5. Mose 4:45 - O Debleskro Lab 2024 (Sinte-Manouche)

⁴⁵ Har le dran o them Egiptia vin djan, penas lo lenge kol tsele laba, hoy lende sikran, har te djivenn le, oun hoy o Devel lendar kamella, oun leskre tsele čačepaskre laba.

O Debleskro Drom 2021 (Sinte)

⁴⁵ Har le dran o them Egiptia win djan, penas lo lenge kol tsele laba, hoi lende sikran, har te djiwenn le, un hoi o Dewel lendar kamella, un leskre tsele tchatchepaskre laba.

5. Mose 4:45 Referans Kwoze

Debleskri gili 119:111

Tire laba, hoy menge sikrenn, har te djivas, hi mange kouč oun ačenna mange hako tsiro. Ava, yon hi kolla, hoy miro dji barhteles krenn.

Debleskri gili 119:24

Tire laba, hoy sikrenn mange, har te djivap, krenn man barhtelo. Yon hi mange har i lačo maal, ap koleste me shounau.

Debleskri gili 119:22

Mouk kek ladj ap mande te vell! Mouk len gar pral mande te sal! Me djau miro drom yaake har tou mange sikral.

Debleskri gili 119:14

Me hom yaake barhtelo pral tiro drom, kay tou mange sikral, har te djivap. Kova hi mange shoukeder har i baro bravlepen.

Debleskri gili 119:7

Me parkrau man pash toute o tselo djiyestar, te sikreh tou mange tire čačepaskre laba.

Debleskri gili 119:5

An miro tselo djipen kamoms te krap, hoy mandar kameh.

Debleskri gili 119:2

Har barhtelo hi kolla, kay yaake djivenn, har yob lenge sikras, oun pengro tselo djiyestar ap leste shounenn.

1. Rajengro liil 2:3

Djib tiro djipen glan tiro baro Debleste! Dja ap leskre dromma! Kre, hoy o Devel toutar kamell, oun rike tout ap leskre laba oun ap leskro čačepen! Djib yaake, har yob mende sikras an o Moseskre lila. Palle djal touke halauter mishto, hoy kreh, oun kay tou ninna djah.

5. Mose 6:20

Te vell ko tsiro, kay poučell tout tiro čavo: Hoske hounte rikras kol laba, hoy sikrenn, har te djivas, oun hoy maro baro Devel mendar kamell, oun hounte djivas pal leskre čačepaskre laba?

5. Mose 6:17

Rikrenn mishto o baro Debleskre laba oun djivenn yaake, har t'maro Devel t'menge sikras. Krenn, hoy yob t'mendar kamell!

5. Mose 4:1

Kanna shoun, Israel, hoy t'maro baro Devel t'mendar kamell. Denn yak ap leskre čačepaskre laba, hoy me t'men sikrau. Rikrenn t'men ap kova, te ačenn djido, oun te venn dren an ko them, te nay lenn les t'menge dren, ko them, ap koleste t'maro baro Devel t'mare phourenge pes sovel das, te dell lo les lende.

5. Mose 4:44

O Mose sikras i Israelenge o Debleskro drom.

5. Mose 4:46

An ko tsiro his le ap koy rig o panyestar Yordan, kay o kham pre djal, vergel o foro Bet-Peor an o them, kay his o Sihon o ray pral i Amorarya. Kova djivas an o foro Heshbon. Koles maran o Mose oun i Israelitarya, har djan le dran o them Egiptia vin.