2. Mose 12:27 - O Debleskro Lab 2024 (Sinte-Manouche)

²⁷ Palle penenn lenge: Kava bakro, hoy maram ap ko dives, hoy kharella Passa, kava bakro maram o baro Debleske. Har das yob an o them Egiptia i Egiptarya temerl, djas yob gar an i khera, kay i Israelitarya djivan. Yob djas doureder. I menshe an mare khera moukas lo te djivell.” Kote vitsran pen i Israelitarya tele oun mangan o Debles an.

O Debleskro Drom 2021 (Sinte)

²⁷ Palle penenn lenge: ‘Kau bakro, hoi maram ap ko diwes, hoi kharella Passa, kau bakro maram o baro Debleske. Har das job an o them Egiptia i Egiptarja temerl, djas job gar an i khera, kai i Israelitarja djiwan. Job djas dureder. I menshe an mare khera mukas lo te djiwell.’” Kote witsran pen i Israelitarja tele un mangan o Debles an.

2. Mose 12:27 Referans Kwoze

2. Mose 4:31

Oun yon patsan len. Oun har shounan i Israelitarya, te dikas o baro Devel lengro pharo djipen, oun kamell lenge lačepen te krell, koy vitsran pen le ap i phoub, oun mangan o Debles an.

2. Mose 12:11

Yaake hounte rhan les: troul t'maro per i dori pandlo, i kirrha ap t'mare herya, oun i kasht an t'maro vast. Rhan o rhapen sik! Ko rhapen kharell Passa. T'mer rhan les, te sharenn man, t'maro baro Debles.

1. Korintarja 5:7

Čivenn ko shoutlo yarro t'mendar krik, te venn t'mer har i nevo maro, kay kek shoutlo yarro dren hi! Oun čačepah t'mer han har i nevo maro! O Yezous Kristo vas menge maredo, te lell lo mari doosh mendar krik, yaake har i bibolde maran i bakro ap pengro baro dives, kay Passa kharella.

2. Mose 12:23

Oun o baro Devel djala mashkral o them, te dell lo i Egiptarya temerl. Te dikell lo o rat pral ap o voudar oun ap kol douy kashta, hoy čačes oun serves pash o voudar hi, palle djal yob doureder oun moukell koles, kay anell o merepen, gar pash t'mende dren te djal, te dell lo yekes t'mendar temerl.

Nehemia 8:6

Oun o Esra sharas o baro Debles, kay bareder hi har lauter vavar. Oun i tsele menshe penan: “Amen, Amen!” Oun har le kova penan, hadan le pengre vasta pre. Oun palle vitsran le pen tele glan o baro Debleste lengre mouyentsa ap i phoub.

2. Familjakro liil 29:30

Oun o Hiskiya oun i pralstoune penan ap i Levitarya, te sharenn le o baro Debles kol gilyentsa, hoy kras o David oun o dikepaskro, o Asaf. Oun yon givan barhteles, oun vitsran pen ap i phoub oun mangan o baro Debles an.

2. Familjakro liil 20:18

Oun o Yosafat vitsras pes ap i phoub o mouyeha. Oun i tsele menshe dran o them Youda oun dran o foro Yerusalem vitsran pen tele glan o baro Debleste, oun mangan les an.

1. Familjakro liil 29:20

Oun o David penas ap i tsele menshende, kay kote khetne his: “Sharenn t'maro baro Debles!” Koy sharan i tsele menshe o baro Debles, ko Debles lengre phourendar. Oun yon djan ap pengre čanga glan o baro Debleste oun glan o baro rayeste,

5. Mose 16:5

T'mer nay marenn gar kol firhen o rhapaske Passa an t'mare gaba oun forya, kolen t'maro baro Devel t'men dell, te djivenn kote.

5. Mose 16:2

Djan ap koy platsa, hoy t'maro baro Devel peske vin rodell, te vell yob kote an-mangedo. Oun kote marenn leske i firho, nay vell i bakro, i bouzni oder i groumni, hoy rhan pash o rhapen, hoy vell Passa kharedo.

2. Mose 34:25

Te marenn t'mer i firhes mange, anenn leskro rat gar glan mande khetne o shoutlo mareha! Ko firho, hoy t'mer marenn mange ap o dives, hoy kharella Passa, kolestar hounte ačell či pral o vavar diveske.

2. Mose 34:8

Koy vitsras pes o Mose sik ap i phoub oun mangas o Debles an:

2. Mose 10:2

Kova krom, te nay peness tou tire čavenge oun tire čavengre čavenge, har krom me ap i Egiptarya, oun havo baro koova me krom mank lende an miri zoor. T'mer hounte djinenn, te hom me o baro Devel.”

2. Mose 12:28

Palle djan le oun kran yaake, har o baro Devel o Moseske oun o Aroneske penas.

2. Mose 13:14

An ko tsiro, hoy vella, te poučenn toutar tire čave: Hoske kreh tou kova? palle peness tou ap lende: O baro Devel las men i zorelo vasteha vin dran o them Egiptia, kay hounte boudram tel dava.

Debleskri gili 44:1

I gili o rayeske pral i gipangre. Kay gili hi yekestar dran i familya Korah.

2. Mose 13:8

Oun ap kava dives penenn t'mer t'mare čavenge: O baro Devel anas men dran o them Egiptia vin. Doleske rikrah mer kova.

Debleskri gili 78:5

Yob sikras o Yakobeskre čavende, har te djivenn le. Oun sikras i Israelende peskro drom. Mare phourenge penas lo, te sikrenn yon pengre čavende, har te djan le leskro drom.