Amos 5:15 - O Debleskro Lab 2024 (Sinte-Manouche)

¹⁵ Dikenn čilačes ap kova, hoy čilačo hi, oun dikenn lačes ap kova, hoy lačo hi! Dikenn koy pre, te lell kova peskro čačepen, koon an o čačepen hi! Palle nay vell o baro Devel lačes kolenge, kay dran o kheer Yosef pral ačenn. Yob hi o ray pral o bolepen oun i phoub.

O Debleskro Drom 2021 (Sinte)

¹⁵ Dikenn tchilatches ap kowa, hoi tchilatcho hi, un dikenn latches ap kowa, hoi latcho hi! Dikenn koi pre, te lell kowa peskro tchatchepen, koon an o tchatchepen hi! Palle nai well o baro Dewel latches kolenge, kai dran o kheer Josef pral atchenn. Job hi o rai pral o bolepen un i phub.

Amos 5:15 Referans Kwoze

Remarja 12:9

An t'maro kamlepen hounte vell kek rhorhepen! Moukenn o čilačepen oun krenn o lačepen!

3. Johanni 1:11

Lačo phraal, ma kre o čilačepen palla! Kre o lačepen! Kova, kay krell lačo koova, vell o Deblestar. Kova, kay o čilačepen krella, kova prindjrell o Debles gar.

Joel 2:14

Koon djinell, te rikrell lo ninna kava kopo i phagi pale, oun moukell djob oun drake bares te vell, te nay anenn t'mer yarro oun mool o baro Debleske, kay hi t'maro Devel.

Debleskri gili 97:10

T'mer, kay o baro Debles kamenna, stakrenn o čilačepen khetne. O baro Devel rikrell peskre vasta pral o djipen kolendar, kay leskre hi, oun lell len vin dran o vast i čilačendar.

Remarja 8:7

Koon kamell yaake te djivell, har yob kamella, kova kamell gar o Debles. Yob shounell gar ap kova, hoy o Devel penella. Yob nay krell les vitar gar.

Micha 5:3

Oun yob, ko nevo ray, dell garda ap lende, har i bakrengro garda dell ap peskre bakren. Leskro Devel bičras les, oun leskri zoor vell lestar, o baro Deblestar. An ko tsiro djal leskro raylepen oun leskri zoor yaake dour har i phoub hi. Oun i menshe an leskro them nay djivenn kek daryah.

2. Mose 32:30

O vavar dives rakras o Mose ap i Israelitarya: “T'mer anan bari doosh oun ladj ap t'mende. Kanna kamau pale pash o baro Debleste ap i berga te djal, te mangap lestar, te bistrell lo t'mari doosh.”

Jona 3:9

Koon djinella? – Kova, hoy o Devel kamas te krell, nay khaytell les, oun yob moukell peskri rholi gar pral mende te vell, te meras gar halauter.”

Amos 5:24

Krenn lauter, te vell hakeneske peskro čačepen! Moukenn o čačepen te nashell an o tselo them har i lengsto pani, hoy les hako tsiro pani hi.

Debleskri gili 36:4

Či har midjak oun rhorhene laba venn dran leskro mouy vin. Lačo koova hayvell lo bouder gar te krell.

1. Rajengro liil 20:31

Kote rakran leskre bare morsha leha oun penan: “Dik, mer shounam, kay i bare raya dran o kheer Israel lače raya hi. Mouk men vin te djal pash o rayeste pral Israel, i goneha troul mende pandlo, oun i dori troul mari meen, te sikras mer leste, te hi lo maro ray. Yaake kamah lestar tiro djipaske te mangell.”

Remarja 7:22

Miro dji kamell te krell, hoy o Devel penella.

Micha 2:12

T'mer, Yakobeskre čave, me anau t'men khetne, – halauteren, kay ačan pral foun o tselo Israel. Anau t'men khetne, har anell i bakrengro peskre bakren an lengro kheer. Yaake har anell lo peskre boud bakren kote, kay le khere hi, yaake anau t'men an t'maro them. Oun o them vell pherdo t'mendar.

Amos 6:12

Nashenn i graya ap i bare barra? Na-a! Nashte boudrenn i harhe koy pre i groumyentsa? Na-a! T'mer rissrenn o čačepaskre laba yaake, te venn le har čomone, hoy marell, oun o čačo drom yaake, te hi lo har i shoutlo pipen!

Amos 5:10

Rhoyedo han t'mer ap koleste, kay t'menge o čačepen penell, oun t'mende sikrell, kay kova gar mishto hi, hoy kran.

Amos 5:6

Te kamenn djido te ačell, palle rodenn o baro Debles. Te krenn kova gar, t'mer dran o kheer Yosef, vell yob pral Betel har i bari yag, hoy kek nay vin krella.

Jeremia 31:7

O baro Devel penell: Givenn oun denn gole i barhtyatar pral o Israel, o pralstouno mank i natsyone! Denn bari gole, hoy vas! Sharenn o baro Debles oun penenn: O baro Devel vas peskre menshenge ap i rig, kolenge, kay i Israelendar pral ačan!

Debleskri gili 119:104

Tiro lab krell man gosevo. Doleske nay dikau gar rhorhene dromma glan i yaka.

Debleskri gili 37:27

Mouk o čilačepen pal toute, oun kre o lačepen! Palle nay ačeh hako tsireske khere an o them.

Debleskri gili 34:14

Palle denn garda ap t'mari čip, te rakrell li kek čilačepen oun kek rhorhepen!

2. Rajengro liil 19:4

O baro ray pral o them Assour bičras peskro pralstounes, te praasell lo o djido Debles. Har kamoms, te shounell o baro Devel, tiro Devel, kol tsele laba, hoy ko morsh penas, oun dell les i phagi! Mange o Deblestar kol menshenge, kay pral ačan leskre menshendar, te rikrell lo peskro vast pral lende!”

2. Rajengro liil 15:29

An ko tsiro, har o Peka ko baro ray pral o them Israel his, vas o Tiglat-Pileser, ko baro ray pral o them Assour, oun peras an o them Israel dren oun las peske kol forya Iyon, Abel-Bet-Maaka, Yanoa, Kedesh, Hazor, Gilead oun dran o them Galilea ko tselo them Naftali. Oun moukas kol menshen, kay kote djivenn, krik te anell an o them Assour.

2. Rajengro liil 13:7

Yaake ačan o rayeske Yoakaz kek lourde pral, har kokres 50 (paash-sheel) klissepangre, deesh kourepangre vourdya oun 10.000 (deesh-zerya) pirengre lourde; Kol tsele vavar maras o baro ray pral o them Syria oun kras, te van le har i phoubyakri čik ap o drom.

2. Samuel 16:12

Nay vell, kay o baro Devel dikell miri bibarht, oun krell lačepen dran ko praasepen.”

Debleskri gili 80:1

I gili o rayeske pral i gipangre, te givell pash o bashepen ap i shob-doryengri bashepaskri. Kay gili kras o Asaf.

Daniel 2:49

Oun o Daniel mangas o baro rayestar, te venn o Shadrak oun o Meshak oun o Abed-Nego i moskre pral i forya an o them Babilonia. Oun kova vas yaake. O Daniel ačas an o baro rayeskro kheer.

Amos 7:3

Koy khaytas kova o baro Debles, oun yob penas: “Mishto, kova vell gar yaake!”

Jona 1:6

Kote vas ko ray pral kava shiffo pash leste oun poučas lestar: “Hoy hi kanna touha? Hoske soveh tou? Ste pre, oun khare tiro debles an! Nay vell, tiro devel dikell kamles ap mende, te meras gar!”

Zefanja 2:3

T'mer vavar, kay kran t'men gar bares oun rikrenn o Debleskro čačepen, t'menge penau: Rodenn o baro Debles! Krenn, hoy glan leste čačo hi! Rikrenn t'men gar baro! Nay vell, te rikrell lo peskro vast pral t'mende, ap ko dives, kay leskri rholi pral i menshende vell.

Maleachi 3:18

Palle dikenn t'mer pale, kay djal gar emliges kolenge, kay an o čačepen tardo hi oun kolenge, kay krenn o čilačepen. Djal vavarčandes koleske, kay mangell o Debles an, har koleske, kay mangell les gar an.

Jeremia 18:8

Te moukenn yon palle pengro čilačo koova, khaytell man kova, kay dom len trad, te vell bibarht pral lende.

Jeremia 22:3

Kova penell o baro Devel: Krenn hakeneske, hoy mishto oun čačo hi! Oun lenn kolen, kay van vi-čoredo dran kol čilačengre vasta vin! Oun lenn či krik kol menshendar, kay hi vi-themarya pash t'mende, vitar gar kol čavendar, kolen kek dad bouder hi, oun kol romyendar, kolengro rom meras. Ma djan zoryah ap yekeste pre! Ma bičrenn kolen an o merepen, kay kek doosh ap lende lan.

Ezekiel 45:9

Kava penell o baro Devel, maro ray: Kanna hi doha! T'mer raya pral o Israel, herenn pre, te rikrenn i menshen i zoryah tele! Doukrenn len bouder gar! Krenn, hoy mishto oun čačo hi! Moukenn tele, te tradenn mire menshen dran pengre khera vin! Kava penell o baro Devel, maro ray.

Micha 3:2

O lačepen kamenn t'mer gar! O čilačepen, kova kamenn te krell. Mire menshentsa djan t'mer trouyel, har te vans le marede firhe, kolenge i hauta tele tserdedo vell, oun o mass tele činlo foun lengre kokale, oun i kokale phagedo, oun palle o mass an i piri činlo oun keredo. Yaake rhan t'mer mire menshen.