Jakobo 1:25 - O Debleskro Lab 2024 (Sinte-Manouche)

²⁵ Koon dikell pale oun pale an o Debleskro lačo lab, hoy i menshen vin lella dran lengro phouro djipen, ko mensho bistrell gar, hoy yob dikas oun shounas. Oun kova krella, hoy ko lab penella. Koles dell o Devel peskri barht an lauter, hoy yob krella.

O Debleskro Drom 2021 (Sinte)

²⁵ Koon dikell pale un pale an o Debleskro latcho lab, hoi i menshen win lella dran lengro phuro djipen, ko mensho bistrell gar, hoi job dikas un shunas. Un kowa krella, hoi ko lab penella. Koles dell o Dewel peskri bacht an lauter, hoi job krella.

Jakobo 1:25 Referans Kwoze

Louka 11:28

Koy penas lo: “Barhtele hi kolla, kay ap o Debleskro lab shounenna, oun kova ninna krenna, hoy o Devel penella.”

Johanni 13:17

T'mer djinenn kova kanna halauter. Te krenn t'mer kova, han barhtelo.

1. Petro 2:16

T'mer han bouder gar pandlo ap o čilačepen. Doleske penenn gar: “Mer nay krah halauter, hoy kamah.” Oun pal savo rakepen khatrenn t'mer t'maro čilačepen. Ma bistrenn, kay han pandlo ap o Debleste!

Jakobo 2:12

Rakrenn oun djivenn pal o Debleskro čačepen! Kava čačepen lell i menshen dran kova vin, hoy len pandas.

Galatarja 5:1

O Yezous Kristo las men vin dran hako koova, ap kova pandlo hams. Ačenn zoreles oun moukenn t'men bouder gar te pandell!

1. Korintarja 15:58

Doleske, mire kamle phrala, ačenn zoreles an o patsepen! Ma moukenn t'men kekestar o Debleskro dromestar tele te anell! Avenn hako tsiro o Debleske koy, oun boudrenn leske mishto! T'mer djinenna: Kay boudi, hoy leske krenna, hi gar čičeske.

1. Timoteo 4:16

De garda ap toute, har tou djiveh oun har tou sikreh o Debleskro drom! Kre ko koova, hoy touke penom! Yaake djah tou ap o drom pash o Debleste. Oun kolla, kay shounenn ap kova, hoy tou peneh, aneh tou ninna ap ko drom.

2. Korintarja 13:5

Dikenn ap t'mende, har t'mer an o patsepen tardo han! Hi t'maro patsepen čačo? Djivell o Yezous Kristo mank t'mende? Te hayvenn t'mer gar, te hi lo mank t'mende, palle hi t'maro patsepen či moldo.

Remarja 11:22

Yaake dikah, o Devel nay vell lačo, oun yob nay dell i phagi. Kolla, kay peran leskro dromestar tele, kolen dell lo i phagi. Lačo hi lo ap t'mende, kay djivenn dran leskro lačepen. Te djivenn t'mer bouder gar dran leskro lačepen, činell lo t'men ninna tele.

Gosewe laba 14:15

Koles či an o shero hi, kova patsell hako lab, hoy yek ap leste rakrell. Kones i gosevo dji hi, kova dell yak, hoy lo krell oun kay lo djal.

Remarja 8:15

O Devel das t'men gar peskro Dourho, te darenn lestar, har i boudepangre darenna pengro rayestar. Na-a, t'mer han o Debleskre čave. Oun o Debleskro Dourho krell, te penah mer: “Tata” ap o Debleste.

Galatarja 2:4

His vavar morsha koy. Yon kran, har te vans le patsle. Yon kaman te dikell, har kol patsle djivenna, kay bouder gar ap o Moseskre laba pandlo hi. Mer, kay ham bouder gar pandlo ap kol laba, djivah kanna pal o Yezouseskre laba. Oun kol morsha, kay djivenn gar pal o Yezouseskre laba, kaman, te vas mer pale pandlo ap o Moseskre laba.

Johanni 8:36

Te krell o Debleskro čavo, kay han bouder gar pandlo, yaake han čačepah bouder gar pandlo.

Debleskri gili 106:3

Barhteles hi kolla, kay leskre laba rikrenna, oun hako tsiro o čačepen krenna.

Debleskro tsiro 14:13

Oun me shounom, har i rakepen dran o bolepen penas: “Čin kova an i liil dren: Kanna oun an ko tsiro, hoy vella, hi kolla barhtele, kay merenna oun rikran zoreles pengro patsepen ap o rayeste, o Yezouseste.” “Ava,” penell o Debleskro Dourho, “lenge djal lačes, oun yon bistrenn pengri tseli phari boudi. Kova, hoy yon kran o Debleske hi gar bistedo an o bolepen.”

1. Timoteo 2:15

I djouvel vell sharedo, te lell li čaven, oun te patsell li ap o Yezouseste, oun te hi lat o Debleskro kamlepen an lakro dji, oun te djivell li i djoudjo djipen glan o Debleste oun glan i menshende.

Remarja 7:12

Mer djinah: O Moseskre laba venna o Deblestar. Lauter, hoy yob mendar kamella, vell lestar, oun hi čačo oun lačo.

Bičepangre 26:22

O Devel his hako dives pash mande. Oun kanna hom kate tardo, oun penau barenge oun tiknenge, hoy o Devel kras. Me penau či vavares, har kol Debleskre rakepangre oun o Mose glan i rah tsiro penan.

Bičepangre 13:43

Oun har i menshe dran i biboldengri kangri vin djan, nashan boud lendar o Pauleske oun o Barnabeske palla. Kolla his bibolde oun save, kay lan i biboldengro patsepen an. Oun o Paulo oun o Barnabas rakran boudeder lentsa oun penan lenge: “Rikrenn ap ko patsepen, kay o Devel i doosh kolendar krik lella, kay patsenn ap leskro čaveste.”

Hebrearja 12:15

Denn yak, te čivell kek o Debleskro lačepen ap i rig! Denn yak, te djal kek čilačo rakepen mashkral t'mende trouyel, oun krell o patsepen boud patslendar paash! Savo rakepen hi har i čilačo rhourhour, hoy krell kolen nasselo, kay les rhana.

Bičepangre 2:42

Oun hako tsiro van le khetne oun shounan, hoy o Yezouseskre bičepangre lenge penan. Oun yon rhan o maro khetne, oun mangan o Debles an.

Jesaja 8:20

Rikrenn t'men ap o Debleskro drom, oun ap kova, hoy yob t'mende sikrell! Te penenn i menshe t'menge vavar koova, palle vell lenge kek momeli ap lengro drom.

Debleskri gili 119:45

Hoy tou mange penal, krau me. Doleske djau barhteles miro drom.

Debleskri gili 119:32

Miro dji hi dour pre, te krap lauter yaake har tou mandar kameh.

1. Samuel 12:14

Har kamoms, te sharenn t'mer o baro Deblestar, kay t'maro Devel hi, oun mangenn les kokres an, oun shounenn ap leste oun krenn, hoy yob t'menge penella! Har kamoms, te djan t'mer oun t'maro baro ray, kay pral t'mende hi, o Debleskro drom!

Debleskro tsiro 22:14

Barhtele hi kolla, kay pengre ripya djoudjes thovenna. Yon nay rhan ko roukestar, hoy o djipen della, oun nay djan an kol bare voudya an ko foro dren.

1. Johanni 2:24

T'menge penau: Rikrenn kol laba an t'mare djia, hoy shounan, har t'mer patslo van! Te ačenn kol laba an t'mende, hoy t'mer shounan, har patslo van, yaake ačenn t'mer khetne o Debleskro čaveha oun o Debleha, maro dadeha.

Kolossarja 1:23

Yek koova hounte krenn t'mer: Ačenn ap o Yezouseskro drom! Patsenn zoreles ap leste! Moukenn gar tele, te dikenn ap kova, hoy t'men hi pash o Debleste! Rikrenn zoreles ap leskro lačo lab, hoy t'menge penlo vas! Ko lab vas penlo ap i tseli phoub. Ninna me, o Paulo, hounte penap ko lab i menshenge. Kova hi miri boudi.

Remarja 2:13

Glan o Debleste hi kolla čačo, kay krenna, hoy yob kamella, oun gar kolla, kay shounenn kol laba oun krenn gar, hoy kol laba penenna.

Remarja 8:2

Oun o Debleskro Dourho, koles o Yezous Kristo men das, hi kanna o ray pral mende. Oun kova dell men o djipen oun lell men vin dran o čilačepen oun o merepen.

Galatarja 6:2

Yek hounte dikell ap ko vavareste oun hidjrella leha, hoy an leskro dji leske doukrella. Yaake krenn t'mer kova, hoy o Yezous Kristo t'mendar kamella.