Ezekiel 39:21 - O Debleskro Lab 2024 (Sinte-Manouche)

²¹ Oun me sikrau i menshenge an vavar themma, har baro oun raylo me hom. Halauter dikenn, har me o čačepen vin krau pral o Gog, oun havi zoryah dau les oun leskre lourden pengri phagi.

O Debleskro Drom 2021 (Sinte)

²¹ Un me sikrau i menshenge an wawar themma, har baro un railo me hom. Halauter dikenn, har me o tchatchepen win krau pral o Gog, un hawi sorjah dau les un leskre lurden pengri phagi.

Ezekiel 39:21 Referans Kwoze

Ezekiel 38:23

Oun yaake sikrau me glan i yaka boud menshendar dran vavar themma, te hom i zorelo Devel. Oun yon dikenn oun hayvenn palle, te hom me o baro Devel.

Ezekiel 38:16

Oun tou djah ap mire menshen Israel pre, oun tire lourde čakrenn o them har i folka. An o palstouno tsiro vell kova yaake, te moukau tout pral miro them te vell, te nay dikenn i menshe an vavar themma, koon me hom. Te dikenn le hoy krau touha, Gog, hayvenn le, te hom me o Devel.

Ezekiel 36:23

T'mer kran, kay vas djoungeles rakedo pral miro baro lab mank i menshende an vavar themma. Oun me krau, te vap pale sharedo. Kova hoy krau t'menge, sikrell lende, te hom čačepah o Devel. Oun yon hounte dikenn oun hayvenn, te hom me o baro Devel. Kova penau me, o baro Devel, t'maro ray.

Jesaja 37:20

Kanna, maro baro Devel, le men vin dran o vast o baro rayestar pral o them Assour, te nay dikenn oun hayvenn i menshe an i tsele themma ap kay phoub, kay tou, baro Devel, kokres o Devel hal.”

2. Mose 9:16

Me moukom tout doleske djido, te dikess miri bari zoor, oun te rakrenn le mandar ap i tseli phoub.

2. Mose 7:4

Oun o Farao shounella gar ap t'mende, ninna te vell miri rholi boud kope pral leste oun leskro them. Oun palle lau mire menshen, i Israelitarya, vin dran o them Egiptia.

Maleachi 1:11

O baro Devel, ko ray pral o bolepen oun i phoub, penell: Foun kotar, kay o kham pre djala, bis kote kay o kham tele djal, vell miro lab sharedo pash kolende an i vavar themma. An boud gaba oun forya rhačrenn le mange soungepaskro koova oun firhen, hoy hi lačo an mire yaka. Kolla lauter sharenn miro lab.

Ezekiel 39:13

Oun i tsele menshe an o them Israel paskrenn len. Koleske venn le sharedo i vavar menshendar ap ko dives, kay sikrau har baro oun raylo hom. Kova penell o baro Devel, maro ray.

Jesaja 26:11

Baro Devel, tiro vast hadal dour pre, te dess len trad. Oun yon kamenn gar te dikell. Mouk len dren te dikell, havo kamlepen tout tire menshenge hi, te ladjenn le pen. Rhače len pre an tiri yagakri rholi, kolen kay kamenn tout gar.

1. Samuel 6:9

Palle sikrell pes, havi rigyatar koy bari bibarht pral mende vas: Te djan le pre an lengro them, ap o drom an Bet-Shemesh, palle his o baro Devel, kay savi bari bibarht ap mende anas. Te djan le ap i vavar rig, palle hayvah, te his gar leskro vast, hoy men das, oun kava tselo koova čičeske ap mende vas, oun kek bičras les.”

1. Samuel 5:11

Koy dan le pale i tsele rayen pral i Filistarya khetne gole oun penan: “Bičrenn o morhton o Israeleskro Deblestar pale, kay lo vas, te marell lo men oun mare menshen gar.” I bari daar his an o tselo foro, fothe phares his o Debleskro vast ap lende čiddo.

1. Samuel 5:7

Har dikan oun hayvan le, hoske kova yaake hi, penan le: “Kova hi o Israeleskro Devel, kay čivas koy phagi ap mende oun ap maro debleste Dagon. Ma moukenn o morhton, kay leskre laba dren hi, pash mende te ačell.”

2. Mose 14:4

Palle pandau me leskro dji, te lell lo len palla. Oun me sikrau miro barepen oun miri zoor ap leste oun ap leskre tsele lourdende. Oun i Egiptarya hayvenn: Me hom o baro Devel.” Oun i Israelitarya kran yaake har o Mose lenge penas.

2. Mose 8:19

Oun tou dikess, te hi vavarčandes pash mire menshende har pash tire menshende. Ko baro koova vell taysar pral t'mende.”

Debleskri gili 32:4

Miro Devel, dives oun rati his tiro vast phares ap mande čiddo, oun miri djipaskri zoor djas yaake peske mandar, har o zenlepen peskri zoor nashrella an o tato niyal.

Micha 2:9

I djouvyen tradenn t'mer dran lengre khera, hoy lenge boud moldo hi. Oun ko lačo koova, hoy man lengre čavenge hi, lenn t'mer lendar krik hako tsireske.

Debleskri gili 94:10

Kova, kay i menshen an i vavar themma čingrell, dell lo t'men kek phagi? Yob hi o sikepaskro halauterendar – hi les kek gosvepen?

Maleachi 1:5

Ko tsiro vella sik, kay dikenn kova t'mare yakentsa, oun palle penenn t'mer: O baro Devel hi zorelo pral o them Israel oun doureder vin.”