Efesarja 4:31 - O Debleskro Lab 2024 (Sinte-Manouche)

³¹ Avenn ap kekeste čilačo oun rhoyedo! Čingrenn ap kekeste, oun praasenn kekes!

O Debleskro Drom 2021 (Sinte)

³¹ Awenn ap kekeste tchilatcho un chojedo! Tchingrenn ap kekeste, un praassenn kekes!

Efesarja 4:31 Referans Kwoze

Kolossarja 3:8

Kanna djivenn t'mer bouder gar t'maro phouro djipen. Doleske čivenn i rholi t'mendar krik, ninna o čilačepen, o djoungelo rakepen pral o vavareste, vi-ladjede laba! Ma rhorhenn t'men!

Sikepaskro 7:9

De garda te vess gar sik rhoyedo! Koon rhoyrell pes pral halauter, hi dinelo.

1. Petro 2:1

Doleske moukenn hako čilačo koova! Ma rhorhenn! Ma rakrenn douy čipyentsa! Ma zilverenn! Rakrenn kek djoungelo koova pral kekeste!

Jakobo 1:19

Mire kamle phrala, djinenn: Hako mensho hounte lell peske tsiro, te shounell lo. Yob te kamell te rakrell, palle hounte poučell lo pestar, te hi kova mishto, hoy yob kamell te penell. Oun yob hounte vell vitar gar sik rhoyedo.

Kolossarja 3:19

T'mer morsha, avenn kamlo ap t'mare romyende, oun gar rhoyedo!

Jakobo 3:14

Te zilverenn t'mer oun hadenn t'men pre pral i vavarende, ma penenn, kay han gosevo! Kova vals i rhorhepen oun gar o čačepen.

Efesarja 4:26

Te venn t'mer an i rholi, palle denn garda, te krenn kek čilačo koova! Moukenn o kham gar tele te djal pral t'mari rholi!

1. Johanni 3:12

Mer hounte vas gar har o Kayn. Kova his o bengestar oun maras peskro phrales. Hoske maras lo les? Leskro phraal kras, hoy lačo his. Oun o Kayn kras, hoy čilačo his. Doleske maras o Kayn peskro phrales.

Debleskri gili 101:5

Koon rakrell čorrhanes djoungelo koova pal o doumo kolendar, kay troul leste hi, koles pandau leskro mouy. Kamau koles gar, kay pre-phourdo hi, oun ap vavar menshende tele dikell.

Jakobo 4:11

Mire phrala! Ma rakrenn djoungeles pral o vavareste! Koon pral peskro phraleste djoungeles rakrella oun o goushteha ap leskri doosh sikrella, kova čivell pes pral kova, hoy o Devel penas. Tou te kreh kova, hal tou bouder gar yek, hoy o Debleskro čačepen krella. Na-a, tou čiveh tout pral o čačepen.

Gosewe laba 26:20

Kote, kay bouder kek kasht hi, kote djal i yag vin, oun kote, kay kek bouder hi, kay rhorhepen ap vavarende pre anell, kote djal o čingepen krik.

Tito 1:7

I pralstouno pral o Debleskro kheer hounte djivell yaake, te dikell kek i čilačo koova ap leste. Yob djal gar pal peskro shero, oun vell gar sik rhoyemen! Yob vell kek pipaskro oun kek čingepaskro! Yob nashell gar pal i love!

1. Timoteo 3:11

I djouvya, kay hi i patslenge koy, hounte djivenn ninna lačes glan i menshengre yaka. Yon rakrenn kek rhorheno koova pral i vavarende. Yon rakrenn kek dinelo koova. Yon krenn pengri tseli boudi mishto.

2. Korintarja 12:20

Me trashau, te vau pash t'mende, dikau savo koova pash t'mende, hoy kamau gar. Palle hom me vitar gar yaake har t'mer kamenna. Me trashau te dikau čingepen mank t'mende, ninna zilvepen, rholi, praasepen, djoungelo rakepen pral o vavareste, pre-phourdepen, bipandlo djipen, oun yek kamell feteder te vell har ko vavar.

1. Korintarja 14:20

Mire phrala, ma avenn har tikne čave, kay gomme gar boud djinenna. Avenn gosevo har i phoure! Pash čilačo koova, avenn har tikne čave, hoy o čilačepen gar hayvenna!

Gosewe laba 29:22

I morsh, kay hako tsiro an i rholi hi, savo krell čingepen, oun anell boud doosh ap peste.

Gosewe laba 14:17

Koon sik an i rholi vell, krell yek dinelo koova pal o vavar. Oun koon lell pes čilačepen glan, pral koleste hi le rhoyedo.

Gosewe laba 10:18

Koles hi i rhorheno mouy, kay peskri rholi ap i vavareste khatrell. Oun kova, kay rhorhepen pral i vavareste rakrell, hi i dinelo.

Gosewe laba 10:12

Dran rholi vell čingepen. Koon o vavares o djiyestar kamell, bistrell leskro tselo čilačo koova.

1. Timoteo 5:13

Kal terne djouvya kamenn bouder gar te boudrell, oun yon djan dran yek kheer an o vavar, oun čamrenn boud. Yon kamenn lauter feteder te djinell, oun rakrenn yaake, hoy gar mishto hi.

Galatarja 5:20

Yon mangenn vavar koova an har o Debles. Yon dourkrenna. Yon kourenn pen oun čingrenn pen. Yon zilverenna, oun len hi rholi ap i vavarende. Yon dikenn ap pende kokres, te djal lenge mishto, oun dikenn gar ap i vavarende, te djal lenge ninna mishto. Yon moukenn pengre phralen oun djan vavarentsa khetne.

1. Korintarja 5:8

Oun yaake har čivan yon ko shoutlo yarro krik oun rhan sau maro, kay kek shoutlo yarro dren his, yaake hounte djivas mer maro nevo djipen an o djoudjepen oun an o čačepen. Mer hounte moukas maro phouro djipen, oun djivas bouder gar an o čilačepen.

Remarja 3:14

Yon hi pherdo koshepen oun praasepen.

Gosewe laba 25:23

I phourdepen oun kale volke anenn brishin, oun i čip, hoy pal o vast rakrell, anell rholi.

Gosewe laba 18:8

Te shounah djoungelo rakepen pral i vavarende, hi kova menge har shoukar rhapen, oun djal menge tele har djet.

Gosewe laba 6:19

yek, kay čomone ap i vavareste pre anell, hoy gar čačo hi; yek, kay anell čingepen mank phralende.

Debleskri gili 140:11

Mouk yagakre barra ap lende te perell! Vitse len an i yag! Mouk len te perell an o telstunepen, yaake te nay stenn le bouder gar pre!

Debleskri gili 64:3

Kol čilače venn khetne oun rakrenn, har yon nay krenn mange čilačepen. Khate man, miro Devel, glan lengri rholi!

Debleskri gili 50:20

Tou rakreh djoungeles pral tire phralende. Pral tiri dakro čaveste aneh tou rhorhepen pre.

Debleskri gili 15:3

vitar kek djounglepen pral yekeste penella. Kova, kay peskro maleske kek čilačepen krella, oun kolen gar praasella, kay pash leste djivenna.

2. Samuel 19:27

“Miro baro ray”, penas yob, “tou djineh, kay hom bango. Me penom ap miro boudepaskro Siba, te čivell lo i ledertikri plarhta ap i esla, te beshap koy pre oun klissap pash o baro rayeste. Oun miro boudepaskro rhorhras man.

1. Mose 37:4

Har leskre phrala dikan, kay lengro dad les boudeder kamas har len, van le čilačo ap pengro phraleste oun rakran nay bouder gar lačes leha.

1. Mose 27:41

Kol lače laba, hoy o Isaak pral o Yakobeste rakras, kran, te vas o Esau rhoyedo ap o Yakobeste. Doleske penas o Esau ap peste: “Ko tsiro vella sik, kay rovenn le pral miro dadeskro merepen. Te hi lo moulo, dau miro phrales moulo.”

1. Mose 4:8

O Kayn penas ap peskro phraleste Abel: “Am! Djas vin ap o them!” Oun har yon vin ap o them his, hadas pes o Kayn ap peskro phraleste Abel oun das les moulo.

Debleskro tsiro 12:10

Oun me shounom i zorelo rakepen an o bolepen, hoy penas: Kanna las men maro Devel dran o bengeskro vast vin. Maro Devel sikras peskri zoor, oun vas o ray pral i tsele menshende ap i phoub. Oun yob das peskri tseli zoor koles, kay yob vin rodas, te vell lo o baro ray pral halauter. Tele vitsedo hi ko phoukepaskro, kay anas i doosh ap mare phralende glan o Debleste o dives oun i rati.

1. Johanni 3:15

Djinenn, hakeno, kay krell peskro phraleske čilačepen, kova hi har yek, kay marell peskro phrales. Oun kova, kay marell peskro phrales, koles hi gar ko djipen an leste, hoy gar pre-herella.

Tito 2:3

Pen i phoure djouvyenge, te djivenn le yaake, har o Debleskre čave djivenna, te rakrenn le gar djoungeles pral i vavarende, te piyenn le pen gar mato! Yon hounte sikrenn i vavaren, hoy lačo hi.

2. Timoteo 2:23

Te čingrenn i menshe pral i laba, ma mouk tout an ko dinelo rakepen dren tserdell, hoy či molella! Tou djineh, kova anell čingepen.

1. Timoteo 3:3

Yob hi kek pipaskro. Yob hi kek marepaskro. Les hi i baro dji i vavarenge. Yob hi kek čingepaskro. Yob hi gar pal i love.

Bičepangre 21:30

I tsele menshe an o foro Yerusalem van rhoyemen ap o Pauleste, nashan khetne, tapran o Paules, oun tserdan les dran o Debleskro baro kheer vin. Har yon vin his, pandan le sik i voudya an o Debleskro baro kheer.

Jeremia 6:28

Yon djan lauter penge krik mandar, oun rakrenn djoungeles yek pral o vavareste. Djia dran saster hi len. Yon lauter djivenn an o rhorhepen.

Gosewe laba 29:9

Te vell i gosevo khetne i dineleha pash o čačepaskro morsheste, te vell o čačepen vi-kerdo, palle vell o dinelo divyo oun sal. Či dikell lo dren.

Gosewe laba 19:12

Har koy gole, hoy i levo dell, hi i rholi o baro rayestar. Oun leskro lačepen hi har o brishin ap i phoub, hoy krell lat pale sapeno.

2. Samuel 19:43

Koy penan kol tsele morsha dran o them Youda ap kolende dran Israel: “O baro ray hi yek mare menshendar. Hoske han t'mer koy pral rhoyedo? Mer rham an kek tsiro o baro rayeskro rhapen. Oun yob vas menge gar lačeder har t'menge?”

2. Samuel 13:22

O Absalom rakras gar peskro phraleha, o Amnon, gar čilačes, vitar gar lačes, yaake midjak his lo ap leste, doleske, kay yob ap leskri phenyate bari ladj anas.

1. Mose 37:21

Har shounas o Ruben kova, kamas yob les vin te lell dran lengre vasta, te vell yob gar maredo, oun penas ap lende: “Mer dah les gar moulo!

2. Timoteo 3:3

Len hi kek dji i vavarenge. Yon venn gar pale lačes pal o čingepen. Yon rakrenn rhorhepen pral o vavareste. Yon hi bipandlo oun doukrenn i vavaren. Yon kamenn kek lačepen.

Jeremia 9:4

Yon lauter rhorhenn pengre malen. Oun kek rakrell laba, hoy čačo hi. Yon penan pengre čipya, te rakrenn le rhorhepen. Pale te pale krenn le čilačepen ap i vavarende,

Debleskri gili 37:8

Mouk tele i rholyatar! Ma rhoye tout pral o čilačepen, hoy i vavar krenna! Kova nay anell tout yaake dour, te kreh tou ninna o čilačepen.

Efesarja 4:22

Ma djivenn bouder gar t'maro phouro djipen! An t'maro phouro djipen vas o čilačo koova baro an t'mare djia, oun t'mer kran, hoy t'menge gar mishto hi. Savo koova krell t'maro djipen paash.

Efesarja 4:25

Ma rhorhenn bouder! Mer ham lauter phrala oun phenya. Doleske rakrenn o čačepen yek o vavareha!