Ezekiel 7:9 - O Debleskro Lab 2024 (Sinte-Manouche)

⁹ Me dikau bouder gar lačes ap t'mende. Man khaytenn t'mer gar. Ko djoungelo koova, hoy kran, vell ap t'mare sherya pale. Oun t'mer lenn t'mari phagi. Oun t'mer dikenn oun hayvenn palle, te hom me o baro Devel, kova kay t'men dell.

O Debleskro Drom 2021 (Sinte)

⁹ Me dikau buder gar latches ap tumende. Man khaitenn tumer gar. Ko djungelo koowa, hoi kran, well ap tumare sherja pale. Un tumer lenn tumari phagi. Un tumer dikenn un haiwenn palle, te hom me o baro Dewel, kowa kai tumen dell.

Ezekiel 7:9 Referans Kwoze

Debleskro tsiro 20:13

Oun o baro pani das peskre moulen vin, kay an leste hi. Oun o merepen oun o moulengro them dan pengre moulen vin, kay an lende hi. Oun pral lende vas o čačepen vi-rakedo yaake, har hakeno djivas ap i phoub.

Galatarja 6:7

Ma patsenn, te krenn nay o Debleha, har t'mer kamenna! T'mer te krenn lačo koova, lenn t'mer lačo koova pale pale. T'mer te krenn čilačo koova, lenn t'mer čilačo koova pale pale.

Micha 6:9

Shounenn, hoy dell o baro Devel gole pral o foro Yerusalem! – Koon gosevo hi, kova lell leskre laba ap o dji! Shounenn, t'mer menshe, kay venn khetne an o foro!

Jesaja 9:13

Ap yek dives las o baro Devel lendar i pralstunen krik, ninna kol rhorhene rakepangren, kay penan, kay lengre laba o Deblestar van. Kova hi, har te činals yek i mačestar o shero oun o pori tele, oun i roukestar i patria oun i telstouno kotar. I phourende oun i an-dikle hi o shero. Kol rhorhene, kay penenn, lengre laba vans o Deblestar, hi o pori.

Jeremia 21:7

Oun koy pal dau me o Sedekya, ko baro rayes pral Youda, an kol vasta o baro rayestar pral Babilonia, o Neboukadnezar, ninna leskre pralstunen oun kol menshen kate an kava foro, kolla, kay gar meran ap o nasslepen, an o kourepen oun i bokatar. Kova penau me, o baro Devel. Me dau t'men an i vasta kolendar, kay kamenn t'men te marell. O Neboukadnezar moukell t'men lauteren o rhareha moulo te dell, oun les khaytell kova gar, oun yob krell peskro dji t'menge pandlo.

Ropaskre gilja 2:17

O baro Devel kras, hoy lo peske glan las. Oun kras kova, har lo menge glan i rah tsiro trad das. Les khaytal tou gar, har moukas lo tout khetne te dell, oun kolen, kay ap toute djan, i zorleder te vell. Har tou peral, nay san le.

Ezekiel 7:8

Sik čorau miri rholi pral t'mende vin. Oun djau rholyah t'mentsa trouyel, bis te miri rholi trouyel hi. Me rakrau o čačepen pral t'mende vin, oun t'mer lenn t'mari phagi. Ko tselo djoungelo koova, hoy kran, anau ap t'mare sherya pale.

Ezekiel 7:10

Dikenn ko dives! Dikenn, hoy vella! I bibarht hi glan o voudar. O čilačepen vas boud oun boudeder. Oun o pre-phourdepen hi baro.

Ezekiel 23:49

Oun ko vi-ladjedo koova, hoy kran, vell ap t'mende pale. Oun t'mer lenn t'mari phagi koleske, kay mangan i rhorhene deblen an. Palle dikenn oun hayvenn t'mer, te hom me o baro Devel, t'maro ray.

Jeremia 13:14

Yaake har kol khore phagenn, te venn le khetne dino, yaake krau, te phagell yek ap o vavareste, ninna i dada ap lengre čavende. Yon khaytenn man gar, oun i dji hi man vitar gar lenge, oun rikrau man gar pale, te marap len lauter. Kova penell o baro Devel.

Jeremia 36:31

Me moukau i phagi te vell pral toute, tire čavende oun pral i pralstunende pash toute t'maro čilačepaske. Pral t'mende oun kolende an Yerusalem oun Youda anau me koy tseli bibarht, kolah t'men trad dom, doleske kay kek t'mendar shounas ap mande.

Ezekiel 5:11

T'mer kran miro kheer pale-čiddo kol rhorhene deblentsa oun djoungelo koveha, hoy kote kran, penau me, o baro Devel, t'maro ray. Doleske dau man sovel, me o djido Devel, te dap t'men paash. T'mer khaytenn man bouder gar oun me krau miro dji bouder gar t'menge pre.

Ezekiel 22:22

Yaake har o roup an o bob gar ačell hoy lo his, yaake djal t'menge, te vell o foro Yerusalem har i bob t'menge. Oun t'mer dikenn oun hayvenn palle, te hom me o baro Devel, kay čoras peskri rholi pral t'mende vin.