5. Mose 12:3 - O Debleskro Lab 2024 (Sinte-Manouche)

³ Vitsrenn kol pre-čidde barra trouyel, kay maran le oun rhačran le firhen pengro debleske. Phagenn kol bare barra paash, hoy le leske pre-čivan! Oun rhačrenn kol kashta, hoy sikrenn i debletsa Ashera. Oun denn lengre figuren an kotya! Či te ačell lendar pral.

O Debleskro Drom 2021 (Sinte)

³ Witsrenn kol pre-tchidde barra trujel, kai maran le un chatchran le viechen pengro debleske. Phagenn kol bare barra paash, hoi le leske pre-tchiwan! Un chatchrenn kol kashta, hoi sikrenn i debletsa Ashera. Un denn lengre figuren an kotja! Tchi te atchell lendar pral.

5. Mose 12:3 Referans Kwoze

Čačepangre 2:2

Oun t'mendar kamom, te venn kek mala kol menshenge, kay an kava them djivenn, oun te phagenn t'mer lengre pre-čidde barra tele, kay rhačrenn le firhen lengro debleste. Oun hoy kran t'mer? T'mer shounan gar ap kova, hoy penom!

4. Mose 33:52

hounte tradenn kol tsele menshen, kay djivenn kote, glan t'mende krik. Oun lengre tsele barrengre oun sasterne deblen, hoy kran yon penge, krenn paash, ninna kol pre-čidde barra.

Zakarie 13:2

O baro Devel, ko ray pral o bolepen oun i phoub, penell: An ko tsiro krau, te mangenn i menshe an o them Youda bouder kek rhorhene deblen an. Oun kolengre laba venn bistedo. Ninna kol rakepangre, kay penenn, te hi le Debleskre rakepangre oun hi kova gar, oun yon rakrenn, hoy i vavar dourho lenge penell, kolen tradau vin dran o them.

Debleskri gili 16:4

Boud hi i douka kolendar, kay nashenn i vavar debleske palla. Me kamau kol rhorhene deblenge kek rat vin te čorell. Vitar gar kamau lengro lab an miro mouy te lell.

5. Mose 7:5

Doleske krenn kava lentsa: Vitsrenn kol pre-čidde barra trouyel, kay marenn le oun rhačrenn le firhen lengro debleske. Phagenn kol bare barra paash, hoy le leske pre-čivan! Oun denn kol kashta tele, hoy sikrenn i debletsa Ashera. Oun rhačrenn lengre figuren pre.

2. Mose 23:13

Denn yak oun rikrenn ap lauter, hoy me t'menge penom! Ma mangenn vavar deblen an! Lengre laba hounte venn gar dran t'mare mouya vin!

Debleskro tsiro 13:1

Oun me dikom dran o baro pani i firhes pre te vell. Koles his deesh shinga oun efta shere. Oun ap haki shing hidjras lo i shereskro sonakay. Oun ap leskre shere his save laba činlo, hoy praasenn o Debles.

Micha 5:14

Oun me dau an miri rholi dren an i tsele themma ap kay phoub, kay shounan gar ap mande.

Hosea 2:17

Kote dau late pale lakro drakengro them, oun koy tala Akor vell lake har i baro voudar, pal koleste lake o kham pre djal. Oun kote nashell li pale kamles pal mande, har an ko tsiro, kay li terno his, har an ko tsiro, kay li dran o them Egiptia djas.

Jeremia 17:2

Ninna lengre čave vitsrenn pen tele glan kol rhačepangren oun glan kol figuren, hoy sikrenn i debletsa Ashera, oun hoy le pre čivan tel kol zenele rouka, oun ap i tikne oun bare berge oun ap o them. Me dau t'maro tselo bravlepen oun kouč koova vavarende, te čorenn le kova t'mendar. Koya hi koy phagi ko čilačepaske, hoy t'mer an kava tselo them kran.

2. Familjakro liil 34:3

Har lo an o orhtato bersh baro ray his, oun gomme i terno morsh his, rodas lo ko Debles, koles leskro phouro dad, o David, an-mangas. Oun an o 12. (deesh-te-douyto) bersh kras lo pes ap i boudi, te vitsrell lo dran o them Youda oun dran o foro Yerusalem kol rhorhene deblen oun figuren krik. Koy pashel his ninna i figure, hoy i debletsa Ashera sikrenn.

2. Familjakro liil 31:1

Oun har kova halauter kerdo his, djan kol tsele Israelitarya, kay kote khetne his, an i forya an o them Youda. Oun yon phagan kol bare barra an kotya, hoy i moule deblenge pre-čiddo his, oun dan koy kashteni debletsa Ashera trouyel, oun kran kol moulne platse oun kol rhačepangre paash, kay i moule debla an-mangedo van, bis te či lendar pral ačas. Kova kran le an o tselo them Youda, Benyamin, Efrayim oun Manasse. Palle djan i tsele Israelitarya pale khere an lengre forya, kay lengre khera oun lengri phoub his.

2. Familjakro liil 19:3

Čomone lačes vas pash toute ninna hatslo: Tou rhačral kol figure an o them, hoy i debletsa Ashera sikrenn, oun rodal pal kova, hoy o baro Devel kamell.”

2. Rajengro liil 23:14

Yob phagas kol bare barra paash, hoy le pengre deblenge pre-čivan, oun das kol figure tele, hoy sikran i Ashera. Oun kote, kay le tardo his, vitsras lo menshengre kokale pre.

2. Rajengro liil 18:4

O Hiskiya kras kol moulne platse paash, kay le i moule deblen an-mangan. Yob moukas kol bare barra an kotya te phagell, hoy le lenge pre-čivan, oun moukas koy kashteni debletsa Ashera trouyel te dell. Oun yob das ko sasterno sap paash, hoy moukas o Mose te krell. Glan ko tsiro, kay o Hiskiya kova kras, rhačran i Israelitarya soungepaskro koova glan ko sap, oun dan leste ko lab Nehoushtan.

1. Rajengro liil 15:13

Oun ninna kras lo, te his leskri day, i Maaka, bouder gar i rani. Kova kras lo doleske, kay moukas li i djoungeli figura te krell, hoy i debletsa Ashera sikras. Oun o Asa das lakri djoungeli figura an kotya oun rhačras lat pash o pani Kidron.

2. Familjakro liil 14:3

Oun yob penas i menshenge an o them Youda, te hounte rodenn le o baro Debles, ko Devel lengre phourendar, oun te djan le ap leskro drom oun djivenn pal leskre laba.

2. Mose 23:24

Ma mangenn lengre deblen an! Ma anenn firhen, te rhačrenn len lenge! Ma krenn yaake har kolla, kay an ko them djivenna! Denn lengre tsele deblen paash, oun phagenn kol bare barra, hoy yon lenge pre-čivan!

2. Mose 34:13

Vitsrenn kol pre-čidde barra trouyel, kay marenn oun rhačrenn le firhen lengro debleske. Phagenn kol bare barra paash, hoy le leske pre-čivan! Oun denn kol figuren tele, hoy sikrenn i debletsa Ashera.

5. Mose 7:25

Rhačrenn i figure lengre deblendar! Ko roup oun ko sonakay, hoy ap lende hi, lenn gar tele t'menge, te venn t'mare djia gar pandles ap kova. Savo koova vals djoungeles glan t'maro baro Debleskre yaka.

5. Mose 12:4

Ma mangenn t'maro baro Debles yaake an, har kol vavar menshe lengre deblen an-mangenn.

1. Rajengro liil 14:15

Oun o baro Devel dell i menshende Israel dava, te trissenn le, har trissell i shilftikro khass an o pani. Oun o baro Devel tserdell i Israelitaryen vin dran kava lačo them, hoy das yob lengre phourende. Oun i Israelitarya venn tradedo ap i vavar rig o panyestar Eufrat. Yon rhoyran o baro Debles, har kran le penge save figure, hoy sikrenn i debletsa Ashera.

2. Rajengro liil 11:18

Palle djan i tsele menshe dran o them Youda an o kheer ko deblestar Baal, oun kran kol tsele figure paash, hoy les sikran. Oun kol rhačepangre, kay firhen oun vavar koova leske rhačedo van, phagan le tele. Oun glan kol rhačepangre maran le leskro rashayes, o Mattan. Oun o rashay Yoyada bičras klisten, te denn le yak ap o baro Debleskro kheer.

Jesaja 27:9

Yaake vell o Israelengri doosh krik lino. Oun ap kova sikrell pes, te hi lengri doosh krik lino: Te denn le i pre-čidde barra yaake khetne, kay mangan le i vavar deblen an, te ačell či har čik. Oun te moukenn le kek figure tardo, hoy sikrenn i debletsa Ashera, vitar kek boba, kay lake soungepaskro koova rhačedo vas.

2. Familjakro liil 14:2

Yob moukas i rhačepangre paash te krell, hoy ap i moulne platse tardo his, oun kay firhen i moule deblenge rhačedo van. Oun kol bare barra, hoy le lenge pre-čivan, moukas lo an kotya te phagell, oun i figure, hoy i Ashera sikrenn, das lo tele.