O baro Devel, ko ray pral o Israel, kay ginas les vin dran i čilače vasta, – yob, kay hi o ray pral o bolepen oun i phoub, penell: Me hom o glanstouno oun me hom o palstouno, oun dell kek vavar debles har man kokres.
Kova hi ko djipen, hoy gar pre-herella: Te prindjrenn yon tout, kay tou hal o čačo Devel, oun te prindjrenn yon o Yezous Kristes, koles tou bičral ap kay phoub.
Ma darenn, mire menshe! Ma trashenn! Moukom me kova t'men gar te shounell oun penom les t'menge gar glan i rah tsiro? Oun t'mer shounan oun dikan les. Dell i vavar debles har man kokres? Dell i vavar zorelo debles, koles gar prindjrau?
Har yon lauter khetne his, djas o Eliya glan i tsele Israelitaryen oun penas: “Har dour kamenn t'mer gomme ap douy rigya te djan? Hi o baro Devel o čačo Devel, palle nashenn leske pal, te hi o Baal, palle nashenn leske pal!” I menshe penan leske kek lab pale pale.
Penas ko morsh: “Tou hounte kamess tiro Debles o tselo djiyestar, an tiro tselo djipen, tiri tseli zoryah, oun an lauter, hoy tou djineh. Oun ap i vavar mensheste hounte vess yaake lačes, har hal lačes ap toute kokres.”
Yaake hounte djinenn kava dives oun bistrenn kova gar: Dell kek vavar Devel har o baro Devel kokres. Kek vavar devel hi an o bolepen oun vitar gar ap i phoub.
Oun yon penan i menshenge an o tselo them Youda, har te djan le ap o Debleskro drom. Len his o baro Debleskro liil, kay dren činlo hi, har te djivenn le, pash pende. Oun djan trouyel an i tsele forya an o them Youda, oun sikran i menshende o Debleskro drom.
Tou, baro Devel hal kokres o Devel! Tou kral o bolepen oun leskre tsele bolepangre momlia, oun i phoub oun lauter, hoy ap late hi, ninna o baro pani oun lauter, hoy an leste hi. Oun tou kral, te djivell kova lauter. Oun i tsele bolepangre an o bolepen vitsrenn pen tele glan toute.
Yob sikras o Yakobeskre čavende, har te djivenn le. Oun sikras i Israelende peskro drom. Mare phourenge penas lo, te sikrenn yon pengre čavende, har te djan le leskro drom.