Efesarja 6:13 - O Debleskro Lab 2024 (Sinte-Manouche)

¹³ Doleske rivenn kol koola ap t'mende, hoy dell t'men o Devel, te kourenn t'men mishto ap ko dives, kay vell o beng ap t'mende. Palle han zorleder har yob, oun ačenn zoreles tardo.

O Debleskro Drom 2021 (Sinte)

¹³ Doleske riwenn kol koola ap tumende, hoi dell tumen o Dewel, te kurenn tumen mishto ap ko diwes, kai well o beng ap tumende. Palle han sorleder har job, un atchenn soreles tardo.

Efesarja 6:13 Referans Kwoze

2. Korintarja 10:4

An maro boudi o Debleske lah mer kek rharo an o vast, har i menshe ap kay phoub krenna. Na-a, o Devel dell men i zoor, te nay rakras yaake kol menshentsa, kay rhorheno koova pral leste patsenna, te dikenn le, kay kova, hoy yon yaake rah patsan, či moldo hi.

Louka 21:36

Denn yak hako tsiro! Mangenn o Deblestar, te venn t'mer zorelo an o patsepen tardo, oun venn mishto vin dran ko čilačo tsiro, hoy vella! Yaake hounte trashenn t'mer gar o Menshengro Čavestar, te vell lo pale.”

Efesarja 5:16

Hako kopo, kay krenn nay lačo koova, krenn kova! Kava tsiro, kay djivah, hi čilačo.

Louka 8:13

Ko kotar phoub, hoy hi pherde barra, hi har o dji kol menshendar, kay shounenn o Debleskro lab, oun lenn les barhteles pre. O lab vell gar zorelo an lengre djia. I tikno tsiro patsenn le. Oun te vell pharo tsiro ap lende, vitsrenn le pengro patsepen ap i rig.

Debleskro tsiro 3:10

T'mer rikran ko lab, hoy t'menge penom, oun van gar khino an o patsepen ap mande. Doleske rikrau mire vasta pral t'mende an ko pharo tsiro, kay i bibarht vella pral i tsele menshende ap kay phoub, te vell diklo, hoy an lengre djia hi.

Kolossarja 4:12

Ninna o Epafras penell t'menge: “Ačenn o Debleha!” Kova hi yek t'mendar, oun boudrell o Yezous Kristeske. Yob mangell o Debles hako tsiro t'menge, te venn t'mer zoreles an o patsepen, te djinenn lauter, hoy o Devel t'mendar kamella oun te krenn kova ninna.

Maleachi 3:2

Koon t'mendar nay rikrell ko dives vin, yob te vella? Oun koon t'mendar nay ačell glan leste tardo, yob te moukell pes te dikell? Yob hi har i zoreli sapouni oun har i yag, hoy rhačell i čik an o saster krik.

Sikepaskro 12:1

Yaake rah har terno hal, ma biste koles, kay tout kras! Oun djin, te venn kol čilače divessa oun kol bersha, kay tou peneh: “Yon hi mange gar mishto”!

Efesarja 5:6

Ma patsenn kekes, kay penell t'menge, te nay krenn kova lauter! Koon kova penella, hi i rhorheno. O Debleskri rholi vell ap kolende, kay gar ap o Debleste shounenna, oun krenna savo čilačo koova.

Debleskro tsiro 6:17

Ko baro dives vas, kay lengri rholi ap mende vella. Oun kek nashte nashell lengri rholyatar krik.”

Amos 6:3

T'mer patsenn, kay hi o čilačo dives dour krik t'mendar. Djinenn: Kova, hoy krenn, moukell ko dives sikeder te vell, kay čilače raya pral t'mende venn.

Remarja 13:12

Kava tsiro kanna hi har i rati. Sik hi i rati bouder gar kay. Oun o dives vella. Dran kova djivas gar har i menshe, kay djivenn an i rati. Te kras bouder gar čilačo koova! Kanna hounte kras mer kova, hoy mishto hi, te vell o čilačepen gar o ray pral mende.

Jakobo 4:7

Doleske, shounenn ap o Debleste! Krenn lauter, hoy yob kamella! Ma krenn, hoy o beng kamella! Yaake nashell o beng t'mendar.

1. Petro 4:1

O Yezous Kristo las bare douka ap peste, har yob ap i phoub his. Doleske, ma darenn, te venn ninna douka ap t'mende. Koon an peskro djipen douka hayvas, kova moukell o čilačepen.