2. Mose 7:17 - O Debleskro Lab 2024 (Sinte-Manouche)

¹⁷ Doleske penell o baro Devel: Dikess oun hayvess, te hom me o baro Devel. Dik, me dau o kashteha, hoy an miro vast hi, ap o pani Nil. Oun ko pani vell rat.

O Debleskro Drom 2021 (Sinte)

¹⁷ Doleske penell o baro Dewel: Dikess un haiwess, te hom me o baro Dewel. Dik, me dau o kashteha, hoi an miro wast hi, ap o pani Nil. Un ko pani well rat.

2. Mose 7:17 Referans Kwoze

2. Mose 4:9

Oun te patsenn le tout pale gar, ninna te dikan le ko baro koova, hoy krom o kashteha oun o vasteha, oun shounenn gar koy pre, hoy tou lenge peneh, palle le pani dran o Nil, oun čore o pani ap i phoub! Palle vell ko pani rat.”

2. Mose 7:5

Oun kol Egiptarya dikenn oun hayvenn, kay hom me o baro Devel, te hadau me miro vast pral o them Egiptia oun lau i Israelitarya mashkral lende vin.”

2. Mose 5:2

Oun o Farao penas ap o Moseste oun ap o Aroneste: “Havo devel hi kova, kay me shounap ap leste? Hoske moukap me i Israelitarya te djal? Me prindjrau ko debles gar, oun me moukau gar i Israelitaryen te djal.”

Ezekiel 39:28

Palle dikenn oun hayvenn i Israelitarya, te hom me, o baro Devel, lengro Devel, kova kay anas len an o pandepen an vavar themma, oun moukell len palpale te vell an lengro them. Kek lendar ačell kote pale.

Ezekiel 38:23

Oun yaake sikrau me glan i yaka boud menshendar dran vavar themma, te hom i zorelo Devel. Oun yon dikenn oun hayvenn palle, te hom me o baro Devel.

Debleskri gili 9:16

I menshe an vavar themma, peran an koy rheb, hoy yon i vin hadan. An koy netsa, hoy yon vin čivan, tapran le pen kokres.

Debleskro tsiro 11:6

Len hi i zoor, te rikrenn le o brishin pale, yaake te dell kek brishin ap ko tsiro, kay yon o Debleskro lab penenna. Oun len hi i zoor pral o pani, te nay krenn le dran kol tsele panya rat. Ninna hi len i zoor, te nay anenn le haki bibarht pral i phoub, yaake boud kope, har yon kamenna.

Debleskro tsiro 8:8

Oun o douyto bolepaskro phourdas an peskri phourdepaskri. Koy vas i bari kotar bar, hoy rhačella, an o baro pani vitsedo. Oun o triinto kotar o tselo baro panyestar vas har o rat.

Daniel 5:23

Oun tou hadal tout pral leste, ko bolepaskro rayeste, oun penal, te anenn le i khore dran leskro kheer glan toute. Oun t'mer piyan mool dran lende, tou oun tire bare morsha, ninna tire romya oun vavar djouvya. Oun tou sharal i deblen dran roup oun sonakay, dran lolo saster oun vavar saster, kasht oun bar, kol deblen, kay gar dikenn oun gar shounenn. Ko Debles, koles tiro dourho an peskro vast hi, oun pash koleste tire tsele dromma hi, koles hadal tou gar.

Daniel 5:21

Oun yob vas pale-čiddo oun nay djivas bouder gar mank i menshende. Oun leskro dji vas har i firheskro dji. Oun yob djivas pash i divye bourike. Oun yon dan les khass te rhal har i groumyen. Oun yob čivas pes vin tele. Oun o brishin peras ap leste tele oun kras les sapeno, bis ap ko dives, kay yob hayvas, te hi o pralstouno Debles i tsele rayengre themma an peskro vast, oun yob dell len koleste, koneste yob kamell.

Daniel 4:32

Kolla, kay ap i phoub djivenna, hi har či glan leste. Oun har yob kamella, djal yob kol pralstunentsa trouyel, kay an o bolepen hi, oun ninna kolentsa, kay ap i phoub djivenna. Oun kek nay penell leske: Kova hounte kress tou gar! Vitar kek nay poučell lestar: Hoy kreh tou kate?

Daniel 4:17

Ko rouk, koles tou dikal, kova, kay baro oun zorelo vas, – yaake baro, te djas lo bis ap o bolepen, oun koles hakeno nay dikas, kay lo ninna his ap kay phoub,

Ezekiel 32:15

Te krom me o them Egiptia, te vell lo i vi-meredo them, oun lom lauter krik, hoy kote dren hi, oun dom halauteren, kay kote djivan, palle dikenn oun hayvenn le, te hom me o baro Devel.

Ezekiel 30:19

Yaake dau o them Egiptia peskri phagi, te dikenn oun hayvenn le, te hom me o baro Devel.

Ezekiel 30:8

An ko tsiro, kay čivau yag an o them Egiptia, oun hakeno moulo hi, kay lenge ap i rig vas, palle dikenn oun hayvenn yon, te hom me o baro Devel.

Ezekiel 29:9

Oun i tseli Egiptia vell i moulo them, kay či har barra pral ačenn. Oun yon dikenn oun hayvenn palle, te hom me o baro Devel. Tou, Farao, penal: “Kava baro lengsto pani hi miro. Me hom kova, kay kras les.”

Debleskri gili 105:29

Yob kras rat dran i tsele panya i Egiptarendar, oun moukas i mače kote dren te merell.

Debleskri gili 83:18

An ladj oun traash ap lende hako tsireske, te merenn le an i ladj.

Debleskri gili 78:44

Kote kras lo, te vas o pani an o Nil rat, te nay piyan i Egiptarya gar dran pengre panya.

2. Rajengro liil 19:19

Kanna, maro baro Devel, le men vin dran o vast o baro rayestar pral o them Assour, te nay dikenn oun hayvenn i menshe an i tsele themma ap kay phoub, kay tou, baro Devel, kokres o Devel hal.”

1. Rajengro liil 20:28

Kote vas o Debleskro morsh pash o baro rayeste pral Israel, oun penas leske: Kava penell o baro Devel: “I Syrarya penan, me o baro Devel, voms i devel, kay ap i berge djivell, oun gar i devel, kay ap o telstouno them djivell. Doleske dau me kal tsele boud lourden an tiro vast, te hayvenn t'mer, kay me o baro Devel hom.”

2. Mose 6:7

Kamau, te venn t'mer mire menshe, oun me kamau t'maro Devel te vell. Oun t'mer dikenn oun hayvenn, te hom me, o baro Devel, t'maro Devel, kay las t'men vin dran i phari boudi, hoy i Egiptarya ap t'mende čivan.

2. Mose 1:22

Kanna penas o Farao ap i Egiptarya an peskro tselo them: “Kol tsele morsh čave, hoy neves boldo van, vitsrenn an o pani Nil! Oun i čen moukenn te djivell!”

2. Mose 7:20

Oun o Mose oun o Aron kran yaake, har o baro Devel lenge penas. Oun yob hadas o kasht oun das ap o pani Nil. Oun o Farao oun i pralstoune an leskro kheer dikan kova. Oun o tselo pani an o Nil vas rat.

2. Mose 10:2

Kova krom, te nay peness tou tire čavenge oun tire čavengre čavenge, har krom me ap i Egiptarya, oun havo baro koova me krom mank lende an miri zoor. T'mer hounte djinenn, te hom me o baro Devel.”

Ezekiel 25:17

Me anau lengro tselo čilačepen pale ap lengre sherya. Oun an miri rholi dau len i phari phagi. An ko tsiro, kay anau lengro čilačepen pale ap lengre sherya, dikenn oun hayvenn le, te hom me o baro Devel.

Ezekiel 32:6

Oun me dau o themes tiro rat te piyell, hoy nashell bis pash i berge, oun i tikne panya venn pherdo lestar.