Daniel 12:13 - O Debleskro Lab 2024 (Sinte-Manouche)

¹³ Oun tou, Daniel, ač o Debleha tiro tselo djipen! Oun palle sob! Te hi kay phoubyakro tsiro trouyel, steh tou pale pre o djipaske oun leh tiro bravlepen.”

O Debleskro Drom 2021 (Sinte)

¹³ Un tu, Daniel, atch o Debleha tiro tselo djipen! Un palle sob! Te hi kai phubjakro tsiro trujel, steh tu pale pre o djipaske un leh tiro brawlepen.”

Daniel 12:13 Referans Kwoze

Debleskro tsiro 14:13

Oun me shounom, har i rakepen dran o bolepen penas: “Čin kova an i liil dren: Kanna oun an ko tsiro, hoy vella, hi kolla barhtele, kay merenna oun rikran zoreles pengro patsepen ap o rayeste, o Yezouseste.” “Ava,” penell o Debleskro Dourho, “lenge djal lačes, oun yon bistrenn pengri tseli phari boudi. Kova, hoy yon kran o Debleske hi gar bistedo an o bolepen.”

2. Korintarja 5:1

Mer djinah, maro djipen ap kay phoub ačell gar. Pal maro merepen lah i nevo troupo. Ko nevo troupo hi har i kheer, hoy kras o Devel oun kek mensho. Ko kheer ačell hako tsiro an o bolepen.

Zakarie 3:7

Kova penell o baro Devel, ko ray pral o bolepen oun i phoub: Te djah tou ap mire dromma, oun kreh koy boudi mishto, hoy dom toute, palle vess o pralstouno pral miro kheer oun kol glanstoune platse. Oun tou nay veh glan mande khetne kolentsa, kay kate tardo hi.

Daniel 12:3

Oun kolla, kay hayvan o Debleskro drom, hi har i momeli ap o bolepen. Oun kolla, kay sikran i vavarende o čačo drom, hi har i bolepangre momlia hako tsireske.

Mateo 19:28

Penas o Yezous ap lende: “Čačepah, me penau t'menge: Ko tsiro vella, kay o Devel lauter neves krella. Ap ko tsiro hi o Mensheskro Čavo o ray pral lauterende, oun yob hi beshdo ap peskro rayeskro beshepaskro. Oun t'mer, kay mantsa djana, t'mer venn ninna raya, oun han beshdo ap deesh-te-douy rayeskre beshepangre, oun rakrenn o čačepen vin pral i tsele menshende, kay venna i deesh-te-douy Israeleskre čavendar.

Louka 21:36

Denn yak hako tsiro! Mangenn o Deblestar, te venn t'mer zorelo an o patsepen tardo, oun venn mishto vin dran ko čilačo tsiro, hoy vella! Yaake hounte trashenn t'mer gar o Menshengro Čavestar, te vell lo pale.”

Debleskri gili 16:5

Tou, baro Devel, hal miro bravlepen, oun deh man lauter, hoy man hounte vell djipaske. Miro tselo djipen hi an tiro vast.

2. Tessalonikarja 1:7

T'mer, kay venn kanna palla lino, t'men dell lo i bari barht. Kova dell lo t'men mentsa khetne ap ko dives, kay vell maro ray Yezous pale dran o bolepen, oun lauter dikenn les. Leskre zorele bolepangre venn leha,

Debleskri gili 1:5

Ap ko dives, kay i phagi vin penlo vella, nay ačenn i čilače gar tardo. Oun kolla, kay o Debleskro drom moukan, nay ačenn gar kote, kay kolla khetne venna, kay an o čačepen tardo hi.

Daniel 12:4

Oun tou Daniel, rike kava lab khatemen. Oun pande i dori troul kava liil oun čip tiro sikepen pre, te nay krell les kek pre, bis ko tsiro vella, kay i phoub bouder gar rah koy hi. Palle rodenn boud koy dren oun hayvenn boud oun boudeder.

2. Mose 33:14

O Devel penas: “Me djau glan toute oun anau tout an i them, kay tou khere hal.”

Debleskri gili 16:9

Doleske hi miro dji barhtelo, oun halauter an mande stell i barhtyatar. Ava, me nay čivau man tele kek daryah.