Efesarja 3:17 - O Debleskro Lab 2024 (Sinte-Manouche)

¹⁷ Me mangau lestar ninna, te djivell o Yezous Kristo an t'mende dran t'maro patsepen, oun te kamenn t'mer o Debles oun ninna yek o vavares o djiyestar. Palle han t'mer har i rouk, koleskre draba djan dour an i phoub. Oun t'mer han har i kheer, hoy zoreles tardo hi.

O Debleskro Drom 2021 (Sinte)

¹⁷ Me mangau lestar ninna, te djiwell o Jesus Kristo an tumende dran tumaro patsepen, un te kamenn tumer o Debles un ninna jek o wawares o djijestar. Palle han tumer har i ruk, koleskre draba djan dur an i phub. Un tumer han har i kheer, hoi soreles tardo hi.

Efesarja 3:17 Referans Kwoze

Kolossarja 2:7

te vell t'maro patsepen yaake zorelo har i rouk, hoy zoreles an i phoub tardo hi! Ma moukenn ko čačo drom, hoy t'mende siklo vas! Bistrenn vitar gar, te parkrenn t'men boud pash o Debleste!

1. Johanni 4:16

Mer hayvam ko čačo kamlepen, hoy o Debles menge hi. Oun mer patsah, te kamell men o Devel čačepah! O Devel hi pherdo kamlepen. Koon an o Debleskro kamlepen ačella, kova ačella o Debleha, oun o Devel ačell leha.

Johanni 14:23

Koy penas o Yezous ap leste: “Te kamell man yek o djiyestar, kova krell, hoy me penau. Koles kamell miro dad. Oun mer vah pash leste oun ačah pash leste.

Galatarja 2:20

Kova hom gar me, kay djivau kanna. Hi o Yezous Kristo, kay djivell an mande. Oun ko djipen, hoy kanna djivau, djivau me an o patsepen ap o Debleskro čaveste. Yob kamas te djivap, oun das peskro djipen mange an o merepen.

Remarja 5:5

Oun kava patsepen moukell yekes gar nashedo te djal. O Devel kamell men o tselo djiyeha. Kova sikras men o Debleskro Dourho, hoy o Devel an mende das.

Debleskro tsiro 3:20

Dikenn, me hom glan o voudar tardo, oun dau ap ko voudar. Koon shounell, hoy me penau, oun krell mange o voudar pre, pash koleste djau me dren, oun rhau leha, oun yob rhal mantsa.

2. Korintarja 6:16

An o Debleskro baro kheer vell o djido Devel kokres sharedo oun kek vavar koova. Mer halauter ham o djido Debleskro baro kheer. O Devel penas: Me kamau te djivap pash lende oun mashkral lende. Me kamau lengro Devel te vell, oun yon hi mire menshe.

Jesaja 57:15

Me, o pralstouno, kay hadedo hom, oun hako tsiro djivau, oun kokres o čačo Devel hom, penau: Me djivau an o pralstunepen an miro bolepaskro kheer, oun ninna pash o mensheste, kay i phagedo oun tele-rikedo dji an leste hi, te dap pale zoor koleste, kay tele rikedo hi, oun moukap koles pre te djivell, koleskro dji phagedo hi.

1. Johanni 4:4

Mire čave, t'mer han o Deblestar, oun han zorleder har kol rhorhene rakepangre. O Debleskro Dourho, kay an t'mende hi, hi zorleder har o beng, kay an i menshende hi, kay o Debles gar prindjrenna.

Kolossarja 1:27

Kolen sikras o Devel, har baro oun shoukar ko drom hi, hoy anell ninna kol menshen pash leste, kay kek bibolde hi. Oun ko drom hi o Yezous Kristo, kay djivell an t'mende. Doleske djinenn nay, te djivenn t'mer leha khetne an o bolepen.

Kolossarja 1:23

Yek koova hounte krenn t'mer: Ačenn ap o Yezouseskro drom! Patsenn zoreles ap leste! Moukenn gar tele, te dikenn ap kova, hoy t'men hi pash o Debleste! Rikrenn zoreles ap leskro lačo lab, hoy t'menge penlo vas! Ko lab vas penlo ap i tseli phoub. Ninna me, o Paulo, hounte penap ko lab i menshenge. Kova hi miri boudi.

Johanni 17:23

Me djivau an lende. Oun tou djiveh an mande. Yaake te venn yon yek. Oun i menshe dikenna, kay tou man bičral, oun kay tou len yaake kameh, har tou man kameh.

Johanni 14:17

Kova hi o Debleskro Dourho, kay penell i menshenge o čačepen pral o Debleste. Kolla, kay patsenn gar ap o Debleste, nay lenn les gar. Yon dikenn les gar oun prindjrenn les gar. T'mer prindjrenn les. Yob ačell pash t'mende, oun hi an t'mende.

Louka 6:48

kova hi har i mensho, kay kras peske i kheer. Yob hadas i phoub vin, bis te vas lo ap i zorelo baro bar. Kote čivas yob peskro kheer pre. Oun o baro pani vas, oun kamas ko kheer paash te krell. Oun kova djas gar. Ko kheer his ap o zorelo bar tardo.

Mateo 13:6

Oun har o kham djas pre, vas ko djob, kay gar dour an i phoub his, rhačedo oun meras tele.

Galatarja 5:6

O Yezous Kristeske molell či, te hi i morsh ap o mass činlo, vitar gar, te hi lo gar činlo. Kova, hoy hi boudeder moldo har lauter, hi o patsepen. Ko patsepen dikah mer ap o kamlepen, kay yekes hi i vavareske.

Johanni 6:56

Koon rhala miro mass, oun piyell miro rat, kova ačella an mande, oun me ačau an leste.

1. Korintarja 8:1

T'mer poučan mandar: “Nay rhah mer, kay patslo ham, ko mass, hoy vas glan i figura anlo, hoy mangenn le an, har te vals li i devel?” Hi čačo, mer halauter ham gosevo oun djinah čomone pral kava koova. Koon patsell, te hi les boud gosvepen, kova patsell sik, te hi lo bareder har ko vavar. Koon o djiyestar o vavares kamella, koles krell yob zorelo oun gar tikno.

1. Korintarja 3:6

Me hom har i harho, kay vitsras o djob an i phoub. O Apollo hi har yek, kay čoras o pani pre. Oun o Devel moukas o djob bares te vell.

2. Korintarja 13:5

Dikenn ap t'mende, har t'mer an o patsepen tardo han! Hi t'maro patsepen čačo? Djivell o Yezous Kristo mank t'mende? Te hayvenn t'mer gar, te hi lo mank t'mende, palle hi t'maro patsepen či moldo.