Gosewe laba 15:15 - O Debleskro Lab 2024 (Sinte-Manouche)

¹⁵ Kolen, kay i pharo dji hi, kolenge hi hake divessa čilače. Yekes, kay shoukapen an o dji hi, leskro dji givell oun bashrell hako dives.

O Debleskro Drom 2021 (Sinte)

¹⁵ Kolen, kai i pharo dji hi, kolenge hi hake diwessa tchilatche. Jekes, kai shukapen an o dji hi, leskro dji giwell un bashrell hako diwes.

Gosewe laba 15:15 Referans Kwoze

2. Korintarja 6:10

Menge hi ropaske, oun mer nay sanah. Mer ham čorvelo, oun krah i vavaren bravelo. Men hi či ap kay phoub, oun lauter hi menge.

Remarja 12:12

Avenn barhtele oun dikenn ap o lačepen, hoy ap t'mende vella an ko tsiro, hoy vella! Te vell t'maro djipen pharo, rikrenn vin! Mangenn o Debles hako tsiro!

Gosewe laba 15:13

I barhtelo dji moukell o mouyes te sal. Kones i pharo dji hi, koles hi či sapaske.

Gosewe laba 17:22

I barhtelo dji hi mishto tiro sastepaske. Te hi touke hako tsiro ropaske, nashreh tiri zoor.

Remarja 5:11

Oun kova hi gar lauter. Mer ham yaake barhtelo, te vas o Devel maro Devel. Maro ray, o Yezous Kristo, anas men leha khetne.

2. Korintarja 1:5

Yaake har vell boud pharo koova ap mende o Yezous Kristeske, yaake dell lo men ninna boud zoor an o dji.

Bičepangre 16:25

Deesh-te-douyenge an i rat sharan o Paulo oun o Silas o Debles, oun givan leske i gili. Oun kol vavar stilde shounan kova, har yon givan.

1. Petro 4:13

Te venn douka ap t'mende, djinenn: save douka van ninna ap o Yezous Kristeste. Doleske avenn barhtelo! Ap ko dives, kay leskro raylepen diklo vella, givenna oun bashrenna t'mare djia i barhtyatar.

Gosewe laba 16:22

Čačo gosvepen hi har djido pani koleske, kay les hi. O dinlepen hi i phagi kolenge, kay dinelo hi.

2. Korintarja 1:12

Maro dji penell menge, mer djivam maro djipen čačes oun djoudjes, yaake har o Devel kamella. Doleske nay sharah men. Mer rakram pral o Debleskro lačepen oun penam či, hoy vella dran maro menshengro gosvepen. T'mer djinenna, yaake djivam gar kokres mank i vavar menshende, na-a, ninna pash t'mende.

1. Mose 47:9

Penas o Yakob: “Hom 130 (sheel-te-triyanda) bersh phouro. Kova hi kek phourepen. Man hi kek shoukar djipen. Mire phoure van phoureder har me.”

1. Mose 37:35

Oun leskre tsele čave oun ča van pash leste, te rakrenn le leha lačes. Oun yob kamas gar, te vell leskri douk krik lino. “Na-a” penas yob, “miro dji rovella, bis te merau oun vau pash miro čaveste.” Yaake rovas leskro dad pral o Yosefeste.

Gosewe laba 15:14

Yek, kay hayvell, hoy mishto oun gar mishto hi, kova rodell, har te djinell lo gomme boudeder. O narvelo bokell pal dinelo koova.

Gosewe laba 15:16

Hi feteder, te hal čorvelo oun djiveh o baro Debleha, har te hi tout i baro bravlepen oun hounte daress halautereske.