Filiparja 2:15 - O Debleskro Lab 2024 (Sinte-Manouche)

¹⁵ Yaake djivenn t'mer, har mishto hi. Oun kek hatsell i doosh ap t'mende. T'mer han o Debleskre čave, oun djivenn mashkral kol menshende, kay hi čilačo oun nashran pen an boud dinelo koova. Mashkral kolende han t'mer har i momlia an i rati,

O Debleskro Drom 2021 (Sinte)

¹⁵ Jaake djiwenn tumer, har mishto hi. Un kek hatsell i doosh ap tumende. Tumer han o Debleskre tchawe, un djiwenn mashkral kol menshende, kai hi tchilatcho un nashran pen an bud dinelo koowa. Mashkral kolende han tumer har i momlia an i rati,

Filiparja 2:15 Referans Kwoze

1. Petro 2:12

T'mer djivenn mank i menshende, kay o Debles gar prindjrenna. Doleske djivenn yaake, te hatsenn le kek čilačepen ap t'mende! Oun kolla, kay rakrenna djoungeles pral t'mende, kolla hounte dikenn o lačo koova ap t'mende, yaake te sharenn le o Debles ap ko dives, kay yob vella.

Mateo 5:45

Yaake han t'mer čačepah čave o baro Deblestar, kay hi t'maro dad an o bolepen. Yob moukella o kham pre te djal kol čilačenge oun kol lačenge. Oun yob dell brishin ap kolende, kay pal o čačepen djivenna, ninna ap kolende, kay čilačo koova krenna.

Jesaja 60:1

Ste pre, Yerusalem, ab raylo har o kham! I nevo dives vell touke, oun o Debleskro raylepen djal pre pral toute.

1. Tessalonikarja 5:23

O Devel kras i drom, te vas pash leste. Lestar mangau, te krell lo t'maro tselo djipen djoudjo glan leste, te rikrell lo t'men an peskre vasta, yaake te hatsell lo kek doosh ap t'mende ap ko dives, kay vell maro ray, o Yezous Kristo, pale.

5. Mose 32:5

T'mer moukan leskro drom, oun han bouder gar moldo te kharenn leskre čave. Pherdo čilačepen oun rhorhepen han t'mer.

2. Petro 3:14

Lače phrala oun phenya, t'mer kamenna, te vell ko dives sik. Doleske krenn lauter, te vell či mank t'mende oun o Debleste tardo! Djivenn yaake, te hi t'men i djoudjo dji, oun te hatsell o Devel kek doosh ap t'mende ap ko dives, kay venna glan leste tardo!

1. Korintarja 1:8

Yob dell t'men i zoor, te ačenn an o patsepen, bis te vell lo pale. Oun kek nay anell i doosh ap t'mende ap ko dives.

Tito 2:10

te čorenn le či lestar! I boudepangre hounte krenn pengri boudi mishto oun čačo. Yaake sikrenn le an hako koova, har mishto o Debleskro drom hi, hoy lende siklo vas. Oun yaake sharenn le o Debles, kay las men vin dran o čilačepen.

1. Petro 2:9

T'mer han kolla, kay o Devel peske vin rodas. T'maro baro ray hi o Yezous Kristo. Koleskre rashaya han t'mer, te venn leske koy. T'mer han o Debleskre menshe, kolen yob khetne gole das, te penenn t'mer i menshenge, havo baro oun lačo koova o Devel kras. Yob las t'men dran i rati vin, oun anas t'men pash peste, kay hi lauter shoukar oun djoudjo.

Mateo 5:48

T'mer hounte venn yaake lačes ap i menshende, har t'maro dad an o bolepen hi lačes ap i menshende.

1. Timoteo 3:10

Lenn t'men i tsiro, te dikenn t'mer, har yon djivenna. Te nashte rakrell kek pral lende djoungelo koova, palle nay boudrenn le i patslenge an o Debleskro kheer.

1. Timoteo 3:2

I phoureder hounte djivell yaake, te hatsell kek i doosh ap leste. Les vell gar boudeder har yek romni. Yob rakrell kek dinelo koova, oun dell pes yak, hoy yob rakrell oun krell. Yob moukell pes gar an djoungelo koova te tserdell. Yob lell i vavaren lačes an peskro kheer dren. Yob sikrell mishto o Debleskro drom.

Filiparja 1:10

Yaake nay dikenn, hoy mishto oun čačo hi. Oun ap ko dives, kay vell o Yezous Kristo pale, han t'mer an o čačepen glan leste tardo, oun kek doosh hi ap t'mende.

Efesarja 5:27

Yaake kras lo len rayles oun shoukar. Kek djoungelo oun čilačo koova hi ap lende. Djoudjo oun erligo hi le glan leste tardo.

Remarja 16:19

Boud menshe shounan, kay t'mer ap o Debleste patsenn oun ap leste shounenn. Doleske hom me barhtelo pral t'mende. Oun me kamau o tselo djiyestar, te hayvenn t'mer boud oun boudeder, hoy lačo hi, oun te krenn kek čilačo koova.

Bičepangre 2:40

Oun boud vavar labentsa rakras o Petro lentsa, oun mangas len, oun penas ap lende: “Moukenn t'men vin te lell dran o čilačepen, te lenn gar koy phagi, hoy vell pral kal čilače menshende, kay djivenn an kava tsiro.”

Mateo 10:16

Djinenn, me bičrau t'men har bakre mank i divye djouklende. Doleske venn gosevo har i sapa oun djoudjo har i parne čirkle, an kolende kek rhorhepen hi!

Hebrearja 7:26

O Yezous hi o baro rashay, kay hounte vell men. Yob hi lačo glan o Debleskre yaka. Kek čilačepen, vitar kek doosh hi ap leste. Na-a, yob hi gar yaake har mer čilače menshe ham, kay ham pale-čiddo glan o Debleste. Oun o Devel kras les bareder har hako vavar an o bolepen.

Tito 2:15

Pen kava lauter i patslenge! Rake an lengre djia! Te krenn le čomone, hoy gar mishto hi, pen les lenge an o Debleskri zoor! Hakeno hounte shounell ap toute.

Tito 1:6

Savo phoureder hounte djivell yaake, te dikell kek i čilačo koova ap leste. Les vell gar boudeder har yek romni. Leskre čave shounenn ap leste, oun patsenn ap o Debleste. Yon hi gar bipandlo.

1. Timoteo 5:20

Kolla, kay kran čilačo koova, kolen dess trad glan lauterende, te vell kol vavaren daar.

Bičepangre 20:30

Ninna dran t'mende venn morsha, kay penenn i patslenge rhorhene laba, hoy gar o Deblestar vella. Oun yon tserdenn i patslen ap pengri rig.

Johanni 5:35

O Yohanni his i momeli, kay rhačas. Oun i tikno tsiro hans t'mer barhtelo pral kova, hoy yob penas oun kras.

Louka 6:35

Me penau t'menge: Avenn lačes kolenge, kay hi čilačo ap t'mende! Krenn kolenge lačepen! Patsenn t'mare love vin ap kolende, kay t'mer gar djinenna, te lenn t'mer lendar čomone pale! Te krenna t'mer kova lauter, palle dell o Devel t'men peskro bravlepen an o bolepen, oun t'mer venn o baro Debleskre čave. O Devel hi ninna lačes ap kol menshende, kay čilače hi, oun kay parkrenn pen gar pash leste.

Mateo 17:17

Koy penas o Yezous: “T'mer čilače menshe, t'men hi kek patsepen! Har rah hounte ačap pash t'mende? Har rah marap man t'mentsa tele? Anenn les pash mande!”

Debleskri gili 122:5

Kote hi beshdo ap pengre rayengre beshepangre kol bare raya, kay venna dran o kheer David, te rakrenn le o čačepen vin pral i menshende.

Debleskro tsiro 3:9

Shounenn, hoy me kol bengeskre menshentsa krau, kay rhorhenn oun penenn pendar, te hi le o Debleskre menshe, oun yon hi kek Debleskre menshe. Me krau, te venn le pash t'mende, te vitsrenn le pen glan t'mende ap i phoub, oun te hayvenn le, te kamau t'men o tselo djiyestar.

1. Timoteo 5:14

Doleske kamau, te romedinerenn kol terne djouvya pale, te lenn yon čaven, oun te boudrenn yon an pengro kheer, yaake te nay penell kek djoungelo koova pral i patslende.

1. Timoteo 5:7

Pen i patslenge, te djivenn le pal kal laba, te hatsell kek i doosh ap lende!

2. Korintarja 6:17

Doleske penell o Devel: Djan kolendar krik, kay sharenn vavar koova! Ma avenn lentsa khetne! Lenn či an t'mare vasta, hoy hi pale-čiddo glan mire yaka! Palle lau t'men kamles pash mande pre.

Louka 1:6

O Zakari oun i Elisabet his lačo an o Debleskre yaka. Oun yon shounan ap o Debleste, oun kran lauter, hoy an o Debleskro lab činlo his.

Gosewe laba 4:18

O drom kolendar, kay o čačepen krenn, hi har o kham, hoy taysarlakro pre djal, oun o dives anell oun zorleder vell bis te hi lo pralstounes tardo.

Gosewe laba 8:8

Lauter, hoy rakrau, hi čačo. An miro rakepen hi kek rhorhepen, či hoy gar čačo hi.

Daniel 6:4

Oun o Daniel his gosveder oun feteder har kol tsele vavar raya oun pralstoune. Oun doleske his o baro rayes an peskro dji, te čivell lo les pral o tselo rayeskro them.

Filiparja 3:6

Miri tseli zoryah lom kolen palla, kay ap o Yezous Kristeste patsenna. Me krom kova lauter, hoy an o Moseskre lila činlo hi, oun kek nay anas i doosh ap mande.

Debleskro tsiro 2:5

Moukenn t'menge kova an o shero te djal, har dour t'mer mandar tele peran. Avenn pale o tselo djiyeha pash mande! Djivenn ko djipen, hoy djivan, har t'maro patsepen ap mande terno his. Te krenn kova gar, palle vau, oun lau t'mari momeli krik, oun čivrau lat ap i rig.

2. Mose 34:35

Har vas lo vin, te penell lo ap i Israelitarya, hoy o baro Devel leske penas, dikan yon, har leskro mouy hi har o kham. Palle khatras o Mose peskro mouy pale tel ko diklo, bis te djas lo pale dren, te rakrell lo o baro Debleha.