3. Mose 2:1 - O Debleskro Lab 2024 (Sinte-Manouche)

¹ Te kamell yek i rhapen dran djob glan o baro Debleste te anell, palle anell lo lačo yarro oun čorell djet pral vergel oun čivell soungepaskro koova koy pral.

O Debleskro Drom 2021 (Sinte)

¹ Te kamell jek i chapen dran djob glan o baro Debleste te anell, palle anell lo latcho jarro un tchorell djet pral wergel un tchiwell sungepaskro koowa koi pral.

3. Mose 2:1 Referans Kwoze

Debleskro tsiro 8:3

Oun i vavar bolepaskro vas, oun djas pash o Debleskri rhačepaskri. Les his i sonakaskro čaro an o vast, an koleste goudlo kasht rhačedo vella, hoy mishto soungella. Oun ko bolepaskro las boud goudlo kasht, te rhačrell lo les ap o Debleskro sonakaskro bob, hoy glan o Debleskro beshepaskro tardo hi, te vell o lačo soungepen khetne o mangepah, hoy o Debleskre čave o Deblestar mangan.

Jesaja 66:20

Oun kolla anenn t'mare phralen dran i tsele themma pale, te denn le len o baro Debleske. Ap miri berga an Yerusalem anenn le len ap graya, oun ap vourdya, hoy pre hi, oun an vourdya, hoy pandlo hi, ap maultikre bourike oun ninna ap khamele, penell o baro Devel. Yon anenn len yaake har i Israelitarya anan djob an djoudje čare an o baro Debleskro kheer.

3. Mose 9:17

Ninna anas lo ko yarro, kay djet dren hi, las i vast pherdo oun rhačras les ap i rhačepaskri, yaake har kras lo ap i tsalla, har lo o firhes o Debleske anas, koleskro tselo mass rhačedo vas.

Judas 1:20

T'mer, mire phrala oun phenya, ačenn zoreles an t'maro patsepen, hoy das t'men o Devel. Oun mangenn les yaake, har leskro Dourho an t'mende kamell.

1. Johanni 2:27

O Yezous Kristo das t'men o Debleskro Dourho. Kova ačell an t'mende. Doleske hounte vell t'men kek vavar sikepaskro. O Debleskro Dourho sikrell t'mende o tselo Debleskro drom. Oun lauter, hoy yob t'mende sikrell, kova hi čačo oun kek rhorhepen. Krenn kova, hoy o Debleskro Dourho t'mende sikrella! Yaake ačenn t'mer o Yezous Kristeha khetne.

1. Johanni 2:20

T'mer lan o Debleskro Dourho, oun lestar djinenn t'mer kova lauter.

Johanni 6:35

O Yezous penas lenge: “Me hom ko maro, kay della ko djipen. Koon pash mande vella, koles vell bouder kek bok. Oun koon ap mande patsella, koles vell bouder kek troush.

Maleachi 1:11

O baro Devel, ko ray pral o bolepen oun i phoub, penell: Foun kotar, kay o kham pre djala, bis kote kay o kham tele djal, vell miro lab sharedo pash kolende an i vavar themma. An boud gaba oun forya rhačrenn le mange soungepaskro koova oun firhen, hoy hi lačo an mire yaka. Kolla lauter sharenn miro lab.

Joel 2:14

Koon djinell, te rikrell lo ninna kava kopo i phagi pale, oun moukell djob oun drake bares te vell, te nay anenn t'mer yarro oun mool o baro Debleske, kay hi t'maro Devel.

2. Mose 29:2

Le ninna lačo yarro, čip kek shoutlo yarro dren, oun kre pesse oun sane mare, ninna merklia. An i merklia čip djet dren, oun ap i sane mare mak djet pre.

Joel 1:9

Djob oun mool hi bouder gar koy, hoy nay vals dino o baro Debleste an leskro kheer. I rashayenge hi ropaske. Len hi bouder či, te anenn le o baro Debleske.

3. Mose 5:11

Te hi kova, kay doosh ap peste anas, yaake čorvelo, te nay anell lo gar douy taube, palle anell lo yek kilogrammi lačo yarro o baro Debleske, te vell leskri doosh krik lino. Yob hounte čivell kek djet pre, vitar kek soungepaskro koova. Kava hi i rhapen, hoy o Debleske anlo vell, te vell i doosh krik lino.

4. Mose 8:8

Tou less i terno gouroum, oun koy pashel rhapen o Debleske: yarro, kay djet mashkral hi. Oun i vavar terno gouroum less tou rhačepaske o Debleske, te vell i doosh krik lino.

4. Mose 18:9

Touke hi kol tsele kotya, hoy venn gar pre-rhačedo kol tsele firhendar, hoy denn le mande, te vell lengri doosh krik lino oun te vell lauter pale mishto, ninna ko tselo rhapen, hoy denn le pashel. Kova halauter hi mange kouč, oun me dau les toute oun tire čavende.

4. Mose 28:5

Koy pashel yaake yek kilogrammi lačo yarro, hoy vas khetne dino yek litari djeteha.

Jesaja 43:23

Kol bakre, hoy anal, te venn le rhačedo, his gar mange. Oun kol firhentsa, hoy mange maral, sharal man gar. Me krom touke kek boudi i djobeha, hoy mange rhačrals, oun krom tout gar khino o soungepaskro koveha, hoy mange rhačrals.

3. Mose 6:7

Oun yaake hounte vell kerdo o yarreha, hoy o baro Debleske dino vell. I rashaya dran o kheer Aron anenn les glan o baro Debleste pash koy rhačepaskri.

3. Mose 9:4

Anenn ninna i gouroum oun i morsh bakro, te maras mer len glan o baro Debleste, oun rhan len kote khetne. Koy pashel anenn yarro, kay djet dren hi, te rhačras mer les o baro Debleske. Kava dives hi ko dives, kay o baro Devel pes t'menge sikrell.”

3. Mose 14:10

Ap o orhtato dives anell lo douy terne bakre, hoy morsha hi oun sasto, oun yek bakri, hoy yek bersh phouro oun sasto hi. Ninna anell lo triin kilogramme lačo yarro, kay djet dren hi, te vell kova glan o baro Debleste anlo. Koy pashel anell lo i khoro djet.

3. Mose 24:7

Čip lačo soungepaskro koova ap kal mare. Ko soungepaskro koova vell rhačedo o baro Debleske, oun yaake vell siklo, te hi kal mare o baro Debleske.

Ezekiel 46:20

Oun yob penas ap mande: Kova hi koy isema, kay kerenn i rashaya ko mass kol firhendar, hoy maredo van, te vell i doosh pale mishto, ninna kol firhendar, kay maredo van, te vell i doosh oun o pale-čiddo koova krik lino, oun kay le pengro maro pekenn dran ko djob oun dran ko djet, hoy o Debleske dino vas. Yon hounte hidjrenn kova gar ap i bari glanstouni platsa, te taprenn gar i menshe kova an, hoy o Debleske hi.