Ezekiel 11:16 - O Debleskro Lab 2024 (Sinte-Manouche)

¹⁶ Doleske pen: Kava penell o baro Devel, maro ray: Ava, me tradom len dour krik an vavar themma, oun mank vavar menshende. Ninna te djivenn le kate te kote an boud themma, oun hi bouder gar khetne, hom me pash lende, te nay mangenn le man an, an kol themma, kay le anlo van.

O Debleskro Drom 2021 (Sinte)

¹⁶ Doleske pen: Kawa penell o baro Dewel, maro rai: Awa, me tradom len dur krik an wawar themma, un mank wawar menshende. Ninna te djiwenn le kate te kote an bud themma, un hi buder gar khetne, hom me pash lende, te nai mangenn le man an, an kol themma, kai le anlo wan.

Ezekiel 11:16 Referans Kwoze

Jesaja 8:14

Pash leste nay khatrenn t'men. Kol vavarenge an Israel oun Youda hi lo har i bar, pral koleste yon perenn, ava, har i baro zorelo bar, pral koleste yon pen rhoyrenn. Oun i menshenge an Yerusalem hi lo har khatede pandle dorya, an kolende yon perenn oun pen taprenn.

Debleskri gili 90:1

O mangepen o Mosestar, ko Debleskro morshestar. Baro Devel, maro ray, tou hal kova, pash koleste nay vah oun khere ham.

Jeremia 31:10

Shounenn, t'mer menshe dran vavar themma, hoy o baro Devel penell! Djan pral o baro pani pash i panyeskre themma, oun rakrenn kote leskre laba! Penenn: Kova, kay tradas o Israel an boud themma, kova lell len pale khetne oun dell garda ap lende har i bakrengro ap peskre bakre garda dell.

Jeremia 30:11

Me, o baro Devel, hom pash t'mende, te vap ap t'mari rig. Kol natsyone, mank kolende tradom t'men, kolla hounte djan tele. T'mer djan gar tele. T'mende dau i phagi har t'menge mishto hi. Kek daventsa nay moukau t'men gar. Vals gar mishto, te dap t'men kek phagi.

Gosewe laba 18:10

O baro Devel hi har i baro zorelo kheer. Kova, kay an o čačepen tardo hi, nashell pash leste oun khatrell pes pash leste.

Debleskri gili 91:1

Kova, kay beshell tel o vast o Deblestar, ko pralstunestar, oun ačell pash leste, ko zorelo Debleste,

Debleskri gili 44:11

Tou moukal men pale te djal glan kolende, kay kouran pen mentsa. Yaake nay čoran kolla mare koola, kay pral mende van.

Debleskri gili 31:20

Har baro hi tiro lačepen, miro Devel, kolenge, kay djivenn touha! Hakeneste sikreh tou, har lačo tou kolenge hal, kay rikrenn pen ap toute.

3. Mose 26:44

Ninna te hi le an o them kolendar, kay lan len pandles, hi kova gar yaake, te rissroms man krik lendar, oun kamoms či bouder lendar te djinell. Me moukau len gar lauter te merell. Miri sovel, hoy lende dom, phagau gar. Me, o baro Devel, hom lengro Devel.

Jeremia 42:11

Ma trashenn o baro rayestar dran o them Babilonia, glan koleste t'men traash hi, penell o baro Devel; me hom pash t'mende, te vap t'menge ap i rig, oun lap t'men dran leskro vast vin. Doleske ma trashenn lestar!

Jeremia 26:11

Oun i rashaya oun i rhorhene rakepangre penan ap i pralstunende oun i vavar menshende, kay hi koy: “Kava morsh hounte merell; yob rakras djoungeles pral kava foro, har shounan t'mer t'mare kandentsa.”

Jeremia 26:7

O Yeremia kras, hoy o baro Devel leske penas, oun penas kova lauter i menshenge glan o baro Debleskro kheer. Har shounan i rashaya oun i rhorhene rakepangre oun i tsele menshe, hoy yob penas, tapran le les oun penan: “Tou hounte meress!

Jesaja 4:5

Pral i tseli berga Sion oun pral kay platsa, kay venn le khetne, bičrell o baro Devel palle yek folka ap o dives, oun i yagakro dourho an i rati. Yaake čakrell lo o foro peskro raylepah

Jeremia 29:7

Rodenn koy pal, te djal mishto o foreske, kay moukom t'men te anell. Oun mangenn ko foreske mandar lačepen! Te djal o foreske mishto, djal t'menge ninna mishto.

Jeremia 29:11

Djinau mishto, hoy man t'menge an o shero hi: lačo koova oun gar čilačo koova, te djal t'menge yaake har t'mer kamenna.

Zakarie 2:6

Oun me poučom lestar: “Kay djah tou?” Yob penas: “Kamau te dikap pal, har baro oun bourhlo o foro Yerusalem hi.”

5. Mose 4:27

O baro Devel tradell t'men mank i menshende an i tsele themma, yekes kate oun ko vavares kote. Gar boud menshe ačenn t'mendar djido mank kol menshende an i vavar themma, kay o baro Devel t'men tradas.

Ezekiel 20:23

Me hadom miro vast pre, oun dom man sovel kote an o moulo tato them, te tradap len an vavar themma oun mank vavar menshende,