Filiparja 3:3 - O Debleskro Lab 2024 (Sinte-Manouche)

³ Mer, kay ap o Yezous Kristeste patsah, ham čačepah o Debleskre menshe. Ap mende hi o Debleskro Dourho. Yaake nay krah o Debleskri boudi. Mer ham barhtelo pral kova, hoy o Yezous Kristo menge kras oun hounte rikras kek koova, hoy vella i menshendar. Mer djinah, savo koova nay anell men gar pash o Debleste.

O Debleskro Drom 2021 (Sinte)

³ Mer, kai ap o Jesus Kristeste patsah, ham tchatchepah o Debleskre menshe. Ap mende hi o Debleskro Ducho. Jaake nai krah o Debleskri budi. Mer ham bachtelo pral kowa, hoi o Jesus Kristo menge kras un hunte rikras kek koowa, hoi wella i menshendar. Mer djinah, sawo koowa nai anell men gar pash o Debleste.

Filiparja 3:3 Referans Kwoze

Kolossarja 2:11

Har moukan t'maro phouro djipen pal t'mende, van t'mer o Debleskre menshe. I bibolde van činlo i vastentsa ap pengro mass. T'mer van gar činlo i vastentsa. Na-a! T'mer lan i nevo dji, hoy das t'men o Yezous Kristo.

Remarja 7:6

Kanna hi o Moseskre laba, kay pandan men, bouder gar o ray pral mende. Len hi bouder kek zoor pral mende. Mer djah kanna ap o nevo drom oun djivah yaake, har o Debleskro Dourho men sikras, oun gar yaake har an kol Moseskre lila činlo hi.

5. Mose 30:6

T'maro baro Devel dell t'men djia, hoy shounenn oun krenn, hoy lo t'mendar kamell. T'men oun kolen, kay t'mendar venna, dell lo save djia, yaake te kamenn t'mer t'maro baro Debles o tselo djiyestar oun t'mari tseli zoryah. Oun t'mer ačenn djido.

Galatarja 5:25

O Debleskro Dourho das men o nevo djipen. Doleske djivas yaake, har yob kamella.

Remarja 8:15

O Devel das t'men gar peskro Dourho, te darenn lestar, har i boudepangre darenna pengro rayestar. Na-a, t'mer han o Debleskre čave. Oun o Debleskro Dourho krell, te penah mer: “Tata” ap o Debleste.

Jeremia 4:4

Rikrenn t'men ap i laba, hoy t'mentsa vin krom! Oun krenn t'mare djia mange pre, t'mer menshe an Youda oun Yerusalem. Te krenn kova gar, vell miri rholi pral t'mende har yag, oun rhačella yaake, te nay krell kek koy yag vin.

Debleskri gili 105:3

Sharenn koles, koon kokres o čačo Devel hi! Avenn barhteles pral leste, t'mer, kay rodenn o baro Debles!

5. Mose 10:16

Doleske shounenn kanna ap o baro Debleste, oun djan gar bouder pal t'maro shero!

Efesarja 6:18

Rakrenn hako tsiro o Debleha! Mangenn lestar kova, hoy o Debleskro Dourho an t'mare djia čivella! Ma moukenn tele te mangell les i tsele patslenge!

Remarja 1:9

Maro Devel, koleske boudrau o tselo djiyeha oun penau i menshenge leskro čavestar, yob djinella, me penau o čačepen: Me moukau gar tele, te mangap les t'menge.

Maleachi 1:11

O baro Devel, ko ray pral o bolepen oun i phoub, penell: Foun kotar, kay o kham pre djala, bis kote kay o kham tele djal, vell miro lab sharedo pash kolende an i vavar themma. An boud gaba oun forya rhačrenn le mange soungepaskro koova oun firhen, hoy hi lačo an mire yaka. Kolla lauter sharenn miro lab.

Jesaja 45:25

O baro Devel čivell o tselo Israel an o čačepen. Oun yon venn barhtelo pral kova, hoy me, o baro Devel, krom.

Judas 1:20

T'mer, mire phrala oun phenya, ačenn zoreles an t'maro patsepen, hoy das t'men o Devel. Oun mangenn les yaake, har leskro Dourho an t'mende kamell.

Remarja 15:17

O Yezous Kristo das man kay boudi. Doleske ladjap gar, te rakrap pral kova, hoy krau o Debleske.

Remarja 8:39

či, hoy pral an o bolepen hi oun či, hoy tele an i phoub hi, oun kek vavar, hoy djivella, nay krell, te kamell men o Devel bouder gar. Kova, hoy maro ray, o Yezous Kristo, menge kras, sikrell men, har baro o Debleskro kamlepen hi.

Remarja 9:6

Kanna penau kate gar, te hi o Debleskro lab bouder či moldo, hoy yob ap i Israelitarya penas. Na-a! Hoy kamau te penell, hi kova: I tsele Israelitarya hi gar lauter o Debleskre menshe.

2. Korintarja 11:18

Boud menshe hi koy, kay sharenn pen pral kova, hoy yon krenna. Doleske kamau me kova kanna ninna te krell.

Galatarja 6:16

Me kamoms, te dell o Devel peskri barht oun peskro kamlepen lauterende, kay rikrenn pen ap kal laba. Mou vell kova ninna ap i tsele Debleskre menshende an Israel!

Filiparja 1:1

Mer, o Paulo oun o Timoteo, činah kava liil. Mer boudrah o Yezous Kristeske, oun činah kava liil ap lauterende, kolen o Devel vin gole das an o foro Filipi, te patsenn le ap o Yezous Kristeste. Kava liil hi ninna i pralstunenge, kay denn garda ap i patslende, ninna kolenge, kay krenn o Debleskri boudi mashkral i patslende.

Filiparja 3:12

Ninna te hom gomme gar yaake har kamoms te vap, oun hom gomme gar kote, kay kamau te vap, nashau o Yezouseskro drom, te lap o djipen pash o Debleste. Koleske das man o Yezous Kristo gole.

Filiparja 3:14

Me nashau ap o Yezouseskro drom doureder, te lap ko shoukar koova, hoy dell o Devel kolen, kay gar pre dan. Kova hi o djipen pash leste an o bolepen. Doleske das lo men gole, te djivas o Yezous Kristeha khetne.