Ezekiel 22:11 - O Debleskro Lab 2024 (Sinte-Manouche)

¹¹ Ko yek sovell i vavareskri romyah, oun ko vavar sovell peskro čaveskri romyah oun krell lat yaake pale-čiddo. Pale i vavar taprell zoryah peskri phenyat an, ko čat peskro dadestar.

O Debleskro Drom 2021 (Sinte)

¹¹ Ko jek sowell i wawareskri romjah, un ko wawar sowell peskro tchaweskri romjah un krell lat jaake pale-tchiddo. Pale i wawar taprell sorjah peskri phenjat an, ko tchat peskro dadestar.

Ezekiel 22:11 Referans Kwoze

2. Samuel 13:14

O Amnon shounas gar ap late, tapras lat, peras pral late, oun sovas lah.

3. Mose 20:17

Te sovell i morsh peskri penyah, i čay leskro dadestar oder leskri datar, hi kova i bari ladj. Kol douy hounte venn moulo dino glan i tsele menshende. Ko morsh sovas peskri phenyah, oun hounte hidjrell peskri doosh.

3. Mose 18:15

Tou sovess gar tiro čaveskri romyah.

3. Mose 18:9

Tou sovess gar tiri phenyah, koy čay tiro dadestar oder tiri datar; hi yek te vas li bares an tiri familya oder an i vavar familya.

Ezekiel 18:11

hoy leskro dad gar kras. Oun rhal ko massestar, hoy i rhorhene deblen dino vas, oun djal i vavareskri romyah,

3. Mose 20:12

Te sovell i morsh peskro čaveskri romyah, hounte hidjrenn le pengri phagi oun hounte venn maredo. I baro vi-ladjedo koova kran le.

3. Mose 20:10

Te sovell yek i romyah i vavarestar, hounte venn kol douy maredo.

3. Mose 18:20

Tou sovess gar i romyah i vavarestar, te kress tout gar pale-čiddo.

Hebrearja 13:4

Kolla, kay romedino hi, hounte bistrenn gar, te hi yon romedino. O rom hounte vell gar khetne i vavar djouvyah, oun i romni hounte vell gar khetne i vavar morsheha. Djinenn, o Devel dell i phagi kol morshende, kay rhorhenn pengri romyat, oun kol djouvyende, kay rhorhenn pengro romes, ninna lauterende, kay loubrenn trouyel.

Galatarja 5:19

T'mer lauter djinenna, har kol menshe djivenna, kay krenn ko čilačepen, hoy an lende hi: I morsha sovenn vavar djouvyentsa. Oun i djouvya sovenn vavar morshentsa. I menshe krenn djoungelo koova oun vi-ladjedo koova.

1. Korintarja 6:9

T'mer hounte djinenn, kolla, kay čilačo koova krenna, venn gar pash o Debleste an o bolepen, oun lenn gar ko lačo koova, hoy o Debles peskre čavenge hi. Ma rhorhenn t'men kokres! Kolla, kay vi-ladjedo koova krenna, venn gar pash o Debleste an o bolepen, vitar gar kolla, kay mangenn vavar koova an har o Debles, vitar gar kol morsha, kay rhorhenn pengri romyat i vavar djouvyah, vitar gar kol djouvya, kay rhorhenn pengro romes i vavar morsheha, vitar gar kol morsha, kay krenn vi-ladjedo koova vavar morshentsa oun čaventsa,

Maleachi 3:5

Oun me kamau pash t'mende te vell, te vap t'maro čačepaskro ray. Oun mange nay patsenna, me rakrau o čačepen vin pral i menshende, kay hadenn man gar: kolla, kay dourkrenna, kol morsha, kay rhorhran pengri romyat, oun kol djouvya, kay rhorhran pengri romes, kolla, kay phagenn pengri sovel, oun kolla, kay djan djoungeles kolentsa trouyel, kay boudrenn lenge, oun kolla, kay rhorhenn kol djouvyen, kolengro rom meras, oun kolla, kay rhorhenn kol čaven, kolen bouder kek dad hi, oun kolla, kay rikrenn kol vi-themaryen tele, kay djivenn mashkral t'mende. Ko penell o baro Devel, ko ray pral o bolepen oun i phoub.

Jeremia 29:23

Koy phagi vas ap lende doleske, kay kran le i vi-ladjedo koova an Israel, oun lan penge romyen, kay romedino hi, oun penan an miro lab čomone glan-vi, hoy rhorhepen his, hoy me lenge gar an o mouy čivom. Me djinau, hoy le kran, me dikom les, penell o baro Devel.

Jeremia 9:2

Lengri čip hi har i čouri. Lengro rhorhepah van le zoreles an o them. O čačepen rakrenn le gar. Yek čilačo koova pal o vavar krenn le. Man prindjrenn yon gar, penell o baro Devel.

2. Samuel 13:1

Oun pal kova djas yaake. O Davideskro čaves, o Absalomes, his i shoukar pheen. Koya kharas Tamar. Oun o Davideskro čavo, o Amnon kamas lat.

5. Mose 27:22

“Praasedo vell kova, kay peskri phenyah sovell, pash i čate peskro dadestar oder peskri datar!” Oun i tsele menshe hounte penenn: Amen!

5. Mose 22:22

Te hatsell yek i morshes, kay hi čiddo pash i djouvel, koya i vavareskri romni hi, palle hounte merenn kol douy: ko morsh, kay pash late čiddo his, oun koy djouvel. Yaake čivenn t'mer o čilačepen dran Israel vin.

2. Samuel 13:11

Oun har yoy kova pash leste anas, te rhal lo, tapras yob i Tamar, oun penas ap late: “Ab, miri pheen! Čip tout pash mande!”

Ezekiel 18:6

kova rhal či ko massestar, hoy i rhorhene deblenge dino vas. Yob mangell gar i rhorhene deblen an, kolen i Israelitarya an-mangenn, oun djal gar i vavareskri romyah, oun sovell gar i djouvyah an ko tsiro, kay lat peskro koova hi.

Ezekiel 33:26

T'mare rharentsa lenn t'menge, hoy kamenn, oun krenn, hoy djoungelo hi glan mire yaka, oun ko yek sovell i romyah o vavarestar. Patsenn čačepah, ko them hi t'maro?

3. Mose 18:6

Kek t'mendar hounte sovell i djouvyah dran peskri familya. Kova penau me, o baro Devel.