Egiptia djivenn. Kek lendar hounte penella: “Pash o djido Debleste, maro rayeste!”

2. Familjakro liil 7:21

Oun hakeno kay djal kate, oun dikell, hoy pral ačas kava kherestar, hoy kanna yaake baro oun raylo hi, koleske ačell o rakepen krik i trashatar, oun yob penell: “Hoske kras o baro Devel savo koova kava themeha oun kava khereha?”

Jeremia 12:7

Me moukom mire menshen, ko kheer Israel. Kolen, kay mange vin rodom, tradom mandar krik. Kol menshen, kay o djiyestar kamau, dom an i vasta kolendar, kay kamenn len te marell.