Ezekiel 20:8 - O Debleskro Lab 2024 (Sinte-Manouche)

⁸ Yon moukan pen či mandar te penell, oun kaman gar ap mande te shounell. Kek vitsras kol djoungele figuren krik, hoy lo an-mangas. Kol egiptikre deblen kaman le gar te moukell. Kote kamom miri rholi pral lende vin te čorell. Gomme kote an o them Egiptia kamom miri tseli rholi ap lende vin te moukell.

O Debleskro Drom 2021 (Sinte)

⁸ Jon mukan pen tchi mandar te penell, un kaman gar ap mande te shunell. Kek witsras kol djungele figuren krik, hoi lo an-mangas. Kol egiptikre deblen kaman le gar te mukell. Kote kamom miri choli pral lende win te tchorell. Gomme kote an o them Egiptia kamom miri tseli choli ap lende win te mukell.

Ezekiel 20:8 Referans Kwoze

Ezekiel 20:21

Oun ninna lengre čave moukan pen či mandar te penell, oun kran gar hoy lendar kamom, oun djivan gar pal miro čačepen. Mire čačepaskre laba hi kolla, kolentsa i mensho djido ačell, te rikrell lo pes ap lende. Oun yon kran savo koova ap o Debleskro dives, hoy hounte krans le gar. Oun yaake vom gar sharedo. Kote kamom miri rholi pral lende vin te čorell. Kote an o moulo tato them kamom miri tseli rholi ap lende vin te moukell.

Ezekiel 20:7

Oun me penom ap lende: Hakeno t'mendar hounte vitsrell kol djoungele figuren krik, hoy lo an-mangell. Rikrenn t'men pale kol rhorhene deblendar, kolen i Egiptarya an-mangenn, te venn t'mer gar pale-čiddo! Me, o baro Devel, hom t'maro Devel.

Ezekiel 7:8

Sik čorau miri rholi pral t'mende vin. Oun djau rholyah t'mentsa trouyel, bis te miri rholi trouyel hi. Me rakrau o čačepen pral t'mende vin, oun t'mer lenn t'mari phagi. Ko tselo djoungelo koova, hoy kran, anau ap t'mare sherya pale.

Ezekiel 5:13

Te moukom miri tseli rholi ap t'mende vin, oun dom t'men pale, hoy kran, palle djal miri rholi krik, oun hom bouder gar rhoyedo pral t'mende. Oun t'mer djinenn, te homs me, o baro Devel, kay das t'men trad o tselo djiyeha.

Jesaja 63:10

Ninna te his lo lenge yaake lačes, kaman le gar ap leste te shounell, oun doukran les an leskro dji. Kote vas lo rhoyedo ap lende, oun kouras pes lentsa.

Ezekiel 20:13

Ninna an o moulo tato them moukan pen i Israelitarya či mandar te penell. Yon djivan gar yaake, har lendar kamom. Oun ap mire čačepaskre laba dan le či. Oun mire čačepaskre laba hi kolla, kolentsa o mensho djido ačell, te rikrell lo pes ap lende. Oun yon kran boud koova ap o Debleskro dives, hoy hounte krans le gar, oun yaake vom gar sharedo. Kote kamom miri rholi pral lende vin te čorell, te hounte merans le lauter an o moulo tato them.

5. Mose 9:7

Ma bistrenn, har rhoyran t'maro baro Debles an o moulo them, Ko divesseha har djan t'mer vin dran o them Egiptia bis te van kate, kay kanna han, kaman gar ap leste te shounell.

Nehemia 9:26

Oun pale shounan le gar bouder ap toute, oun hadan pen pral toute, oun kaman bouder gar tiro drom te djal. Oun yon dan tire rakepangren moulo, kolla kay len trad dan, te anenn le len pale pale pash toute.

2. Mose 32:1

Har dikan i menshe, kay o Mose i rah tsiro krik ačas, oun gar bouder koy berga tele vas, van le khetne pash o Aron oun penan ap leste: “Dja, kre menge i devel, kay djal glan mende! Mer djinah gar, hoy ko Moseha djas, kay anas men dran o them Egiptia vin.”

3. Mose 18:3

Ma djivenn yaake har i Egiptarya, an kolengro them djivan, vitar gar har kolla an o them Kanaan, kote kay t'men anau. Ma djivenn pal lengro koova.

Debleskri gili 69:24

Lengre yaka te venn korelo, te nay dikenn le bouder či! Le lendar lengri zoor, te djan le bango.

Debleskri gili 106:23

Doleske kamas lo len moulo te dell, te vals kote gar o Mose, koles yob peske vi-rodas. Kova stas pre, te rikrell lo o Debles leskri rholyatar tele, yaake te dell lo len gar moulo.

Jeremia 7:24

Yon shounan gar ap mande, oun lengre kanda pandan le, oun djivan pal lengro shero, oun kran hoy lengro čilačo dji penella, oun sikran mande pengro doumo, oun gar pengro mouy.

Jeremia 11:8

Yon shounan gar ap mande, oun dan gar yak ap mire laba. Hakeno djas pal peskro shero, oun kras kova, hoy leskro midjak dji leske penas. Me penom lenge, te hounte rikrenn le dren, hoy lentsa vin krom. Kova kran le gar. Doleske moukom pral lende koy tseli bibarht te vell.

Ezekiel 20:16

Kova vals i phagi doleske, kay dan le či ap mire čačepaskre laba, oun kran gar, hoy lendar kamom, oun rikran gar o Debleskro dives dren. Na-a, pengre rhorhene deblen nashan le palla!

Ezekiel 22:22

Yaake har o roup an o bob gar ačell hoy lo his, yaake djal t'menge, te vell o foro Yerusalem har i bob t'menge. Oun t'mer dikenn oun hayvenn palle, te hom me o baro Devel, kay čoras peskri rholi pral t'mende vin.

Hosea 9:10

O baro Devel penell: I Israelitarya his mange har drake an o moulo them, har hatsom len kote. Oun t'mare phoure his mange har neve fayge ap i faygetikro rouk. I tsiro koy pre, har van le pash i berga Peor, dan le pen o vi-ladjedo debleske Baal koy, oun van yaake pale-čiddo har ko devel, kones yon kaman.

5. Mose 9:24

Yaake rah har prindjrau t'men, hi t'men sherya har barra oun krenn gar, hoy o baro Devel t'menge penell.

Debleskri gili 78:8

yaake te venn le gar har pengre phoure, kay o Debleskro dromestar tele peran, oun kaman gar te shounell. Kolengre djia his gar zorelo, oun yon his gar pengro tselo djiyeha pash o Debleste.

Debleskri gili 78:17

Ninna te kras lo kova lauter lenge, shounan le gar ap leste, oun an o moulo tato them hadan le pen ap leste, ko pralstuneste.

Debleskri gili 81:12

Mire menshe shounan gar ap mande. O Israel kamas man gar.

Jeremia 32:23

Oun har yon an o them dren van, oun les penge lan, shounan yon gar ap toute, djan vitar gar ap tiro drom. Oun halauter, hoy tou lenge zoreles penal, te krenn le les, kova kran yon gar. Doleske moukal ninna kava tseli bibarht pral lende te vell:

Ezekiel 23:3

Kolla van loubya an o them Egiptia, har le terne his. Kote moukan le pengre čoučya an te taprell.