Debleskri gili 39:12 - O Debleskro Lab 2024 (Sinte-Manouche)

¹² Tou te deh o menshes i phagi, te anas lo doosh ap peste, palle djal lo yaake paash har i ripen, hoy rhalo vell i kirmestar. Ava, o mensheskro djipen hi či bouder har i dourho.

O Debleskro Drom 2021 (Sinte)

¹² Tu te deh o menshes i phagi, te anas lo doosh ap peste, palle djal lo jaake paash har i ripen, hoi chalo well i kirmestar. Awa, o mensheskro djipen hi tchi buder har i ducho.

Debleskri gili 39:12 Referans Kwoze

1. Petro 2:11

Kamle mala, t'mer djinenn, kay han gar khere ap kay phoub. Me mangau t'men, avenn zorelo! Te vell o djoungelo koova an t'mare djia pre, palle penenn: “Na-a!” ap kova oun krenn les gar!

Hebrearja 11:13

Kol phoure patsle meran lauter. Ninna te lan le kova gar, hoy kamas o Devel len te dell, patsan le, te lenn le les. Yon dikan kova dour glan pende, oun his barhtelo pral kova. Yon penan pendar, te hi len kek them ap i phoub, oun te hi le kate gar khere.

Debleskri gili 119:19

Me hom gar khere ap kay phoub. Mouk man te hayvap tire laba!

3. Mose 25:23

Ma bikrenn ko them yaake, te vell kova hako tsireske i vavareske! Ko them hi mange. Oun t'mer han har vi-themarya, kay moukau pash mande te djivell.

1. Mose 47:9

Penas o Yakob: “Hom 130 (sheel-te-triyanda) bersh phouro. Kova hi kek phourepen. Man hi kek shoukar djipen. Mire phoure van phoureder har me.”

1. Petro 1:17

O Devel hi o čačepaskro ray, kay rakrell o čačepen vin pral hakeneste pal kova, hoy yob kras. Oun o Devel dikell gar koy pre, koon ko mensho hi. Ap leste penenn t'mer: “Tata!” Doleske djivenn yaake, har yob kova kamella, yaake rah har t'mer kate ap i phoub djivenna.

Debleskri gili 56:8

Miro Devel, kameh len kek phagi te dell lengro čilačepaske? De kal menshen an tiri rholi khetne!

1. Familjakro liil 29:15

Har mare phoure ham mer ninna vi-themarya glan toute, ham i tikno tsiro ap kay phoub oun djah doureder. Maro djipen ap kay phoub hi har i shatto oun ačell gar.

2. Rajengro liil 20:5

“Dja pale pale oun pen ap o Hiskiya, ko rayeste pral mire menshende: Kava penell o baro Devel, ko Devel tiro dadestar, o Davidestar: Me shounom tiro mangepen oun me dikom tire sva. Dik, me kamau tout sastes te krell – an o triinto dives nay djah tou pral an o baro Debleskro kheer.

Hebrearja 5:7

Har o Yezous ap i phoub djivas, kras lo lauter, hoy o Devel kamas. Doleske shounas les o Devel. An i daar mangas o Yezous o Debles i ropah oun bari golyah. Yob djinas, kova nay lell les dran o merepen vin.

Debleskri gili 116:3

O merepen pandas man an peskre shelle. Djinom bouder gar dren oun vin, yaake baro his miri daar te hounte meroms oun djoms pash i moulende.

Hiob 16:20

Mire mala sanenn pral mande. Mire yaka hi pherde sva, har dikau me pre pash miro Debleste.

2. Samuel 16:12

Nay vell, kay o baro Devel dikell miri bibarht, oun krell lačepen dran ko praasepen.”

2. Korintarja 5:6

Doleske ačell maro dji zorelo. Mer djinah: Yaake rah, har djivah ap i phoub, ham gar khere pash maro rayeste, o Yezouseste.

Debleskri gili 102:1

I mangepen yekestar, koleske gar mishto djal, oun koles bouder kek zoor hi, oun kay glan o baro Debleste peskri dji vin čorella.

Debleskri gili 119:54

Kate ap kay phoub, kay me gar khere hom, givau gilya pral tire laba.

1. Mose 21:34

Oun o Abraham ačas i rah tsiro an o them Filistia.

Hiob 13:28

Yaake perau khetne har phouro kasht, har kol ripya, kolen i kirme paash rhan.

Debleskri gili 90:9

Dran tiri rholi djan mare divessa čičeske trouyel. Mare bersha djan yaake sik har te phourdell yek o dourho vin.