Hosea 11:8 - O Debleskro Lab 2024 (Sinte-Manouche)

⁸ Har nay moukaus me toutar, Efrayim, har nay daus tout an o vast kolendar, kay marenn tout, Israel? Kraus me touha, har krom kol foryentsa Adma oun Seboyim? Na-a, kova phagals miro dji! Tou khayteh man yaake!

O Debleskro Drom 2021 (Sinte)

⁸ Har nai mukaus me tutar, Efrajim, har nai daus tut an o wast kolendar, kai marenn tut, Israel? Kraus me tuha, har krom kol forjentsa Adma un Zebojim? Na-a, kowa phagals miro dji! Tu khaiteh man jaake!

Hosea 11:8 Referans Kwoze

Jeremia 31:20

Efrayim, tou hal miro kouč čavo, miro čavo, koles kamau boud! Hako kopo, kay hounte dap les trad, vell lo mange gar dran o shero. Miro dji dell zoreles an mande: me hounte vap leske lačes, penell o baro Devel.

Mateo 23:37

T'mer menshe an o foro Yerusalem! T'mer maran o Debleskre rakepangren, oun dan kolen i barrentsa moulo, kay o Devel pash t'mende bičras. Boud kope kamom t'men pash mande te lell, te dap garda ap t'mende, har i karhni ap peskre terne garda della, oun lell len tel peskre phora. Oun t'mer kaman gar.

Hosea 6:4

Hoy te krap touha, Efrayim? Hoy te krap touha, Youda? T'mer moukenn man yaake sik har i folka, hoy taysarlakro krik djal, oun har ko pani, hoy ap o zenlepen hi.

5. Mose 32:36

Čačepah o baro Devel dell peskre menshende lengro čačepen. Te dikell lo, har leskre boudepangre nashran pengri zoor, khaytenn le les. Te dikell lo, har kek ap lengri rig hi, krell yob peskro dji lenge pre.

5. Mose 29:23

Palle penenn i menshe dran i tsele vavar themma: “Hoske kras o baro Devel kava kau themeha? Hoske vas lo yaake rhoyedo?”

Judas 1:7

Yaake lan ninna kol menshe i phagi, kay djivan an i forya Sodom oun Gomorra oun an kol forya troul lende. Yon kran vi-ladjedo koova har kol bolepangre oun djan vavar mass palla. I phagi, hoy pral kol menshende vas, sikrell mende, hoy kolenge djal, kay savo koova krenna. Yon djan an i yag, hoy hako tsiro rhačella.

2. Petro 2:6

Oun o Debleskri rholi vas pral kol forya Sodom oun Gomorra. Oun yob rhačras kol forya yaake te ačas či har barra oun yagakri čik. Yaake sikras yob kolende, kay pal lende venna, hoy djal kolentsa, kay gar ap leste shounenna.

Amos 4:11

His save forya pash t'mende, kay krom yaake paash, har krom i forya Sodom oun Gomorra paash. Oun t'mer hans har i kotar kasht, hoy vas vin tserdedo dran i yag. Ninna palle van t'mer gar pale pash mande, penell o baro Devel.

Ropaskre gilja 1:20

Ah, baro Devel, dik, har boud traash man hi, har i douk an mande rhačella! Miro dji rissrell pes an mande! Hoske shounom gar ap toute? Glan o kheer tapras o rharo mire čaven, oun an o kheer meran le dran i djoungelo nasslepen.

2. Rajengro liil 13:23

Oun o baro Devel his lačo ap i Israelende oun kras peskro dji lenge pre oun dikas kamles ap lende, yaake har yob peskro lab das o Abrahameste, o Isaakeste oun o Yakobeste. Oun yob das len gar an o merepen oun vitsras len gar pestar krik bis ap kava dives.

2. Samuel 24:16

Har sikras ko bolepaskro peskro vasteha ap o foro Yerusalem, te vell ko nasslepen koy, khaytas o baro Debles koy bibarht. Oun yob penas ap ko bolepaskro, kay anas o merepen pral i menshende: “Kanna hi doha! Le tiro vast lendar krik!” O Debleskro bolepaskro his tardo ap koy djobeskri platsa o morshestar Arauna. Kova his i Yebousari.

Čačepangre 10:16

Oun yon vitsran kol vavar deblen pendar krik oun mangan o baro Debles an. Koy khaytas les, te vell o Israeleske yaake pharo kerdo.”

1. Mose 14:8

Kanna djan kol panč raya pral i forya Sodom, Gomorra, Adma, Seboyim oun Bela dran i forya vin. Bela kharella kanna Soar. Oun yon djan pengre lourdentsa an i tala Siddim.

Debleskro tsiro 18:18

Kolla lauter dikan koy yag, hoy ko fores pre rhačras, oun dan gole, oun penan: “Kek foro his yaake shoukar har kava!”

Debleskro tsiro 11:8

Oun kal moule morsha hi ap o drom čiddo an ko baro foro, kay ninna lengro ray ap o troushel maredo vas. Kava foro hi har o foro Sodom oun har o them Egiptia.

Zefanja 2:9

Me, o baro Devel, kay hom o ray pral o bolepen oun i phoub oun o Israeleskro Devel, me dau man sovel pash miro djipen: Ko dives vella, kay djal kol themenge Moab oun Ammon har i foryenge Sodom oun Gomorra. Hako tsireske venn kal themma i moulo them, kay loneskre groube hi, oun divyo zenlepen bares vella. Kolla, kay mire menshendar djido ačan, yon randenn len vin, oun lenn penge ninna lengro them.

Amos 7:6

Koy khaytas ninna kova o baro Debles. Oun o baro Devel, maro ray, penas: “Kova te vell gar yaake!”

Amos 7:3

Koy khaytas kova o baro Debles, oun yob penas: “Mishto, kova vell gar yaake!”

Ropaskre gilja 3:33

Yob hi gar barhtelo, te dell lo i menshes peskri phagi, oun anell o ropen pral leste.

Jeremia 9:7

Lengro rakepen hi har fayle, hoy anenn o merepen. Peskro mouyeha rakrell hakeno kamles, an o dji lourell yob, har te taprell lo o vavares.

Jeremia 3:12

Dja koy oun de kol laba gole ap kolende, kay djivenn an o norden oun pen: “Tou Israel, kay djal mandar krik, am pale”, penas o baro Devel. Palle kamau bouder gar rhoyedo ap t'mende te dikell. Man hi i dji t'menge, oun kamau gar hako tsiro rhoyedo te vell ap t'mende.

Jesaja 63:15

Dik dran o bolepen tele, oun dik tele dran tiro raylo kheer! Kay hi tiro kamlepen, hoy menge rhačell? Kay hi tiri zoor? Hi tout bouder kek dji oun kek lačepen menge?

Debleskri gili 106:45

palle vas an leskro shero, hoy kras lo lentsa vin, te hi lo lengro Devel. Oun an peskro baro lačepen khaytan le les.

1. Rajengro liil 3:26

Oun koy djouvyake, kay lakro ternepen djivas, rhačras lakro dji peskro čaveske, oun yoy das gole ap o baro rayeste: “Miro ray, mangau tout, de lat ko ternepen djides, oun mare les gar!” Koy vavar penas: “Na-a, yob te vell gar miro, vitar gar tiro. Činenn les an douy kotya!”

Jesaja 16:11

Doleske rovell miro dji pral i menshende an o them Moab. Lauter an mande trissell o foreske Kir-Heres.

Jeremia 18:8

Te moukenn yon palle pengro čilačo koova, khaytell man kova, kay dom len trad, te vell bibarht pral lende.

Jeremia 42:10

Te ačenn t'mer an kava them, palle moukau me t'men pale bares te vell, oun me phagau t'men gar khetne; me krau t'men zoreles, oun tradau t'men gar vin dran o them; man khaytell, kay hounte anom savi bibarht pral t'mende.

Ropaskre gilja 3:32

Ninna te doukell lo yekes, vell lo leske pale kamles. Yaake baro hi leskro lačepen.

Ezekiel 6:9

Kote, kay le pandle hi, vau me lenge an o shero. Oun yon dikenn dren, te dom len i phagi koleske, hoy yon kran: Yon phagan mantsa oun nashan rhorhene deblen palla. Palle rissrell lenge halauter an pende pral ko tselo djoungelo koova, hoy yon kran.

Ezekiel 33:11

Pen ap lende: O baro Devel, maro ray penell: Me dau man sovel pash miro djipen: Mange hi gar shoukar, te merell o čilačo mensho. Na-a me kamaus, te djal lo peskro čilačo dromestar tele, oun djivell lo! Doleske, djan tele t'mare čilače dromendar! Hoske kamenn t'mer te merell, t'mer dran o kheer Israel?

Hosea 7:1

Hako kopo, kay kamau mire menshenge lauter pale mishto te krell, palle sikrell pes, havi doosh o Efrayim ap peste anas, oun har baro o čilačepen kol menshendar an o foro Samaria hi. Yon hi rhorhepangre. Čorepangre phagenn an i khera dren. Oun randepangre čorenn i menshen vin ap o drom.

Micha 5:3

Oun yob, ko nevo ray, dell garda ap lende, har i bakrengro garda dell ap peskre bakren. Leskro Devel bičras les, oun leskri zoor vell lestar, o baro Deblestar. An ko tsiro djal leskro raylepen oun leskri zoor yaake dour har i phoub hi. Oun i menshe an leskro them nay djivenn kek daryah.

5. Mose 29:22

Yon dikenn: O them hi rhačedo, i phoub pherdo loon oun shvefla. Lauter dikell vin har i forya Sodom oun Gomorra, Adma oun Seboyim, har o baro Debleskri bari rholi ap lende vas oun yon rhačedo van. Kek nay vitsrell djob an i phoub. Či vell bares. Kek zenlepen djal pre.

2. Familjakro liil 36:15

Oun o baro Devel, lengro phourengro Devel, bičras boud bičepangren pash lende, te dell lo len trad. Les khaytan peskre menshen oun peskro kheer.

Jeremia 9:6

Doleske penell o baro Devel, ko ray pral o bolepen oun i phoub: Har o roup an i yag djoudjes kerdo vell, yaake kamau mire menshen doukentsa djoudjes te krell. Dell či vavares, hoy krap me nay mire menshenge.